އެމްޑީޕީ ސަރުކާރުގެ ވަޒީރުންގެ މައްސަލަ ބަލަނީ ރޭވުމެއްގެ ތެރެއިން: ސޯލިހް
މިއަދު އެމްޑީޕީ ވަޒީރުންގެ މައްސަލަ ބަލަނީ ސަރުކާރުގެ ރޭވުމެއްގެ ތެރެއިންކަމަށް ކުރީގެ ރައީސް އިބްރާހިމް މުހައްމަދު ސޯލިހް ތުހުމަތު ކުރައްވައިފިއެވެ.
އެންޓި ކޮރަޕްޝަން ކޮމިޝަނުން ވަނީ އެމްޑީޕީގެ ޗެއާޕާސަން އަދި ކުރީގެ އިކޮމިކް މިނިސްޓަރު ފައްޔާޒު އިސްމާއީލގެ އިތުރުން ކުރީގެ މާލީ ވަޒީރު އިބްރާހިމް އަމީރުގެ އިތުރުން އެޑިއުކޭޝަން މިނިސްޓަރު އާއިޝަތު އަލީ ކޮމިޝަނަށް ހާޒިރުކުރަން ނިންމައި ޗިޓް ފޮނުވާފައެވެ.
މިކަމާ ގުޅިގެން ރައީސް ސޯލިހް އެކްސްގައި ކުރެއްވި ޕޯސްޓެއްގައި ވިދާޅުވީ، އެމަނިކްފާނުގެ ކެބިނެޓުގެ ތިން ވަޒީރަކު އޭސީސީއަށް ހާޒިރުކުރުމަށް ނިންމާފައިވަނީ، ދައުލަތުގެ މުއައްސަސާތަކުގެ މުސްތަގިއްލުކަން ގެއްލުވާލާފައިވާ ދަނޑިވަޅެއްގައިކަމަށެވެ. ސޯލިހް ވިދާޅުވީ ރާއްޖޭގެ ސިޔާސީ މަޝްރަހުގައި މިވަގުތު ކަންކަން ހިނގަނީ އިންދާފުގެ ހަމަތަކާ އިދިކޮޅަށް ކަމަށެވެ. އެގޮތުން މިހާރު ހިނގަމުންދާ ކަންކަމަކީ ރައްޔިތުންގެ އަޑު ކަނޑުވާލަައި އިދިކޮޅު ސިޔާސީ ފަރާތްތައް ފަހަތަށް ޖެއްސުމަށް ރޭވިގެން ހިންގާ ވަރަށް ނުރަނގަޅު ކަންކަން ކަމަށް ރައީސް ސޯލިހް ފާހަގަކުރެއްވިއެވެ.
ރައީސް ސޯލިހް ވިދާޅުވީ މާޒީގައި އެބާވަތުގެ ކަންކަން ހިނގައިދިޔަ ގޮތް ވަރަށް ރަނގަޅަށް އެނގޭކަމަށެވެ. އިންސާފުން އެއްކިބާވެފައިވާ ތަޚުޤީޤުތަކާއި، ސިޔާސީ ހުކުންތަކުން މުޅި ޤައުމު ކިލަނބުވާނޭކަން ފާހަގަކުރައްވަމުން ރައީސް ސޯލިހް ވަނީ މިފަދަ ކަންކަމުން ދުރުވެ، އިންސާފާއި، ހަމަހަމަކަމާއި ގާނޫނުގެ ވެރިކަން އިސްކުރުމަށް ދައުލަތުގެ ވެރިންނަށް އިލްތިމާސް ކުރައްވާކަމަށް ވިދާޅުވެފައެވެ.
އޭސީސީއަށް ހާޒިރުވުމަށް ޗިޓް ފޮނުވުމާ ގުޅިގެން ފައްޔާޒް ވަނީ އޭނާގެ މައްޗަށް ކުރާ ތުހުމަތުތައް ދޮގުކުރައްވާފައެވެ. ފައްޔާޒް ވިދާޅުވީ ރަސްމީ ހައިސިއްޔަތު ނަހަމަ ގޮތުގައި ބޭނުންކޮށް ދައުލަތަށް ގެއްލުން ލިބޭ ގޮތަށް އަމަލުކޮށްފައި ނޯންނާނެ ކަމަށެވެ.
އަމީރު ވިދާޅުވެފައިވަނީ އެމްޑީޕީ ސަރުކާރުގެ 2019 އިން 2023 އަށް މާލީ ވަޒީރުކަމުގައި މަސައްކަތްކޮށްފައި ވާނީ އަމާނާތްތެރިކަމާއި ތެދުވެރިކަމާއެކުގައި ކަމަށެވެ. އަދި ރަސްމީ ހައިސިއްޔަތު ނަހަމަގޮތުގައި ބޭނުންކޮށް ދައުލަތަށް ގެއްލުންވާނެ އެއްވެސް ކަމެއް ކޮށްފައިނުވާނޭކަމަށާއި ވަޒީރުކަމުގައި ކޮންމެކަމެއްވެސް ނިންމާފައި، ލަފާދީފައި ވާނީ ދައުލަތަށް ލިބިދާނެ ބޮޑު ގެއްލުމަކުން ސަލާމަތްކޮށް، ފައިދާވާނެ ގޮތަށްކަމަށް އަމީރު ވިދާޅުވިއެވެ. އަދި އެ ޔަގީންކަން އަމިއްލަ ނަފްސާއިމެދު އެބައޮތް ކަމަށްވެސް އަމީރު ވަނީ ވިދާޅުވެފައެވެ.
އަމީރު ވަނީ އޭސީސީ ގެ ރައީސް އާއި މެމްބަރުންގެ ވަޒީފާގެ ދިފާއުގައި ބޭއިންސާފުން މީހުން ފްރޭމްކުރަން ކުރާ މަސައްކަތް ހުއްޓާލަން ގޮވާލައްވާފައެވެ.
Advertisement
This content is created and paid for by advertisers and does not involve Voice Journalists
