ލ. މާވަށުގެ މުހިންމު ހަތް މަޝްރޫއުއެއްގެ މަސައްކަތް މިއަދު ފަށައިފިއެވެ.
މި މަޝްރޫއުތައް ފަށައިފައިވަނީ ރައީސް ޑރ. މުޙައްމަދު މުޢިއްޒު ލ. އަތޮޅަށް މިއަދު ފެއްޓެވި ދަތުރުފުޅުގެ ތެރެއިން މާވަށަށް ކުރެއްވި ޒިޔާރަތުގައެވެ.
މި މަޝްރޫއުތަކުގެ ތެރެއިން އެންމެ މުހިންމު މަޝްރޫއެއްގެ ގޮތުގައި ފާހަގަކުރެވެނީ މާވަށުގެ ގޮނޑުދޮށް ހިމާޔަތް ކުރުމުގެ މަޝްރޫއެވެ. އެމްޓީސީސީއާ ހަވާލުކުރެވުނު މި މަޝްރޫއު ފައްޓަވައިދެއްވީ މިނިސްޓަރ އޮފް ކޮންސްޓްރަކްޝަން އެންޑް އިންފްރާސްޓްރަކްޗަރ އަބްދުﷲ މުއްތަލިބެވެ.
އަދި އެ ރަށުގެ މަގު ހެދުމުގެ މަޝްރޫއު ރޯޑް ޑިވެލޮޕްމަންޓް ކޯޕަރޭޝަން (އާރުޑީސީ) އާ ހަވާލުކުރެވުނެވެ. އެ މަޝްރޫއުގެ އަމަލީ މަސައްކަތް ވެސް މިއަދު ވަނީ ފަށައިފައެވެ.
މާވަށުގައި ގާއިމުކުރާ ކުނި މެނޭޖްކުރާ މަރުކަޒުގެ މަސައްކަތް ފައްޓަވައިދެއްވީ މިނިސްޓަރ އޮފް ފިނޭންސް އެންޑް ޕްލޭނިންގ މޫސާ ޒަމީރެވެ. މި މަޝްރޫއަކީ "މަގޭ ސާފު ރާއްޖެ" ޝިއާރުގެ ދަށުން ކުރިއަށްގެންދެވޭ ޚާއްޞަ މަޝްރޫއެކެވެ. މި މަރުކަޒު ގާއިމުކުރެވުމުން، ރަށުގައި އުފެދޭ ކުނި އެކަށީގެންވާ ގޮތެއްގައި މެނޭޖްކުރެވި، ތިމާވެއްޓަށް ކުރާ ނޭދެވޭ އަސަރުތައް ކުޑަކުރެވިގެންދާނެއެވެ.
މީގެއިތުރުން، މާވަށު ސްކޫލުގެ އާ އިމާރާތް ތަރައްގީކުރުމުގެ މަޝްރޫއު އާއި 120 ދުވަހުގެ ތެރޭގައި ވޮލީ ކޯޓެއް ޤާއިމްކުރުމުގެ މަސައްކަތް އެމްޓީސީސީއާ ހަވާލުކުރެވުނެވެ. އަދި މާވަށުގައި އައިސް ޕްލާންޓެއް ގާއިމްކުރުމުގެ މަސައްކަތާއި، ބީއެމްއެލް ބްރާންޗެއް ގާއިމުކުރުމުގެ މަސައްކަތް ވެސް މިއަދު ފެށިފައިވެއެވެ. އަދި ފުލުހުންގެ މަރުކަޒެއް އިމާރާތްކުރުމުގެ މަސައްކަތް ވެސް މިއަދު ވަނީ ފަށައިފައެވެ.
މި ދަތުރުފުޅުގައި ރައީސް ވަނީ މާވަށުގެ ބިން ހިއްކުމުގެ މަސައްކަތް ކުރިޔަށްދާ ސަރަޙައްދުވެސް ބައްލަވާލައްވާފައެވެ. އަދި އެ ރަށުގެ ކައުންސިލާއި ރައްޔިތުންނާއި ބައްދަލުކުރައްވައި، އެ މަޝްރޫއުތަކުގެ އަދާހަމަ އެމަނިކުފާނު ވަނީ ދެއްވާފައެވެ. ފާހަގަކުރެވޭ ގޮތުގައި މިއީ މާވަށުގެ ތާރީޚުގައި ވެސް އެއްފަހަރާ މިހާ ގިނަ މަޝްރޫއުތައް ފެށި ފުރަތަމަ ފަހަރެވެ.
Advertisement
This content is created and paid for by advertisers and does not involve Voice Journalists
