ވަގަށް އަނބުތަކެއް ބިންކަމުގެ ތުހުމަތުގައި ދެމީހަކު ހައްޔަރުކޮށް ޝަރީއަތަށް ހާޒިރުކޮށްފިއެވެ.

ކްރިމިނަލް ކޯޓުގައި ކުރިއަށްދިޔަ ޝަރީއަތުގެ މަޖިލީހުގައި ވައްކަންކުރިކަމުގެ ދައުވާ އުފުލާފައިވަނީ، ހދ.ކުޅުދުއްފުށީ ސިޓީއަށް ނިސްބަތްވާ އުމުރުން 37 އަހަރުގެ އަހުމަދު އަލީ އާއި، ގދ. ރަތަފަންދޫ، ނީލްވިލާގޭ އުމުރުން 33 އަހަރުގެ މުހައްމަދު ސުހައިލަށެވެ. ޝަރީއަތުގައި އެމީހުންނާ ސުވާލުކުރުމުން އެމީހުން ބުނެފައިވަނީ، އެމީހުން އެކަންކުރީ މަގުމައްޗަށް ވާގޮތަށް އަތުޖެހޭ ހިސާބުގައި ހުންނަ ގަހުން އަނބު ބިނުމަކީ މަނާކަމެއްކަން ނޭނގޭތީކަމަށެވެ. އެގޮތުން އަނބު ބިނީ ބިންމަތީހުރެގެންކަމަށް އެމީހުން ވަނީ ބުނެފައެވެ. އެމީހުން ބުނީ އެގަހުން ބިނީ ޖުމްލަ ހަތަރު އަނބު ކަމަށެވެ.

މި މައްސަލާގައި ފުލުހުންގެ ފަރާތުން ހެކި ހުށަހަޅާފައިވާއިރު، ފުލުހުން ދިޔައިރު ދެމީހުންގެ ތެރެއިން އެކަކު އަނބުގަހުގައި އެވަގުތު އޮތްކަމަށް ބަޔާނުގައި ވެއެވެ. އަދި އަނެކަކު ހުރީ އަނބު ހޮވާށެވެ.

ކޯޓުގެ ރެކޯޑުތަކުން އެނގޭގޮތުގައި މި ދެ މީހުންނަކީވެސް ކުށުގެ ރެކޯޑް އޮންނަ ދެމީހުންނެވެ. ކްރިމިނަލް ކޯޓުން ވަނީ އެމީހުން ބަންދުގައި ބެހެއްޓުމަށް މުއްދަތުޖަހާފައެވެ.

މާލޭގެ އެކި ސަރަހައްދުގައި ހުންނަ ގަސްގަހުން އަނބު ބިނުމަކީ ވަރަށް އާއްމު ކަމެކެވެ. އެގޮތުން އެފަދަ މައްސަލަތަކުގައި މީގެ ކުރިންވެސް ޝަރިއަތްކޮށްފައި އެބަހުއްޓެވެ. އެގޮތުން ޖުވެނިއަލް ކޯޓުގެ އަނބުގަހުން އަނބު ބިން މައްސަލާގައި މިއަހަރުގެ ފެބުރުއަރީމަހު މީހަކު ހައްޔަރުކުރިއެވެ. އެއީ އެމީހާ ހައްޔަރުކުރި 64 ވަނަ ފަހަރުކަން ކޯޓުގެ ރެކޯޑުތަކުން އެނގެން އޮވެއެވެ.