އދ. ދަނގެތީގެ ބިން ހިއްކުން ކުރިޔަށްގެންދާނީ ރައްޔިތުންގެ ވިސްނުމާއި އެއްގޮތަށް ކަމަށް ރައީސް ޑރ. މުޙައްމަދު މުޢިއްޒު ވިދާޅުވެއްޖެއެވެ.
އދ. ދަނގެއްޗަށް ވަޑައިގެން އެ ރަށުގެ ރައްޔިތުންނާއި ބައްދަލުކުރައްވައި ދެއްކެވި ވާހަކަފުޅުގައި ރައީސް ވިދާޅުވީ، އެ ރަށަށް ބޭނުންވާ މުހިންމު ގިނަ ކަންކަމެއްގެ މަަސައްކަތް މިއަދު ފެށިފައިވާކަމަށާއި، އެމަނިކުފާނު އެ ރަށަށް ވަޑައިގެންނެވީ ވެސް އެމަނިކުފާނުގެ ވައުދުފުޅާ އެއްގޮތަށް އެ މަސައްކަތްތައް ފައްޓަވައިދެއްވުމަށްކަމަށެވެ.
އެގޮތުން އެ ރަށުގެ ސްކޫލްގައި 10 ކްލާސްރޫމާއި މަލްޓި ޕާޕަސް ހޯލް އެޅުމުގެ މަޝްރޫއަކީ ވަރަށް ބޮޑަށް ބޭނުންވެފައި އޮތް މަޝްރޫއެއްކަން ފާހަގަކުރައްވަމުން ރައީސް ވިދާޅުވީ، ވީ އެ މަސައްކަތް ނިމުމުން ރަށުގެ ސްކޫލަށް ވަރަށް ބޮޑު ކުރިއެރުމެއް ލިބިޭނެ ކަމަށާއި، ދަރިވަރުންނާއި ޓީޗަރުންނާއި ބެލެނިވެރިންނަށް ވަރަށް ބޮޑު ހިތްހަމަޖެހުމެއް ލިބޭނެ ކަމަށެވެ.
އަދި އެ މަސައްކަތްތައް މި އަހަރުގެ ތެރޭގައި ފައްޓަވައި، ވަރަށް ބާރަށް ކުރިޔަށްގެންދަވާނެ ކަމަށް ވެސް ރައީސް ވިދާޅުވިއެވެ.
މީގެ އިތިުރުން އެ ރަށުގެ ބިން ހިއްކުމާއި ބަނދަރުގެ މަޝްރޫއާއި ގުޅިގެން ރައީސް ވިދާޅުވީ، އެ މަޝްރޫއަކީ ރަށުގެ ޒުވާނުންނަށް ގޯތި ދިނުން ނޫނީ ގެދޮރުގެ މައްސަލަ ފަދަ ހުރިހާ ކަމަކަށް ލިބޭނެ ޙައްލެއް ކަމަށެވެ. އެގޮތުން އެ އެ މަޝްރޫއު ކުރިއަށް ގެންދާނީ ރައްޔިތުންގެ ވިސްނުމާ އެއްގޮތަށް ކަމަށާއި، އެއާއެކީގައި އެ ރަށުގެ ގޮނޑުދޮށް ހިމާޔަތްކުރުމުގެ މަޝްރޫއަކީ ވެސް ވަރަށް މުހިންމު މަޝްރޫއެއް ކަމުގައި ރައީސް ވިދާޅުވިއެވެ.
އިރާދަކުރެއްވިއްޔާ މި ތިން ކަންތައް، ބަނދަރާއި ބިން ހިއްކުމާއި ގޮނޑުދޮށް ހިމާޔަތް ކުރުން އެމްޓީސީސީން ކުރިއަށް ގެންދާނީ ރައްޔިތުން ބޭނުންވާ ގޮތަށް. އިރާދަކުރެއްވިއްޔާ ވަރަށް އިސްކަން ދީގެން މަސައްކަތް ކުރިއަށް ދާނެ
ރައީސް ޑރ. މުޙައްމަދު މުޢިއްޒު
މިއަދުގެ ދަތުރުފުޅުގައި ރައީސް ވަނީ ކައުންސިލާއި، އ.ތ.މ ކޮމިޓީ އަދި ރަށުގެ ބައެއް މުއައްސަސާތަކުގެ އިސްވެރިންނާއި ވެސް ބައްދަލުކުރައްވައިފައެވެ.
މި ބައްދަލުކުރެއްވުމުގައި ކައުންސިލަރުން ދެއްކެވި ވާހަކަފުޅުގައި ރަށުގެ ތަރައްޤީއަށް އެންމެ ބޭނުންވާ ކަންކަން ވަނީ ހިއްސާކުރައްވާފައެވެ. މިގޮތުން ކައުންސިލުން ވަނީ، ރަށު ބަނދަރުގެ މަސައްކަތް ކުރިއަށް ގެންދެވުމުގައި ރައްޔިތުން ބޭނުންވާގޮތަށް ދިގުމުއްދަތުގައި ބޭނުންކުރެވޭނެ ގޮތަށް އެ ބަނދަރު ހައްދަވައިދެއްވުމާއި ޞިއްޙީ މަރުކަޒުގެ އެކްސްޓެންޝަން އިމާރާތުގެ މަސައްކަތް އަވަސްކޮށްދިނުމުގެ އިތުރުން ރަށުން ބިން ހޯދުމަށް ރައްޔިތުން އެދޭކަމަށާއި ރަށުން ބިން ހިއްކަވައިދެއްވުމަށާއި، ރަށުގައި ބޭންކް އޮފް މޯލްޑިވްސްގެ ބްރާންޗެއް ގާއިމުކޮށްދެއްވައި، ރަށުގައި ޑޮލަރު އޭ.ޓީ.އެމް. އެއް ބަހައްޓަވައިދެއްވުމާއި، ރަށްގިރުން ހައްލުކޮށްދެއްވުމަށް އެދިވަޑައިގެންފައެވެ.
އަދި ރަށުގެ ފުޓްބޯޅަ ދަނޑު ޒަމާނީ ފެންވަރަށް ތަރައްޤީކޮށްދެއްވުމަށްވެސް ކައުންސިލަރުން އެދިވަޑަގެންނެވިއެވެ. މީގެއިތުރުން ސްކޫލުގެ އިމާރާތުގެ ހާލަތު ރަނގަޅުކުރުމަށް، ސްކޫލަށް އިތުރު އިމާރާތާއި ކްލާސްރޫމްތައް ބޭނުންވާކަން ކައުންސިލްގެ ފަރާތުން ފާހަގަކުރެއްވިއެވެ.
މި ބައްދަލުކުރެއްވުމުގައި ރައީސުލްޖުމްހޫރިއްޔާ ވަނީ ކައުންސިލުން ފާހަގަކުރެއްވި ކަންކަން ބައްލަވާނެކަމުގައި ވިދާޅުވެފައެވެ. އަދި ބައްދަލަކުރެއްވުމުގައި ބައިވެރިވެވަޑައިގެންނެވި ވަޒީރުންނާއި، ދައުލަތުގެ ކުންފުނިތަކުގެ ވެރިން މެދުވެރިކުރައްވައި އެމަނިކުފާނު ވަނީ ރަށުގައި ކުރިއަށްދާ މަޝްރޫޢުތަކުގެ އަދާހަމަ މަޢުލޫމާތު ޙިއްޞާކުރައްވާފައެވެ.
Advertisement
This content is created and paid for by advertisers and does not involve Voice Journalists
