ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު، ތ. އަތޮޅުގެ ރަށްތަކަށް ކުރައްވާ ރަސްމީ ދަތުރުފުޅުގެ ތެރެއިން، ތ. ހިރިލަންދޫގެ މަގުތައް ޒަމާނީ ފެންވަރަށް ތަރައްޤީ ކުރުމުގެ ޢަމަލީ މަސައްކަތް އިއްޔެ ފައްޓަވައިދެއްވައިފިއެވެ. މި މަސައްކަތް ޢަމަލީގޮތުން ފައްޓަވައިދެއްވީ މިނިސްޓަރ އޮފް ކޮންސްޓްރަކްޝަން، ހައުސިންގ އެންޑް އިންފްރާސްޓްރަކްޗަރ، ޑރ. ޢަބްދުﷲ މުއްޠަލިބް އެވެ.

މި ރަސްމިއްޔާތުގައި ރޯޑް ޑިވެލޮޕްމަންޓް ކޯޕަރޭޝަން (އާރްޑީސީ) ލިމިޓެޑްގެ ފަރާތުން މެނޭޖިންގ ޑިރެކްޓަރ އިބްރާހީމް ނަޡީމް ވެސް ބައިވެރިވެވަޑައިގެންނެވިއެވެ. ހިރިލަންދޫގެ މަގުތައް ޒަމާނީ ފެންވަރަށް ތަރައްޤީ ކުރުމުގެ މި މަޝްރޫޢަކީ ރަށުގެ ރައްޔިތުންނަށް ދިގުދެމިގެންދާނެ ފައިދާތަކެއް ލިބިގެންދާނެ މުހިންމު މަޝްރޫޢެކެވެ.

މި މަސައްކަތަށް އެވޯޑްކުރެވުނު އަގަކީ 70,506,326.88 ފައިސާ އެވެ. އަދި މި މަސައްކަތް ނިންމުމަށް ކަނޑައަޅާފައިވާ މުއްދަތަކީ 730 ދުވަސް (ދެ އަހަރު) އެވެ. މި މަޝްރޫޢުގެ ދަށުން ހިރިލަންދޫގެ މަގުތައް ތަރައްޤީކޮށް، ރައްޔިތުންނަށް ފަސޭހަކަމާއެކު ދަތުރުފަތުރުކުރެވޭނެ ގޮތްތަކެއް ހަމަޖެހިގެންދާނެއެވެ.