ރައީސުލްޖުމްހޫރިއްޔާ ޑރ.މުހައްމަދު މުއިއްޒުގެ ރިޔާސީ ވައުދުފުޅާ އެއްގޮތަށް ރާއްޖޭގެ ޤައުމީ ޓީމްތަކުގެ ކުޅުންތެރިންނާއި އޮފިޝަލުންގެ އެލަވަންސް ބޮޑުކޮށްފިއެވެ.

ޤައުމީޓީމްތަކުގެ ކުޅުންތެރިންނާއި އޮފިޝަލުންނަށް ދެމުން އަންނަ އިނާޔަތް އެއްހަމައިން ބޮޑުކުރުމަކީ ރައީސްގެ ރިޔާސީ ވައުދެކެވެ. އެ ވައުދުގެ ދަށުން ޤައުމީޓީމްތަކުގެ ކުޅުންތެރިންނާއި އޮފިޝަލުންނަށް ދޭ އިނާޔަތް ވަނީ 7،000 ބޮޑުކޮށްފައެވެ. މީގެ ކުރިން އެތްލީޓުން ނުވަތަ ކުޅުންތެރިންނަށް ދެމުންދިޔައީ މަހަކު 5،000 ރުފިޔާއެވެ. އަދި އޮފިޝަލުންނަށް 2500 ރުފިޔާއެވެ. 

މިކަމާ ގުޅޭގޮތުން ކުޅިވަރާބެހޭ ވުޒާރާއިން އެސޯސިއޭޝަންތަކަސް ފޮނުވާފައިވާ ސާކިއުލާއެއްގައި ބުނެފައިވަނީ ރައީސްގެ ވައުދުފުޅާ އެއްގޮތަށް މެއިމަހުން ފެށިގެން އިނާޔަތުެގ ގޮތުގައި 7000 ރުފިޔާ ދިނުމަށް ކުޅިވަރާބެހޭ ގައުމީ މަޖިލީހުން ނިންމާފައިވާކަމަށެވެ. އެގޮތުން ސެޕްޓެމްބަރުމަހުގެ 15 ވަނަ ދުވަހުން ފެށިގެން މުސާރަ ޝީޓުތަކުގައި އެއަދަދު ހިމެނުމަށް ވަނީ އަންގާފައެވެ. 

ޤައުމީޓީމްތަކުގެ ކުޅުންތެރިންނަށާއި އޮފިޝަލުންނަށް ދޭ އިނާޔަތް ބޮޑުކުރިނަމަވެސް، ފުޓްސަލް ޓީމު އޭގެތެރެއަކު ނުހިމެނެއެވެ. މީގެ ސަބަބެއްކަމަށް މައުލޫމާތު ލިބިފައިވަނީ، އެފްއޭއެމްގެ ތެެރެއިންމިހާދުވަސް ވެގެންދިޔައިރު ފުޓްސަލް އާ ގުޅޭ އުސޫލެއް އެކުލަވާލެވިފައި ނެތުމުންނެވެ. އެކަން ހައްލުކުރުމަށް މަސައްކަތް ކުރަމުންދާކަމަށް ކުޅިވަރާ ބެހޭ ވަޒީރު ވަނީ މީގެ ކުރިން ވިދާޅުވެފައެވެ.