ކުރީގެ ރައީސް އިބްރާހިމް މުޙައްމަދު ސޯލިޙުގެ ޒާއަމަތުގައި ޤައުމަށް "ގެނެސްދެއްވި އިސްލާޙަކީ" ދަރަނީގެ ރަންޒަމާނަކާއި، ކުންފުނިތައް ދަރުވާލުމުގެ ޙިކުމަތްތެރިކާއި އަދި ސުމާރެއް ނުބަލައި ޗާޕުކޮށް ދިވެހި ރުފިޔާގެ އަގު ތާއަބަދަށް ވައްޓާލުން ކަމަށް އިޤްތިސާދީ ތަރައްގީއާ ބެހޭ ވަޒީރު މުޙައްމަދު ސަޢީދު ވިދާޅުވެއްޖެއެވެ.

ރޭ އިދިކޮޅު އެމްޑީޕީން ބޭއްވި އެއްވުމުގައި ކުރީގެ ރައީސް ސޯލިޙު ހުންނެވި ފޮޓޯއެއް ހިއްސާކުރައްވަމުން "އެކްސް"ގައި ކުރެއްވި ޕޯސްޓެއްގައި ވަޒީރު ވަނީ ރައީސް ސޯލިޙަށް ވަރަށް ބޮޑަށް ފާޑު ވިދާޅުވެފައެވެ.

އެގޮތުން އެމަނިކުފާނުގެ ވެރިކަމުގައި ހުންނެވިއިރު، ވެރިކަމެއް ކުރަން ފަސް އަހަރު ވެސް މާ ދިގުކަމުގައި ވިދާޅުވިކަން ފާހަގަކުރައްވަމުން، ވަޒީރު ވަނީ 2018 އިން 2023 އަށް އޭރުގެ ޕީޕީއެމްގެ އޮފީސް ތަޅުއަޅުވައި، ކުރީގެ ރައީސް އަދި އޭރުގެ އިދިކޮޅު ލީޑަރު ރައީސް ޔާމީން ޖަލުގައި ބޭންދެވިކަމަށް ވިދާޅުވެފައެވެ.

ވަޒީރު ވަނީ މިއަދު ރައީސް ސޯލިޙް، ފުލުހުންގެ ބެރިކޭޑުގެ ކުރިމަތީގައި އިންނެވި މި އަންނަ 2028 ވަނަ އަހަރުގެ ކެނޑިޑެންސީއަށްޓަކައިތޯ އާއި އެމްޑީޕީގައި ވެރިކަމަށް ކުފޫހަމަވާ އެހެންމީހަކު ނެތީތޯ ސުވާލުއުފައްދަވައިފައެވެ.

އަދި މިހާރު ވެސް ރާއްޖޭގެ ވެރިކަން ކުރެއްވި ކަމަށްޓަކައި މަހު މުސާރައިން ލައްކައިން މުސާރަ ނަންގަވައި، ހަށިފާރައަށް ވެސް ރައްޔިތުންގެ ޓެކްސް ފައިސާއިން އެމަނިކުފާނަށް ޚަރަދުކުރާ ކަމަށް ވަޒީރު ވިދާޅުވިއެވެ.

އެއާއެކު ވަޒީރު ވަނީ ނިމުނު އެމްޑީޕީގެ ވެރިކަމުގައި ރާއްޖެއަށް "މާމޮޅު އިސްލާހުތަކެއް" ގެނެވެނުވީތޯ ސުވާލުއުފައްދަވައި، އެ ވެރިކަމުގައި ރާއްޖެއަށް "ގެނެސްދެއްވި އިސްލާޙަކީ" ދަރަނީގެ ރަންޒަމާނަކާއި، ކުންފުނިތައް ދަރުވާލުމުގެ ޙިކުމަތްތެރިކާއި އަދި ސުމާރެއް ނުބަލައި ޗާޕުކޮށް ދިވެހި ރުފިޔާގެއަގު ތާއަބަދަށް ވައްޓާލުން ކަމަށް ވިދާޅުވެފައެވެ.

ވަޒީރު ސައީދު އެފަދައިން ވިދާޅުވިއިރު، ރޭ އެމްޑީޕީން ބޭއްވި މުޒާހަރާގައި ރައީސް ސޯލިޙް އާއި އަދާލަތުގެ ޕާޓީގެ ރައީސް ޝެއިޚް އިމްރާން އަބްދުﷲ އާއި އެމްޑީޕީގެ އިސްވެރިން ވަނީ ބައިވެރިވެވަޑައިގަންނަވައިފައެވެ. އެ މުޒާހަރާގައި އެތައް ސަތޭކަ ބަޔަކު ބައިވެރިވިއިރު، އެ މީހުން ވަނީ ރައީސް މުޢިއްޒުގެ އިސްތިއުފާއަށް ގޮވާފައެވެ. 

އަދި އެ މުޒަހަރާ ކޮންޓްރޯލްކުރުމަށް ފުލުހުން ކުރި މަސައްކަތަށް ހުރަސްއެޅުމުގެ ސަބަބުން މަދުވެގެން ހަ މީހަކު ހައްޔަރުކުރިކަމަށް އެމްޑީޕީން މިއަދު ބުނެފައިވެއެވެ. އޭގެ ތެރޭގައި ދާންދޫ ދާއިރާގެ ކުރީގެ މެންބަރު ޔައުގޫބް އަބްދުﷲ އަދި މާފުށީ ކައުންސިލުގެ ރައީސް ހަސަން ސޮލާޙު ވެސް ވަނީ ހައްޔަރުކޮށްފައެވެ.