ޖަރުމަންވިލާތުގެ ތަރޑް ޕާޓީ މަރޗެންޓުން ޓެމޫގައި އެއްޗެހި ވިއްކާ އަގުތަކަށް އެކުންފުނިން ނުފޫޒު ފޯރުވާކަމަށް ބުނެ، ޖަރުމަންވިލާތުން މައްސަލަ ބަލަން ފަށައިފިއެވެ.
ޖަރުމަންވިލާތުގެ ކަމާ ބެހޭ ފަރާތްތަކުން ބުނީ ޓެމޫ އިން އަގުތައް ކޮންޓްރޯލްކޮށް، ވިޔަފާރިވެރިންނަށް ޝަރުތުތައް ކުރަމުންދާކަމަށް ބެލެވޭކަމަށާއި، އޭގެ ސަބަބުން ޖަރުމަންވިލާތުގެ މާކެޓްގައި ވާދަވެރިކަން ގެއްލި، އެހެން ސޭލްސް ޗެނަލްތަކުގައި އަގުތައް ބޮޑުވުމުގެ މައްސަލަ ދިމާވާ ކަމަށެވެ. ޖަރުމަންވިލާތުން މައްސަލަ ބަލަމުންދަނީ އަޔަލެންޑްގެ ޑަބްލިންގައި ރަޖިސްޓްރީކޮށްފައިވާ ވޭލްކޯ ޓެކްނޮލޮޖީ ކުންފުންޏާއި ދެކޮޅަށެވެ. އެގައުމުގައި ޓެމޫ އޮޕަރޭޓްކުރަނީ އެކުންފުނި މެދުވެރިކޮށެވެ.
ޓެމޫ އިން ޖަރުމަންވިލާތުގެ މަރޗެންޓުންނަށް އެއްޗެހި ވިއްކަން ހުޅުވާލީ މީގެ އަހަރެއްހާ ދުވަސްކުރިންނެވެ. އަދި ޖަރުމަންވިލާތުގައި މިހާރުވެސް 19.3 މިލިއަން ޔޫޒަރސް ވަނީ ޓެމޫ އެކައުންޓް ހުޅުވާފައެވެ.
ބަލަމުންދާ މައްސަލައާއި ގުޅިގެން ޓެމޫއިން ބުނީ އެކުންފުނިން އޮޕަރޭޓްކުރާ މާކެޓެއްގެ ގާނޫނަށް އެކުންފުނިން ތަބާވާނެކަމާށެވެ.
Advertisement
This content is created and paid for by advertisers and does not involve Voice Journalists
