އައްޑޫ ސިޓީ ކައުންސިލު އެކުލެވިފައިވާ ގޮތުގެ ސަބަބުން މީދޫ، ފޭދޫ އަދި ހުޅުދޫގެ ރައްޔިތުންގެ ޚިޔާލު ހޯދުމަށް ނަގާ ވޯޓު މި މަހުގެ 25ގައި އޮންނާނެކަން އިލެކްޝަންސް ކޮމިޝަނުން (އީސީ)އިން މިއަދު އިއުލާނުކޮށްފިއެވެ.
އިލެކްޝަނުން މިއަދު ކުރި އިއުލާނުގައި ބުނީ، އެ އިންތިޚާބު ބާއްވާނީ މިހިނގާ އޮކްޓޯބަރުމަހުގެ 25 ވާ ހޮނިހިރު ދުވަހުގެ 08:00 އިން 16:00 އަށް ކަމަށެވެ. އަދި ވޯޓު ގުނަން ފަށާނީ ޢާންމުކޮށް ވެސް ގުނާ ގޮތަށް، ވޯޓު ނަގާ ނިމޭތާ 30 މިނެޓުގެ ހުސްވަގުތުކޮޅަކަށް ފަހުގައި ކަމަށް ވެސް އީސީން ބުންޏެވެ.
އެ އިއުލާނުގައި ބުނީ، ވޯޓު ނަގާ ދުވަހު އިންސާނީ ބާރު އެކަމެއްގެ މައްޗަށް ނުހިނގާ ކަމެއް ދިމާވެގެން ވޯޓުލުން މެދުކެނޑި ނުވަތަ ވޯޓުލުމަށް މީހުން ނުކުތުމަށް ހުރަސްތަކެއް ދިމާވެގެން ނޫނީ ވޯޓުލުމަށް ކަނޑައެޅިފައިވާ ވަގުތު އިތުރުކުރާގޮތަށް ހަމަޖެހިފައިނުވާ ކަމަށެވެ. އަދި އެ ވޯޓުގެ ރަސްމީ ނަތީއްޖާ އިއުލާނުކުރުމަށް ހަމަޖެހިފައިވަނީ އޮކްޓޯބަރުމަހުގެ 26 ވާ އާދިއްތަ ދުވަހު ކަމަށް ވެސް އެ އިއުލާނުގައި އީސީން ބުންޏެވެ. މި ވޯޓަކީ މިދިޔަ މަހު މަޖިލީހުން ފާސްކުރި އަދި އެ މަހުގެ 16 ވަނަ ދުވަހު ރައީސް ތަސްދީގުކުރެއްވި ރައްޔިތުންގެ ޚިިޔާލު ހޯދުމުގެ އާންމު ވޯޓު ނެގުމުގެ ގާނޫނުގެ ދަށުން ނަގާނެ މިފަދަ ފުރަތަމަ ވޯޓެވެ.
އެ ގާނޫނުގެ ދަށުން ޔާލު ހޯދުމުގެ ވޯޓު ނަގަން މަޖިލީހަށް ފެނިއްޖެ ނަމަ އެ ވޯޓެއް ނަގަން ކަނޑައަޅާނީ މަޖިލީހުގެ ޖުމްލަ މެންބަރުންގެ އަގުލަބިއްޔަތުން ފާސްކުރާ ގަރާރަކުން ކަމަށް ވެސް އެ ބިލުގައި ހިމަނައިފައިވެއެވެ.
Advertisement
This content is created and paid for by advertisers and does not involve Voice Journalists
