މިނިވަން މުއައްސަސާތަކާއި ސަރުކާރުގެ ކުންފުނިތަކުގެ އިސްވެރިންގެ މާލީ ބަޔާން ހުށަހަޅަންޖެހޭ ގޮތަށް ދެ ޤާނޫނަކަށް އިސްލާޙު ގެނައުމަށް މަޖިލީހަށް ހުށަހަޅައިފިއެވެ.

ގަލޮޅު އުތުރު ދާއިރާގެ މެންބަރު މުޙައްމަދު އިބްރާހިމް (ކުޑޫ) ވަކިވަކިން އިސްލާޙު ގެނައުމަށް ހުށަހަޅުއްވައިފައިވަނީ 2013/3، ދައުލަތުގެ ވިޔަފާރި ތަންތަން ޕްރަވަޓައިޒްކުރުމާއި ކޯޕަރަޓައިޒްކުރުމާއި އަދި މޮނިޓާކޮށް އިވެލުއޭޓްކުރުމުގެ ޤާނޫނަށާއި، 2007/4، އޮޑިޓްގެ ޤާނޫނަށެވެ.

އެގޮތުން އެ ޤާނުނުތަކަށް އިސްލާޙު ހުށަހެޅުއްވި ސަބަބެއް ކަމުގައި ކުޑޫ ވިދާޅުވީ، މިނިވަން މުސްތަގިއްލު ކޮމިޝަންތަކުގެ މެންބަރުންނާއި އިސް މަޤާމުތައް ފުރުއްވަވާ ބޭފުޅުންގެ މުދަލާއި ފައިސާގެ ބަޔާން ހާމަކުރުން ލާޒިމްކޮށްފައިނުވާތީ، އެ ބޭފުޅުން ވެސް ޖަވާބުދާރީކުރެވޭނެ އުސޫލެއް ގާއިމްކުރުމެވެ.

މި އިސްލާހުތަކުގެ ތެރެއިން އޮޑިޓުގެ ޤާނޫނަށް ގެނެވޭ އިސްލާޙުގައި ވަނީ، މިނިވަން މުއައްސަސާތަކާއި އިދާރާތަކާއި މަޤާމުތަކަކީ ޤާނޫނު އަސާސީން ނުވަތަ ޤާނޫނުތަކުން އުފައްދާފައިވާ ތަންތަނާއި މަޤާމުތަކަށް ވާއިރު، އެތަންތަނާ ގުޅޭ އުސޫލުތައް ހުރީ ޤާނޫނު އަސާސީ އާއި ތަފާތު އެކިއެކި ޤާނޫނުތަކުގައެވެ. އެހެންކަމުން ޤާނޫނު އަސާސީގެ މާއްދާތަކަށާއި އެކިއެކި ޤާނޫނުތަކަށް އިސްލާޙު ހުށަހެޅުމުގެ ބަދަލުގައި އެއް ޤާނޫނަކުން އެކަން ބަޔާންކުރުމަށް އެ އިސްލާހު ހުށަހަޅުއްވަނީ ކަމަށް ފާހަގަކުރައްވައިފައިވެއެވެ.

އެގޮތުން އެ އިސްލާޙުގައި ޖުމްލަ 26 މިނިވަން މުއައްސަސާ އަދި އިދާރާތަކެއް ހިމަނުއްވައިފައިވެއެވެ.

މީގެ އިތުރުން ދައުލަތުގެ ވިޔަފާރި ތަންތަން ޕްޕްރަވަޓައިޒްކުރުމާއި ކޯޕަރަޓައިޒްކުރުމާއި އަދި މޮނިޓާކޮށް އިވެލުއޭޓްކުރުމުގެ ގާނޫނުގެ އިސްލާހު ކުޑޫ ފާހަގަކުރެއްވީ، އުމްރާނީ ތަރައްގީގެ ބޮޑެތި މަޝްރޫއުތައް ހިންގުމާއި އަސާސީ ޚިދުމަތްތައް ޤާއިމްކުރުމާއި ފޯރުކޮށްދިނުމުގެ މަސައްކަތް ކުރުމުގެ އިތުރުން ދައުލަތުގެ މުހިންމު ބައެއް އެސެޓުތައް މެނޭޖުކުރަނީ ސަރުކާރު ކުންފުނިތަކުގެ އިސްވެރިން ކަމަށެވެ.

މި ދެ ބިލުގައި ވެސް މަޤާމުތަކާ ހަވާލުވާ ބޭފުޅުން ހަވާލުވާތާ ފުރަތަމަ 30 ދުވަހުގެތެރޭ އެ ފަރާތެއްގެ މިލްކިއްޔާތުގައިވާ ފައިސާއާއި މުދަލުގެ ތަފްސީލުތައް ހުށަހަޅަންޖެހޭ ގޮތް ހެދުމަށާއި، މަޤާމުތަކާ ހަވާލުވާތާ އެއް އަހަރު ދުވަސް ފާއިތުވާތާ ތިން މަހުގެ ތެރޭ ލައިސަންސް ލިބިފައިވާ އޮޑިޓަރަކު އޮޑިޓްކޮށްފައިވާ މާލީ ބަޔާނެއް ހުށަހެޅުމަށް ހިމަނުއްވައިފައިވެއެވެ.

އަދި މާލީ ބަޔާން ބަޔާންކޮށްފައިވާ މުއްދަތުގައި ހުށަނާޅައިފިނަމަ 5،000 ރުފިޔާއިން ޖޫރިމަނާކުރަން ވެސް މި ދެ ބިލުގައި ވެސް ކުޑޫ ވަނީ ހިމަނުއްވައިފައެވެ.