ސްޕެނިޝް ލަލީގާގައި ރޭ ޖިރޯނާ ކޮޅަށް ފަހު ވަގުތު ޖެހި ލަނޑުން ބާސެލޯނާ މޮޅުވެއްޖެއެވެ.

އެ މެޗުން ބާސެލޯނާ މޮޅުވެފައިވަނީ 1-2 ލަނޑުންނެވެ. އެ މެޗުގައި ބާސެލޯނާއިން މޮޅުވި ލަނޑު ޖަހައިފައިވަނީ މެޗުގެ އިތުރު ވަގުތުގެ އެންމެ ފަހު މިނެޓުގައެވެ.

މުޅި މެޗުގެ ކޮންޓްރޯލް ނަގައިގެން މޮޅަށް ބޯޅަ ހިފަހައްޓައިގެން ކުޅުނީ ބާސާއިންނެވެ. އޭގެ ނަތީއްޖާއެއްގެ ގޮތުން މެޗުގެ 13 ވަނަ މިނެޓުގައި ބާސާއިން މެޗުގެ ފުރަތަމަ ލަނޑު ކާމިޔާބުކުރިއެވެ. 

ހުނަރުވެރި ޒުވާން ލަމީން ޔަމާލް ދިން ބޯޅައަކުން ދެ ޑިފެންޑަރަކު ކަޓުވާލުމަށްފަހު ތިރީ ކަނަށް ފޮނުވާލި ބޯޅައިން ބާސާއަށް އެ ލަނޑު ޖަހައިދިނީ ހުނަރުވެރި ޒުވާން ކުޅުންތެރިޔާ އަދި މިހާރު މެދަށް ކުޅޭ ކުޅުންތެރިންގެ ތެރެއިން އެންމެ މޮޅު ކުޅުންތެރިޔާކަމަށް ގިނަ ބަޔަކު ޤަބޫލުކުރާ ޕެޑްރީއެވެ.

ބާސާގެ އެ ލަނޑާއެކު ޖިރޯނާ ވަރަށް ބޮޑަށް ކުރިއަށްޖެހި ބާސެލޯނާގެ ގޯލަށް ނުރައްކާ ކުރިއެވެ. އޭގެ ނަތީއްޖާއެއްގެ ގޮތުން އެ މެޗުގެ 20 ވަނަ މިނެޓުގައި ޖިރޯނާގެ އެކްސެލް ވިޓްސެލް، ބައިސަލް ކިކަކުން ލަނޑެއް ޖެހިއެވެ. އެ ލަނޑު އޭނާ ޖެހީ ލިބުނު ކޯނަރެއްގެ ބޭނުން ހިފައިގެންނެވެ.

އޭގެ ފަހުން ވެސް މެޗުގެ ފުރަތަމަ ހާފުގައި ޖިރޯނާއިން ބާސެލޯނާގެ ގޯލަށް ވަރަށް ނުރައްކާ ކުރިއެވެ. އެހެން ނަމަވެސް އެ ބޯޅަތައް ގޯލަށް ނުވަނުމުގައި ބާސާގެ ކީޕަރު، ޝެޒްނީގެ މޮޅު ކުޅުން ފާހަގަކުރެވުނެވެ.

މެޗުގެ ފުރަތަމަ ހާފު ނިމުމުގެ ކުރިން ބާސާއަށް ވެސް ރަނގަޅު ފުރުސަތެއް ލިބުނެވެ. އެގޮތުން ޕެނަލްޓީ އޭރިއާ ބޭރުން ބާސާއަށް ކުޅޭ އިނގިރޭސި ފޯވާޑް، މާކަސް ރަޝްފޯޑު ފޮނުވާލި ހިލޭ ޖެހުން އަމާޒުވީ ގޯލުގެ މަތީ ދަނޑިއަށެވެ.

ދެވަނަ ހާފުގައި ދެ ޓީމުން ވެސް ބައެއް ބަދަލުތައް ކުރިއިރު، އޭގެ ތެރޭގައި ބާސާއިން މެދަށް ކުޅޭ ފްރެންކީ ޑެ ޔޮންގެ ބަދަލުގައި ޑިފެންޑަރު ރޮނާލްޑް އަރައުހޯ ކުޅެން ކުރިއަށް އެރުވިއެވެ. މެޗުގެ އިތުރު ވަގުތުގެ ގޮތުގައި ދެއްކި 4 މިނެޓުގެ ތެރެއިން 3 ވަނަ މިނެޓުގައި ބާސާ މޮޅުވި ލަނޑު ކާމިޔާބުކޮށްދިނީ ވެސް އަރައުހޯއެވެ.

މި މެޗުގައި ދެއްކި އިތުރު ވަގުތު މަދުވުމުގެ ސަބަބުން ހިތްހަމަ ނުޖެހުން ފާޅުކުރުމުގެ ސަބަބުން ބާސާގެ ކޯޗު ހެންސީ ފްލިކަށް ވަނީ ދެ ރީނދޫ ކާޑާއެކު ރަތް ކާޑު ދައްކައިފައެވެ. ކުރިޔަށް ލީގުގައި ބާސާއަށް އޮތީ ވަރުގަދަ ރެއަލް މެޑްރިޑާ ދެކޮޅަށް ކުޅޭ މެޗު ކަމުން، އެ ކާޑު ބާސާއިން އެޕީލް ކުރާނެ ކަމަށް ވަރަށް ބެލެވެއެވެ.

އެ ނަތީއްޖާއާއެކު ބާސާވަނީ ވާދަވެރި މެޑްރިޑަށް ވުރެ އެއް މެޗު އިތުރަށް ކުޅެގެން ތާވަލުގެ އެއްވަނައަށް އަރާފައެވެ. އެ ދެ ޓީމުގެ ދެމެދުގައި އޮތީ އެންމެ ޕޮއިންޓެއްގެ ފަރަގެކެވެ. އެހެންކަމުން މިރޭ ރެއަލް ކުޅޭ މެޗުން އެ ޓީމު މޮޅުވެއްޖެ ނަމަ އެ ޓީމު އަނެއްކާ ވެސް އެއްވަނައަށް އަރާނެއެވެ.

ރޭގެ މެޗާއެކު ޖިރޯނާ އޮތީ ތާވަލުގެ 19 ވަނައިގައެވެ. އެ ޓީމަށް މިހާތަނަށް ލިބިފައިވަނީ އެންމެ 9 ޕޮއިންޓެވެ.