ނިމިދިޔަ އެމްޑީޕީ ސަރުކާރުގައި ބަންޑާރަނައިބުކަން ކުރެއްވި އިބްރާހިމް ރިފްއަތު ވެސް އެސީސީއަށް ހާޒިރުކުރަން ނިންމައި އެވެ.

އޭސީސީން ހިންގާ ތަހުގީގަށް ހާޒިރުވާން އަންގާ ރިފްއަތަށް މިހާރު ވަނީ ޗިޓް ފޮނުވާފަ އެވެ.

އެކަން ހާމަކޮށް ކުރީގެ ރައީސް އިބްރާހިމް މުހައްމަދު ސޯލިހް ވަނީ މިއީ ކަންބޮޑުވާ ކަމެއް ކަމަށް ވިދާޅުވެފަ އެވެ. އަދި ވިދާޅުވީ މިއީ މިނިވަން މުއައްސަސާތަކަށް ސަރުކާރުން ސިޔާސީ ނުފޫޒު ފޯރުވައިގެން އެމްޑީޕީގެ މެންބަރުންނަށް ބިރުދެއްކުމުގެ ގޮތުން ހިންގާ ސިލްސިލާ ހަރާކާތެއް ކަމަށެވެ.

‏"ސިޔާސީ ނުފޫޒުގަ ޖެހި ރައްޔިތުންގެ އިތުބާރު ގެއްލޭ މިޒާތުގެ ކަންކަން ނުކުރުމަށް އޭސީސީގެ ވެރިންނަށް އިލްތިމާސްކުރަން," ސޯލިހް ކުރެއްވި ޕޯސްޓްގައި ވިދާޅުވެފައިވެ އެވެ.

އޭސީސީން ހިންގާ ތަހުގީގަކަށް ކުރީގެ އިކޮނޮމިކް މިނިސްޓަރު ފައްޔާޒް އިސްމާއީލް މިއަދު ވަނީ ހާޒިރުކޮށްފަ އެވެ. އަދި ކުރީގެ ފިނޭންސް މިނިސްޓަރު އިބްރާހިމް އަމީރާއި ކުރީގެ އެޑިއުކޭޝަން މިިނިސްޓަރު ޑރ. އައިޝަތު އަލީ ވެސް ހާޒިރުކުރަން ވަނީ ނިންމާ ޗިޓް ފޮނުވާފަ އެވެ.

މި ބޭފުޅުންގެ މައްޗަށް އޮތީ އެކި ކުންފުނިތަކަށް ބަދަލު ދިނުމުގައި ދައުލަތަށް މަންފާ ކުޑަގޮތަށް އަމަލު ކުރުމުގެ ތުހުމަތެވެ. ރައީސް ސޯލިހްގެ ސަރުކާރުން. ވަނީ ބަދަލު ދިނުމުގެ ނަމުގައި އެެތައް ކުންފުންޏަކަށް ފައިސާދީފަ އެވެ. އަދި އެތައް ކުންފުންޏަކަށް ބޮޑު އަދަދުތަކުން ފައިސާއާ ޕްރޮޖެކްޓްތައް ދޭން އޮތީ ނިންމާފަ އެވެ.