މިއަދު ފައިސާއަށް ޚިޔާނަތްތެރިވަމުން މީހުންނަށް އެ ޖަރީމާ ކިތަންމެ ރީތިކޮށް ދެއްކި ނަމަވެސް ޤިޔާމަތްދުވަހުން އެކަމުގެ ގަދަފަދަ ޢަޒާބާއި އެ މީހަކު ކުރިމަތިލާން ޖެހޭނެ ކަމަށް އަލީ ރަމީޒު ބުނެފިއެވެ.

ދީނީ އިލްމުވެރިން މެދުވެރިކޮށް ދީނާ ގުޅޭގޮތުން އާންމުންނަށް އެކި އެކި މަޢުލޫމާތު ފޯރުކޮށްދެއްވަމުން ގެންދަވާ، އަދި ގިނަ ބައެއްގެ އިހްތިރާމް ލިބިފައިވާ އަލީ ރަމީޒު "ފޭސްބުކް"ގައި ކުރެއްވި ޕޯސްޓެއްގައި ވިދާޅުވީ، ފައިސާއަށް ޚިޔާނަތްތެރިވަމުން ދުނިޔެ މަތީގައި އެ ޖަރީމާ މީސްތަކުންނަށް ކިތަންމެ ރީތިކޮށް ދައްކައިދިނިން ނަމަވެސް، ޤިޔާމަތް ދުވަހުން އެކަމުގެ ގަދަފަދަ ޢާޒާބާ ކުރިމަތިލާން ޖެހޭނެކަން ހަނދާން ކުރަން ޖެހޭ ކަމަށެވެ.

އަދި އެ ދުވަހަކުން ހަމަ ހިލާ ސަލާމަތެއް ނުވާނެ ކަމަށް ވެސް އަލީ ރަމީޒުގެ ޕޯސްޓްގައި ބުންޏެވެ. އަލީ ރަމީޒު މިފަދަ ޕޯސްޓެއް ކޮށްފައިމިވަނީ ދައުލަތުގެ މުދަލާއި ފައިސާއަށް ހިޔާނާތްތެރިވުމުގެ މައްސަލަ ބޮޑުވެފައިވާ ވަގުތެއްގައެވެ.

އެގޮތުން ޚިޔާނާތުގެ އެކި މައްސަލަތަކުގެ ތުހަމަތު އެޅުވިފައިވާ ރަސްމީ ހައިސިއްޔަތު ނަހަމަ ގޮތުގައި ބޭނުންކުރުމުގެ ކުށް ސާބިތުވެ ފެނަކަ ކޯޕަރޭޝަނުގެ ކުރީގެ މެނޭޖިން ޑިރެކްޓަރު އަހްމަދު ސައީދު އިއްޔެ ވަނީ ހަތަރު އަހަރަށް ޖަލަށް ލާން ޙުކުމްކޮށްފައެވެ.

ސައީދުގެ މައްޗަށް ދައުވާކުރީ ބްލޭޒަން އިންކް ކިޔާ ކުންފުންޏަކާއެކު ފެނަކައިން ހެދި އެއްބަސްވުމެއްގެ މައްސަލައިގަ އެވެ. ދައުވާގައިވާ ގޮތުން އެ ކުންފުންޏާ ހަވާލުކުރި މަސައްކަތް އެކީ ނުނިންމަނީސް، އަދި މަސައްކަތް ފުރިހަމަކުރިކަން ކަށަވަރުނުކޮށް، އެ މަސައްކަތަށް ދޭންޖެހޭ ފައިސާ ފެނަކައިން ބްލޭޒަން އިންކަށް ދޫކޮށްފައިވާ ކަމަށެވެ. 

މި ފައިސާ ދޫކުރުމުގެ ސަބަބުން ފެނަކައަށް 848,000ރ (އަށް ލައްކަ ސާޅީސް އަށް ހާސް ރުފިޔާ) ގެ ގެއްލުމެއް ލިބިފައިވެ އެވެ. އެގޮތަށް މަސައްކަތް ނުނިމެނީސް ފައިސާ ދޫކުރުމަކީ އެ ކުންފުންޏަށް ނާޖާއިޒު މަންފާ ހޯދައިދިނުމަށް ހިންގާފައިވާ އަމަލަކަށްވާތީ އެ މައްސަލާގައި ދައުވާކުރީ 2024 ވަނަ އަހަރުގެ ޑިސެމްބަރު މަހުގެ 26 ވަނަ ދުވަހު އެވެ.

ކޯޓުން ވަނީ އެ މައްސަލާގައި ސައީދު ކުށްވެރިވާ ކަމަށް ކަނޑައަޅާފަ އެވެ. އަދި އަދަބު ކަނޑައެޅީ ހަތަރު އަހަރަށް ޖަލަށް ލުމަށެވެ. މީ ޖިނާއަތުގެ ހަތަރުވަނަ ދަރަޖަގެ ކުށެކެވެ.

އޭސީސީން މިހާރުވެސް ދަނީ ސައީދަށް ތުހުމަތުވާ ކޮރަޕްޝަނުގެ ގިނަ މައްސަލަތަކެއް ބަލަމުންނެވެ. އަދި މިދިޔަ ބުރާސްފަތި ދުވަހުގެ ރޭ އޮޑިޓަރު ޖެނެރަލް ނެރުއްވި ފެނަކައިގެ ރިޕޯޓްގައި ސައީދުގެ އެމްޑީ ކަމުގައި ހިންގި 2.2 ބިލިއަންގެ ބޮޑު ހިޔާނާތް ވަނީ ހާމަވެފަ އެވެ.