އެމްޑީޕީގެ ވެރިކަމުގައި ފެނަކަ ކޯޕަރޭޝަނާ ގުޅޭގޮތުން ފާހަގަވި ކޮރަޕްޝަނުގެ މައްސަލަތައް އެމްޑީޕީގެ އޭރު އޮތް މަޖިލީހުގެ ސަމާލުކަމަށް ގެނައިނަމަވެސް އެ މައްސަލަތައް ބަލާފައިނުވާކަމަށް ލޯކަލް ގަވަރނަންސް މިނިސްޓަރު އާދަމް ޝަރީފް ވިދާޅުވެއްޖެއެވެ.

އޮޑިޓަރ ޖެނެރަލް ނެރުއްވި ފެނަކަ އޯޑިޓް ރިޕޯޓްގައި ބޮޑެތި ހިޔާނާތުގެ މައްސަލަތައް ފާހަގަކޮށްފައިވާއިރު، މި ރިޕޯޓާ ގުޅިގެން ވަޒީރު އާދަމް ޝަރީފް އެކްސްގައި ކުރެއްވި ޕޯސްޓެއްގައި ވިދާޅުވެފައިވަނީ، އެމްޑީޕީގެ ވެރިކަމުގައި ފެނަކައާ ގުޅޭގޮތުން ފާހަގަކުރެވުނު ކޮރަޕްޝަނުގެ މައްސަލަތައް ޤާނޫނު ހަދާ މަޖިލީހުގެ ސަމާލުކަމަށް ގެނެސްފައިވާނޭކަމަށެވެ. ނަމަވެސް އޭރު އެމްޑީޕީގެ މެޖޯރިޓީ އޮތް މަޖިލީހުން އެ މައްސަލަތައް ބަލާފައި ނުވާކަން ވަޒީރު ފާހަގަކުރެއްވިއެވެ.

ވަޒީރު ވިދާޅުވީ މި މައްސަލަތައް އޭރު މިނިވަން މުއައްސަސާތަކަށްވެސް ހުށަހެޅި ނަމަވެސް އެ ތަންތަނުންވެސް އެކަންކަން ބަލާފައިނުވާކަމަށެވެ. ވަޒީރު އާދަމް ޝަރީފް ވިދާޅުވީ ފެނަކައިގެ އެމްޑީކަމުގެ މަގާމުގައި އޭރު ހުންނެވި ސައީދު އެކަންޏަށް ކޮރަޕްޝަނުގެ އެ ފަދަ އަމަލުތައް ނުހިންގެވޭނޭ ކަމަށާއި، އެއީ ވަރަށްގިނަ ބަޔަކަށް ބައި އެޅިގެން ކުރެވުނު ކަމެއްކަމަށް އޮޑިޓް ރިޕޯޓުން އެނގޭކަމަށެވެ.

ދައުލަތުގެ ޒިންމާއަކަށްވާނީ މި މައްސަލާގައި އެންމެ މީހަކަށް ޤާނޫނު ހިންގުމުގެ ބަދަލުގައި މައްސަލައިގައި ހިމެނޭ އެންމެނާމެދު އިންސާފްވެރިކަމާއެކު ޤާނޫނު ހިންގުންކަމަށްވެސް ވަޒީރު ފާހަގަކުރެއްވިއެވެ.

ފެނަކައިގެ އޮޑިޓްރިޕޯޓްގައި ހިޔާނާތުގެ ބޮޑެތި މައްސަލަތަކެއް ފާހަގަކޮށްފައިވާއިރު، ވާދަވެރި ބީލަމުގެ އުސޫލުން ބޭރުން 1.3 ބިލިއަން ރުފިޔާގެ އެއްބަސްވުން ފެނަކަ ކޯޕަރޭޝަނުން ހަދާފައިވާ ކަމަށް ވަނީ ރިޕޯޓުން ދައްކައެވެ. 

އޮޑިޓް ރިޕޯޓްގައިވާ ގޮތުން މި މުއްދަތުގައި 2,239,640,958 (ދެ ބިލިއަން ދުއިސައްތަ ތިރީސް ނުވަ މިލިއަން ހަ ލައްކަ ސާޅީސް ހާސް ނުވަސަތޭކަ ފަންސާސް އަށެއް) ރުފިޔާގެ އެއްބަސްވުން ފެނަކައިން ހަދާފައިވެ އެވެ. އޭގެ ތެރެއިން 1,373,126,496 (އެއް ބިލިއަން ތިން ސަތޭކަ ހަތްދިހަ ތިން މިިލިއަން އެއް ލައްކަ ސައްބީސް ހާސް ހަތަރު ސަތޭކަ ނުވަދިހަ ހައެއް) ރުފިޔާގެ މުދަލާއި ހިދުމަތް ހޯދުމަށް ހަވާލުކޮށްފައި ވަނީ އާންމު ބީލަމުގެ އުސޫލުން ބޭރުން ކަމަށް ވަނީ ބުނެފަ އެވެ.