ގެދޮރުވެރިޔާގެ ފްލެޓްތަކުގެ ތެރެއިން ބައެއް ފްލެޓްތަކެއް ވިއްކާލަން އުޅޭކަމަށް ބުނެ އިދިކޮޅު އެމްޑީޕީން މަޖިލީހަށް ހުށަހެޅި ކުއްލި މައްސަލަ އެޖެންޑާނުކޮށް ބޭރުކޮށްފިއެވެ.

ކެންދޫ ދާއިރާގެ މެންބަރު މައުރޫފް ޒާކިރު ހުށަހެޅުއްވި ކުއްލި މައްސަލައަކީ ގެދޮރުވެރިޔާގެ ފުލެޓުތައް ވަކި ބަޔަކަށް ދޭން ރިޝްވަތުގެ ގޮތުގައި ފައިސާ ނަގައިގެން ވަކި ގުރުއަތެއް ބާއްވަން އުޅޭ ކަމަށް ބުނެ ހުށަހެޅި މައްސަލައެކެވެ.

ކުއްލި މައްސަލަ މިއަދަށް އެޖެންޑާނުކުރުމުން މައުރޫފް ވަނީ މަޖިލީހުގެ ޖަލްސާގައި އެކަމުގެ ކަންބޮޑުވުން ފާޅުކުރައްވާފައެވެ. އެކަމާއި ގުޅިގެން ރިޔާސަތުގައި އިންނެވި މަޖިލީހުގެ ރައީސް އަބްދުއްރަހީމް އަބްދުﷲ ވަނީ ރައްޔިތުންގެ މަޖިލީހުގެ 197ވަނަ މާއްދާގައި ކުއްލި މައްސަލައަކީ ހަގީގަތެއްގެ މައްޗަށް ބިނާކޮށް ހުށަހެޅޭ ކަމަކަށް ވާންވާނެ ކަމަށް ބަޔާންކޮށްފައިވާއިރު، މެންބަރު ހުށަހެޅުއްވި މައްސަލައަކީ ހަގީގަތެއްކަން ބަޔާންކޮށްދެވިފައނުވާކަމަށް ފާހަގަކުރައްވާފައެވެ.

އެހެންކަމުން އެ މައްސަލަ މަޖިލީހަށް ހުށަހެޅެން ނެތް ކަމަށް އަބްދުއް ރަހީމް ވިދާޅުވިއެވެ.

ފާހަގަކުރެވޭ ގޮތުގައި ގެދޮރުވެރިޔާގެ 4،000 ފްލެޓުގެ ތެރެއިން ބައެއް ފްލެޓުތައް ވިއްކާލަން އުޅޭކަމަށް ބުނާ ވާހަކަތަކެއް މި ދޭތެރެއިން ވެސް ވަނީ ފެންމަތިވެފައެވެ. އެގޮތުން އާންމުންގެ އެކަމުގެ ކަންބޮޑުވުންތަކާއި ގުޅިގެން މި މަހުގެ 28 ވަނަ ދުވަހު "އެކްސް"ގައި ކުރެއްވި ޕޯސްޓެއްގައި ގެދޮރުވެރިކަމާއި ބިނާރާ ބެހޭ ވަޒީރު ޑރ. އަބްދުﷲ މުއްތަލިބު ވިދާޅުވީ، 15 ނޮވެމްބަރުގައި 2023ގައި އިއުލާނުކުރި ލިސްޓަކީ އެންމެ ފައިނަލް ލިސްޓު ކަމަށާއި، ފްލެޓް ދިނުމުގައި ވެސް އަމަލުކުރާނީ އެ ލިސްޓާއެކު ކުރެވުނު އިއުލާނުގައިވާ ގޮތަށް ކަމަށެވެ.

އެގޮތުން ޝަރުތު ހަމަނުވާ ފަރާތްތައް ލިސްޓުން އުނިވި ނަމަވެސް، ގެޒެޓުގައިވާ ލިސްޓާއި އިޢުލާނާ ޚިލާފަށް ފަހުން ލިސްޓަށް އެއްވެސް ފަރާތެއް އިތުރުކުރެވިފައި ނުވާނެ ކަމަށް ވަޒީރު ވިދާޅުވިއެވެ.

އަދި އެފަދައިން ލިސްޓަށް އައު ބަޔަކު އިތުރުކުރުމުގެ ފުރުސަތު ވެސް އެއްވެސް ފަރާތަކަށް ނޯންނާނެ ކަމަށް ވެސް ވަޒީރު ވިދާޅުވިއެވެ.