ޕޭ ހާމަނައިޒޭޝަންގެ ތެރެއިން މިހާތަނަށް މުސާރަ ބޮޑުވެފައިނުވާ ސިވިލް ސާވިސްގެ މުވައްޒަފުންނާއި، ޖުޑީޝަރީގެ އަދި ކައުންސިލުތަކުގެ ހުރިހާ މުވައްޒަފުންގެ މުސާރަ އަންނަ ނޮވެމްބަރުން ފެށިގެން ބޮޑުވާނެ ކަމަށް ރައީސް ޑރ. މުޙައްމަދު މުޢިއްޒު ވިދާޅުވެއްޖެއެވެ.

"އެކްސް"ގައި ކުރެއްވި ޕޯސްޓެއްގައި ރައީސް ވިދާޅުވީ، މިއަހަރުގެ ރިޔާސީ ބަޔާނުގައި މި ފަރާތްތަކުގެ މުސާރަ މިއަހަރު ބޮޑުވާނެކަމަށް އެމަނިކުފާނު ވިދާޅުވި ކަމަށެވެ. އަދި އެމަނިކުފާނު މީގެ ކުރިން ވެސް ވިދާޅުވި ފަދައިން މިއަހަރު މުސާރަ ބޮޑު ނުވާ ހުރިހާ މުއައްސަސާތަކެއްގެ ހުރިހާ މުވައްޒަފުންގެ މުސާރަ 2026 ގައި ބޮޑުވާނެ ކަމަށް ވެސް ރައީސް ވިދާޅުވިއެވެ.

ރައީސް އެފަދައިން ވިދާޅުވިއިރު، މިނިވަން މުއައްސަސާތަކުގެ ވެރިންނާއި ފަނޑިޔާރުން އަދި ކައުންސިލަރުންގެ މުސާރަތައް މިދިޔަ އަހަރުން ފެށިގެން ވަނީ ބޮޑުވެފައެވެ. އެގޮތުން ސިޓީ ކައުންސިލްތަކުގެ މޭޔަރުންގެ މުސާރަ 46،000 ރުފިޔާއަށް ބޮޑުކޮށްފައިވާއިރު ރަށު ކައުންސިލްތަކުގެ ރައީސުންގެ މުސާރަ ވަނީ 25،000 ރުފިޔާއަށް ބޮޑުކޮށްފައެވެ. އަދި އަތޮޅު ކައުންސިލްތަކުގެ ރައީސުންގެ މުސާރަ ވެސް ވަނީ 33،000 ރުފިޔާއަށް ބޮޑުކޮށްފައެވެ.

މިނިވަން މުއައްސަސާތަކުގެ ރައީސުންގެ މުސާރައިގެ ގޮތުގައި 59،000 ރުފިޔާއަށް ބޮޑުކޮށްފައިވާއިރު، ނައިބުންގެ މުސާރައަށް 55،000 ރުފިޔާވަނީ ކަނޑައަޅާފައެވެ. ޕްރޮސިކިއުޓާ ޖެނަރަލާއި ކޮމިޝަނާ ޖެނެރަލް އޮފް ޓެކްޒޭޝަން އަދި އޮޑިޓާ ޖެނަރަލްގެ މުސާރަ އަކީ 74،000 ރުފިޔާއެވެ.

މީގެ އިތުރުން އުއްތަމަ ފަނޑިޔާރުގެ މުސާރަ ވެސް ބޮޑުކޮށްފައިވާއިރު، އެ މަގާމަށް 91،000ގެ މުސާރައެއް ލިބެއެވެ.