ރައްޔިތުންގެ މަޖިލީހުގެ މި ދައުރަށް ސަރުކާރުން 27 ބިލެއް ހުށައަޅަން ނިންމާފައިވާ ކަމަށް ރައީސުލްޖުމްހޫރިއްޔާ ޑރ. މުހައްމަދު މުޢިއްޒު މިރޭ ވިދާޅުވެއްޖެ އެވެ.

އދ އަތޮޅުގެ މީހުން ދިރިއުޅޭ 10 ރަށަކަށް އިއްޔެ ފެއްޓެވި ދަތުރުފުޅުގައި އަށް ވަނަ ރަށެއްގެ ގޮތުން މަހިބަދޫއަށް ވަޑައިގެން އެ ރަށުގެ ރައްޔިތުންނާއި ބައްދަލު ކުރައްވާ ވާހަކަފުޅު ދައްކަވަމުން ރައީސް ވިދާޅުވީ މަޖިލީހުގެ ހިނގަމުންދާ ދައުރަށް 27 ބިލެއް ހުށައަޅަން ނިންމާފައިވާ ކަމަށެވެ.

އޭގެ ތެރޭގައި މުހިންމު ބިލްތަކެއް ހުރިކަން ފާހަގަ ކުރެއްވި އެވެ. އެންމެ މުހިންމު އެއް ބިލަކަށް ފާހަގަ ކުރެއްވީ ރިޔާސީ އިންތިހާބާއި ރައްޔިތުންގެ މަޖިލީހުގެ އިންތިހާބު އެއްކޮށްލުމާއި ގުޅޭ ބިލެވެ. ދެ އިންތިހާބު އެެއްކޮށްލުމަކީ ހަރަދުގެ ގޮތުންނާއި އެ ނޫން ގޮތްގޮތުން ވެސް މުހިންމު ކަމެއް ކަމުގައި ރައީސް ވިދާޅުވެ އެވެ.

މީގެ އިތުރުން އެމަނިކުފާނު ވިދާޅުވީ އެންމެ އިސް އެއް ސިޔާސަތަކީ ޚިޔާނާތާއި ވައްކަމަށް އޮތް މަގު ބަންދު ކުރުމެވެ. އެގޮތުން ކޮރަޕްޝަން ހުއްޓުވުމަށް ގާނޫނަށް ގެންނަން ޖެހޭ ބަދަލުތައް ގެންނަވާނެ ކަމަށް ވިދާޅުވި އެވެ.