އޭއެފްސީ އޭޝިއަންކަޕް ކޮލިފައިންގައި މިއަދު ތަޖިކިސްތާނާ ދިވެހިރާއްޖެ ބައްދަލުކުރިމެޗުން ރާއްޖެ ބަލިވެއްޖެއެވެ.

ތަޖިކިސްތާނުގެ ހިސޯރް ސެންޓްރަލް ސްޓޭޑިއަމްގައި ކުޅުނު މިމެޗް ދިވެހިޓީމްގެ މައްޗަށް އެޓީމް ކުރި ހޯދީ 0-2 ގެ ނަތީޖާއަކުންނެވެ. މިމެޗްގައި ފެނިގެންދިޔަ ހުރިހާ ލަނޑެއްވެސް ޖަހާފައިވަނީ ފުރަތަމަ ހާފްގައެވެ. މެޗްގައި ތަޖިކިސްތާނަށް ގޯލް ހުޅުވާލަދިނީ މެޗް ފަށައިގެން 8 ވަނަ މިނެޓް ތެރޭގައި ޝަހްރޯމް ސާމިއޭވް އެވެ. މެޗްގައި ތަޖިކިސްތާނުން ޖެހި ދެވަނަ ލަނޑު ކާމިޔާބުކޮށްފައިވަނީ 30 ވަނަ މިނެޓް ތެރޭގައި ޝެރްވާނީ އެވެ.

މިމެޗްގައި ގިނައިރު ބޯޅަ ހިފަހައްޓައިގެން ކުޅެފައިވަނީ ތަޖިކިސްތާނުގެ ޓީމުންނެވެ. މެޗްގައި ރާއްޖޭގެ ޓީމުން ހަމަލާތައްތައް ފޮނުވާލެވޭތޯ ބެލިއިރު، ގޯލެއް ޖަހާނެ އެންމެ ރަނގަޅު ފުރުސަތު ލިބުނީ، ހަސަން ރާއިފް އަހުމަދު (ހަންނަ) އަށެވެ. ނަމަވެސް ބަދަލު ކުޅުންތެރިއެއްގެ ގޮތުގައި ކުޅެން ނިކުތް ހަންނަ ގެ ހަމަލާ އަމާޒުވީ ގޯލް ދަނޑިއަށެވެ.

އޭޝިއަންކަޕް ކޮލިފައިން ގްރޫޕް އޭގައި މިހާތަނަށް ރާއްޖެ ތިން މެޗް ކުޅެފައިވާއިރު، އެ ތިން މެޗުންވެސް ރާއްޖެ ވީ ބައްޔެވެ. ފުރަތަމަ މެޗްގައި ފިލިޕީންސްއާ ދެކޮޅަށް ކުޅުނުމެޗުން ރާއްޖެ ބަލިވީ 4-1 ގެ ނަތީޖާއަކުންނެވެ. ދެވަނަ މެޗްގައި ޓީމޯ ލެސްޓޭ އަތުން ބަލިވީ 0-1 ގެ ނަތީޖާއަކުންނެވެ.

ކޮލިފައިންގައި ދެން ރާއްޖެ ކުޅެންޖެހޭ މެޗްތައް ތާވަލްކޮށްފައިވަނީ ރާއްޖޭގައެވެ. ފުރަތަމަ މެޗްގައި އަންނަ އަންގާރަދުވަހު ނިކުންނާނީ  ތަޖިކިސްތާނާ ދެކޮޅަށެވެ.