އިސްލާމީ ކަންތައްތަކާއި ބެހޭ ވުޒާރާގެ އެކި މަގާމުތަކުގައި ތިބޭ ފަރާތްތަކަށް އަމިއްލަ އުމްރާ ގްރޫޕްތައް ހިންގުމުގައި ޢަމަލީ ގޮތުން ބައިވެރިނުވެވޭ ގޮތް ހެދުމަށް މަޝްވަރާކުރައްވަމުންގެންދަވާ ކަމަށް ވަޒީރު ޑރ. މުޙައްމަދު ޝަހީމު އަލީ ސަޢީދު ވިދާޅުވެއްޖެއެވެ.

ރޭ ސޯޝަލް މީޑިޔާގައި ކުރެއްވި ޕޯސްޓެއްގައި ވަޒީރު ވިދާޅުވީ، އެފަދައިން ނިންމަން މަޝްވަރާކުރަނީ އެ ވުޒާރާއަކީ އުމްރާ ކުންފުނިތައް ރެގިއުލޭޓްކުރާ ވުޒާރާއަށްވާތީއެވެ.

ރާއްޖެއިން މީހުން އުމްރާއަށް ގެންދިޔުމަށް 60 އަށް ވުރެ ގިނަ ކުންފުނި ހިންގާއިރު، އޭގެ ތެރޭގައި އިސްލާމީ ވުޒާރާގެ އެކި މަގާމުތަކުގައި ތިބޭ ފަރާތްތައް ވެސް ހިމެނެއެވެ.

އެގޮތުން ޢުމްރާއަށް މީހުން ގެންދިޔުމާއި ބެހޭ އުސޫލުގެ ދަށުން ރަޖިސްޓްރޭޝަން ފީގެ ގޮތުގައި 20،000 ރުފިޔާ ދައްކަން ޖެހޭއިރު، ހުއްދަ އައުކުރާ ނަމަ ރަޖިސްޓްރޭޝަން ފީގެގޮތުގައި ދައްކަންޖެހެނީ 15،000 ރުފިޔާއެވެ. އަދި އެ އުސޫލާއި ޚިލާފުވާ ފަރާތްތައް އެންމެ ކުޑަވެގެން 1،000 ރުފިޔާއިން ފެށިގެން 500،000 ރުފިޔާ އާއި ހަމައަށް ޖޫރިމަނާ ވެސް ކުރެވެއެވެ. 

އެގޮތުން އެކި މައްސަލަތައް ފެންމަތިވާ އުމްރާ ކުންފުނިތަކާ މެދު ވެސް އެ ވުޒާރާއިން މިހާރު ވެސް އަންނަނީ ފިޔަވަޅު އަޅަމުންނެވެ.