ހަޅުތާލު ހުއްޓާލުމަށް ފަހު ބަންދުގައި ތިބި މީހުން ކާން ފަށައިފި
މި މަހުގެ ތިންވަނަ ދުވަހުގެ ރޭ އެމްޑީޕީ މުޒާހަރާއިން ހައްޔަރުކުރި މީހުން ފެށި ބަނޑުހައިހޫނުކަމުގެ ހަޅުތާލު ހުއްޓާލުމަށް ފަހު މިރޭ ކާން ފަށާފައިވާ ކަމަށް ފުލުހުން މިރޭ ބުނެފި އެވެ.
ފުލުހުން މިރޭ ފުރަތަމަ ބުނީ އެމްޑީޕީ މުޒާހަރާއިން ހައްޔަރުކުރި މީހުން ބަނޑުހައިހޫނުކަމުގެ ހަޅުތާލެއް ކުރަމުންދާ ކަމަށެވެ. އަދި އެކަން ޕްރޮފެޝަނަލް ސްޓޭންޑާސް ކޮމާންޑުން މޮނިޓަރު ކުރަމުންދާ ކަމަށެވެ. އެ މައުލޫމާތު ނެޝަނަލް އިންޓަގްރިޓީ ކޮމިޝަނާއި ހިއުމަންރައިޓްސް ކޮމިޝަންގެ ސަމާލު ކަމަށް ގެނެސްފައިވާ ކަމަށް ވަނީ ބުނެފަ އެވެ.
އެމްޑީޕީން ވެސް ވަނީ އެ މީހުން ބަނޑުހައިހޫނުކަމުގެ ހަޅުތާލެއް ކުރަން ފެށިކަން ހާމަކޮށްފަ އެވެ.
ނަމަވެސް ފުލުހުން ދެންމެ ބުނީ އެ މީހުން މިހާރު ކާން ފަށާފައިވާ ކަމަށެވެ. ބަނޑުހައިހޫނުކަމުގެ ހަޅުތާލު ހުއްޓާލި ސަބަބެއް ނުބުނެ އެވެ.
ހުކުރު ދުވަހުގެ ރޭގެ މުޒާހަރާއިން ހައްޔަރުކުރި މީހުންގެ ތެރެއިން ބަންދުގައި ތިބީ ހަ މީހެކެވެ. އޭގެ ތެރޭގައި މަޖިލީހުގެ ކުރީގެ ދެ މެންބަރުންނާއި މާފުށީ ކައުންސިލްގެ ރައީސް ވެސް ހިމެނެ އެވެ.
Advertisement
This content is created and paid for by advertisers and does not involve Voice Journalists
