ޗައިނާއާއި އެމެރިކާއާ ދެމެދު ވިޔަފާރީގެ ވާދަވެރިކަން ބޮޑުވެ، ޗައިނާއިން އެތެރެކުރާ މުދަލުން 100 އިންސައްތަ ޓެރިފެއް ނަގާނެކަމުގެ އިންޒާރު އެމެރިކާގެ ރައީސް ޑޮނަލްޑް ޓްރަމްޕް ދެއްވައިފިއެވެ.

ޗައިނާއިން ރެއަރ އަރތު މިނެރަލްސް އެކްސްޕޯޓްކުރުން ކޮންޓްރޯލް ކުރުމާއި ގުޅިގެން ޓްރަމްޕް ގެންދަވަނީ ޗައިނާއަށް އެކި ގޮތްގޮތުން އިންޒާރު ދެއްވަމުންނެވެ. އެގޮތުން ޗައިނާގެ ވައިގެ ދަތުރުފަތުރުގެ ސިނާޢަތުގައި ބޭނުންކުރާ ބޮއިން މަރުކާރުގެ މަތިންދާބޯޓުތަކަށް ބޭނުންވާ ސްޕެއަރ ވިއްކުން ހުއްޓާލާނެ ކަމުގެ އިންޒާރުވެސް ވަނީ ދެއްވާފައެވެ.

ޓްރަމްޕްގެ އަމިއްލަފުޅު ސޯޝަލް މީޑިއާ ޕްލެޓްފޯމް، ޓްރުތް ސޯޝަލްގައި ކުރެއްވި ޕޯސްޓެއްގައި ޓްރަމްޕް ވިދާޅުވީ ޗައިނާއިން އެތެރެކުރާ ހުރިހާ އެއްޗަކުން އަންނަ ނޮވެމްބަރު 1 ވަނަ ދުވަހުން ފެށިގެން 100 އިންސައްތަ ޓެރިފް ނަގާނެކަމަށެވެ. އަދި އެމެރިކާގައި އުފައްދާ ކްރިޓިކަލް ސޮފްޓްވެއަރ ޗައިނާއަށް އެކްސްޕޯޓްކުރުންވެސް ކޮންޓްރޯލް ކުރައްވާނެކަމަށް ޓްރަމްޕް އިންޒާރުކުރެއްވިއެވެ.

އެމެރިކާއާއި ޗައިނާއާ ދެމެދު ނުތަނަވަސްކަން އިތުރުވެފައިމިވަނީ މި މަހު ފަހުކޮޅު ދެގައުމުގެ ލީޑަރުން ބައްދަލުކުރައްވަން ހަމަޖެހިފައިވަނިކޮށެވެ.