ދާއިމީ ބަލިތަކަށް ފަރުވާކުރާ ފަރާތްތަކަށް އުމުރުން 65 އަހަރު ފުރުމުގެ ކުރިން ޕެންޝަން ފައިސާ ލިބޭނެ މަގު ފަހިކުރުމަށް ޕެންޝަނާ ބެހޭ ގާނޫނަށް މިއަދު އިސްލާހެއް ހުށަހަޅައިފިއެވެ.
އިދިކޮޅު އެމްޑީޕީއަށް ނިސްބަތްވެވަޑައިގަންނަވާ ގަލޮޅު އުތުރު ދާއިރާގެ މެންބަރު މުހައްމަދު އިބްރާހީމް (ކުޑޫ) ހުށަހެޅުއްވި އިސްލާޙުގެ ބޭނުމަކީ އެފަދަ ހާލަތްތަކުގައިވާ ފަރާތްތަކަށް އަވަހަށް މާލީ އެހީތެރިކަން ފޯރުކޮށްދީ، ދިރިއުޅުމުގެ ބުރަ ކުޑަކޮށް، އެ ފައިސާ ހޯދުމުގެ އިޖުރާއަތުތައް ފަސޭހަކުރުމަށް ބަދަލުތަކެއް ގެނައުން ކަމަށް ބިލާ ގުޅޭގޮތުން ވާހަކަދައްކަވަމުން އޭނާ ވަނީ ވިދާޅުވެފައެވެ.
އަދި ޓާމިނަލް އިލްނެސް" ތަހައްމަލު ކުރަންޖެހޭ މީހެއް ކަމަށް ކަށަވަރު ކޮށްދޭ މެޑިކަލް ސެޓްފިކެޓެއް ހުށަހަޅައިފިނަމަ، އެ މީހެއްގެ އުމުރާއި މަސައްކަތްކުރި އަހަރުތަކަށް ބެލުމެއް ނެތި ޕެންޝަންގެ ފައިދާ ވީހާ ވެސް އަވަހަށް ލިބޭނެ ގޮތް ހެދުމަކީ މި އިސްލާހުގެ މުހިންމު ބޭނުމެއް ކަމަށް ވެސް ކުޑޫ ވިދާޅުވިއެވެ.
މެންބަރު ކުޑޫ ވިދާޅުވި ގޮތުގައި، މިހާރު އަމަލުކުރަމުން އަންނަ ޕެންޝަނާ ބެހޭ ގާނޫނުގައި ދާއިމީ ބަލި ތަހައްމަލުކުރާ މީހުންނާ ގުޅޭ ގޮތުން ސާފުކޮށް ބަޔާންކޮށްފައިވާ މާއްދާތަކެއް ހިމެނިފައެއް ނުވެއެވެ. އަދި "މެޑިކަލް ޕްރޮގްނޯސިސް" އަށް ބިނާކޮށް ޕެންޝަން އަވަހަށް ލިބޭނެ އެއްވެސް ނިޒާމެއް މިހާރަކު ނެތް ކަމަށް ވެސް މެންބަރު ވިދާޅުވިއެވެ.
އަދި އެ ބިލާއެކު އެފަދަ ބަލިމީހުންގެ ހާލަތު ވަޒަންކުރުމަށް ޕެންޝަން އޮފީހުން މެޑިކަލް ސްޕެޝަލިސްޓުންގެ ޓީމެއް އެކުލަވާލާނެ ކަމަށާއި، އެ ފައިސާ ހޯދަން ހުށަހަޅާ ތާރީހުން ފެށިގެން 30 ދުވަހުގެ ތެރޭގައި ފައިސާ ދޫކުރަން ޖެހޭނެ ގޮތަށް ލާޒިމުކުރަން އިސްލާހުގައި ހިމަނައިފައިވެއެވެ.
Advertisement
This content is created and paid for by advertisers and does not involve Voice Journalists
