ކޮންމެ ބްރޮޑްކާސްޓަރެއްގެ ޢަޒުމަކަށް ވާންވާނީ އިސްލާމީ އޮނިގަނޑަށް ފެތޭ ޕްރޮގްރާމުތައް އުފެއްދުން: ރައީސް
ކޮންމެ ބްރޮޑްކާސްޓަރެއްގެ ޢަޒުމަކަށް ވާންވާނީ އިސްލާމީ އޮނިގަނޑަށް ފެތޭ ޕްރޮގްރާމުތައް އުފެއްދުންކަމަށް ރައީސް ޑރ. މުޙައްމަދު މުޢިއްޒު ވިދާޅުވެއްޖެއެވެ.
"އެކްސް"ގައި ކުރެއްވި ޕޯސްޓެއްގައި ރައީސް ވިދާޅުވީ، ޚަބަރާއި މަޢުލޫމާތާއި މުނިފޫހިފިލުވުން ހިމެނިގެން، ބްރޯޑްކާސްޓް ކުރުމުގައި ކުރެވޭ ހުރިހާ ކަންކަމަކީވެސް ވަރަށް ހީވާގިކަމާއި ޒިންމާދާރުކަމާއެކު ދޭން ޖެހޭ ޚިދުމަތެއް ކަމަށެވެ.
އަދި ކޮންމެ ބްރޯޑްކާސްޓަރެއްގެވެސް ޢަޒުމަކަށް ވާން ވާނީ، އިސްލާމީ އޮނިގަނޑަށް ފެތޭ، ދިވެހިވަންތަ، މަންފާހުރި މަޢުލޫމާތާއި ޕްރޮގްރާމްތައް އުފައްދައި ގެނެސްދިނުން ކަމަށާއި، ޤައުމަށް ރީތި ނަން ހޯދައިދިނުމުގެ ބައިވެރިއަކަށް ވާންވާނެ ކަމަށް ވެސް ރައީސް ވިދާޅުވިއެވެ.
ރާއްޖޭގައި ބްރޮޑްކާސްޓަރުންގެ ދުވަހެއް ފާހަގަކުރަން ފަށައިފައިވަނީ 2012 ވަނަ އަހަރުއެވެ. އެގޮތުން އެ ދުވަހަކީ 4 އޮކްޓޯބަރު ކަމުގައި ކަނޑައަޅައިފައިވަނީ، އެ ދުވަހަކީ ރާއްޖޭގެ އެންމެ ފުރަތަމަ ރޭޑިއޯ، އޭރުގެ ނަމުންނަމަ މާލޭ ރޭޑިއޯ އުފަންވިތާ 50 އަހަރު ފުރުނު ދުވަސްކަމުގައިވާތީއެވެ. އެ ރޭޑިއޯއިން ބްރޮޑްކާސްޓިން ފަށައިފައިވަނީ 4 އޮކްޓޯބަރު 1962 ވަނަ އަހަރުއެވެ.
Advertisement
This content is created and paid for by advertisers and does not involve Voice Journalists
