ށ. ފޭދޫއަށް އެންމެ މުހިންމީ ތައުލީމީ ދާއިރާއިން އެ ރަށަށް އަންނަންޖެހޭ ތަރައްގީގެ މަޝްރޫއުތައް ނިންމުން ކަމަށާއި، އެ މަސައްކަތްތަކަށް ވަރަށް ބޮޑު އިސްކަމެއްދީގެން ކުރިޔަށްގެންދަވާނެ ކަމުގައި ރައީސް ޑރ. މުޙައްމަދު މުޢިއްޒު ވިދާޅުވެއްޖެއެވެ.
ށ. އަތޮޅަށް ކުރައްވަމުންގެންދަވާ ދަތުރުފުޅުގެ ތެރެއިން އެ އަތޮޅު ފޭދޫއަށް ވަޑައިގެން އެ ރަށުގެ ރައްޔިތުންނާއި ބައްދަލުކުރައްވައި ވާހަކަފުޅު ދައްކަވަމުން ރައީސް ވިދާޅުވީ، އެ ރަށުގެ ސްކޫލު ތަރައްޤީ ކުރުމުގެ މަޝްރޫޢު މަޑުޖެހިފައި އޮންނަތާ 2 އަހަރު ވެފައިވާއިރު، މިދިޔަ ދުވަސްތަކުގައި ސަރުކާރުން މަސައްކަތްކުރީ ހެދިފައި އޮތް އެއްބަސްވުމުގެ ތެރެއިން މަޝްރޫޢު ކުރިއަށް ގެންދެވޭނެ މަގެއް ހޯދުމަށްކަމަށެވެ.
އެހެން ނަމަވެސް އެކަން އެގޮތަށް ކުރިޔަށްނުދާތީވެ، އެމަނިކުފާނު މިހާރު އެ އަތޮޅަށް ކުރައްވާ ދަތުރުފުޅަށްފަހު އެ މަސައްކަތް ބާރު ސްޕީޑުގައި ކުރިއަށް ގެންގޮސްދެއްވާނެ ކަަމަށް ރައީސް ވިދާޅުވިއެވެ.
އަދި އެ މަޝްރޫއުގެ މަސައްކަތް މިހާރު ހިނގާ ސްޕީޑަކީ އެއްވެސް ވަރަކަށް ޤަބޫލުކުރެވޭނެ ކަމެއް ނޫންކަމުގައި ފާހަގަކުރައްވައި ރައީސް ވަނީ އެ ރަށުގައި ކުރަން ހުރި ހުރިހާ ކަންކަމުގެ ތެރެއިން އެންމެ ބޮޑު އިސްކަމެއް ދެއްވައިގެން، ސްކޫލުގެ މަލްޓިޕާޕަސް ހޯލާއި ކުލާސްރޫމްތައް ތަރައްޤީކުރުމުގެ މަޝްރޫޢު ކުރިއަށްގެންގޮސް، ހައްލު ހޯއްދަވައިދެއްވާނެކަމުގެ ޔަޤީންކަން ދެއްވާފައެވެ.
އެ މަޝްރޫއުގެ އިތުރަށް ވެސް އެ ރަށުގެ ތަރައްގީގެ މަޝްރޫއުތަކުގެ އަދާހަމަ އެމަނިކުފާނު ވަނީ ދެއްވާފައެވެ. އެގޮތުން އެ ރަށުގައި ރައްޔިތުން މޫދަށް އެރޭނެ ސަރަހައްދެއް ތަރައްގީކުރުމާއި، ގޮނޑުދޮށް ހިމާޔަތްކުރުމާއި، ބަނދަރު ތަރައްޤީކުރުމާއި މަގު ހެދުން ފަދަ މަޝްރޫޢުތައް އެކުއެކީ ކުރިޔަށްގެންދަވާނެ ކަމަށް ވެސް ރައީސް ވަނީ ވިދާޅުވެފައެވެ.
އަދި މިއަދު ހެނދުނު ސޮއިކުރި އެރަށުގެ ގޮނޑުދޮށް ހިމާޔަތްކުރުމުގެ މަޝްރޫޢާއި، މަގުތައް ޒަމާނީ ފެންވަރަށް ތަރައްޤީ ކުރުމުގެ މަޝްރޫޢުތަކަކީ ރަށުގެ ރައްޔިތުންނަށް ނުހަނު މުހިންމު މަޝްރޫޢުތަކެއް ކަމުގައި ރައީސް ވަނީ ވިދާޅުވެފައެވެ.
Advertisement
This content is created and paid for by advertisers and does not involve Voice Journalists
