ވަރުގަދަ ގެޓާފޭ އަތުން ގަދަބާރު ރެއަލް މެޑްރިޑް އުނދަގޫ މޮޅެއް ހޯދައިފިއެވެ.

ސްޕެނިޝް ލަލީގާގައި ރޭ ގެޓާފޭ އާއި ދެކޮޅަށް މެޑްރިޑް ކުޅުނު މެޗު ނިމުނީ 0-1 ގެ ނަތީއްޖާއަކުންނެވެ. އެ މެޗުގެ ހަމައެކަނި ގޯލު މެޗުގެ 80 ވަނަ މިނެޓުގައި ތުރުކީގެ އަރުދާ ގުލާގެ ޕާހަކުން ކާމިޔާބުކޮށްދިނީ ކިލިއަން އެމްބާޕޭއެވެ. މިއީ މި ސީޒަނުގައި އެމްބާޕޭ ޖެހި 10 ވަނަ ލަނޑެެވެ. 

މެޗުގެ ބޮޑު ބައެއްގައި ރިއަލް މެޑްރިޑްއިން ބޯޅަ ކޮންޓްރޯލް ކުރި ނަމަވެސް، ގެޓާފޭގެ ވަރުގަދަ ދިފާއީ ސަފު ފޫއަޅުވާލުން ވީ އުނދަގޫ ކަމަށެވެ. އެހެން ނަމަވެސް މެޗުގައި ރިއަލް މެޑްރިޑްއިން 76 އިންސައްތަ ބޯޅަ ގެންގުޅެ، 23 ހަމަލާ ފޮނުވާލއިރު، ގެޓާފޭއިން ވަނީ 7 ޙަމަލާއެއް ފޮނުވާފައެވެ.

އެ މެޗުގައި ގެޓާފޭގެ ގޯލްކީޕަރު ޑޭވިޑް ސޯރިއާ ވަނީ ކައިލިއަން އެމްބާޕޭ އަދި ޑޭވިޑް އަލާބާގެ ހަމަލާތައް ހުއްޓުވާލާފައެވެ.

ވަރުގަދަ ކުޅުމެއް ކުޅުނު ގެޓާފޭއަށް މެޗު ބަދަލުވީ، އެ މެޗުގެ ދެވަނަ ހާފުގެ ފަހުކޮޅު ގެޓާފޭގެ ސަބްސްޓިޓިއުޓް އެލަން ނިއޯމް، ވިނީސިއަސް ޖޫނިއާއަށް ކުރި ފައުލަކާއި ގުޅިގެން ދެއްކި ރަތް ކާޑާއެކުއެވެ. މެޑްރިޑުން އެ ޓީމުގެ ލަނޑު ވެސް ޖެހީ އޭގެ ކުޑައިރުކޮޅެއް ފަހުންނެވެ. 

ގެޓާފޭގެ ދެވަނަ ކުޅުންތެރިއަކަށް ރަތް ކާޑު ލިބުނީ އޭގެ ހަތަރު މިނެޓް ފަހުން، އެލެކްސް ސަންކްރިސް ވިނީސިއަސްއަށް ކުރި ފައުލަކާއި ގުޅިގެން ދެ ރީނދޫ ކަޑާއެކު ރަތް ކާޑު ދެއްކުމުންނެވެ.

އެހެން ނަމަވެސް މެޗު ނިމެން ދަނިކޮށް، ގެޓާފޭގެ  އަބޫ ކަމާރާގެ ނުރައްކާތެރި ބޯޅައެއް މެޑްރިޑްގެ ކީޕަރު ޓިބޯ ކޯޓުއާ ވަނީ ދިފާއުކޮށްފައެވެ.

މި މުހިންމު ކާމިޔާބާއެކު  މެޑްރިޑް ވަނީ ދެވަނައިގައި އޮތް ބާސެލޯނާއަށް ވުރެ 2 ޕޮއިންޓް އިތުރަށް ހޯދައި، ލީގު ތާވަލުގެ އެއްވަނައަށް އަރާފައެވެ. މެޑްރިޑްގެ ކުރިއަށް އޮތް މެޗަކީ އޮކްޓޯބަރު 22 ވާ ބުދަ ދުވަހު ޗެމްޕިއަންސް ލީގުގައި ޔުވެންޓަސްއާ ދެކޮޅަށް ކުޅޭ މެޗެވެ.

އަދި އޭގެ ފަހުން އޮކްޓޯބަރު 26 ވާ އާދީއްތަ ދުވަހު ވާދަވެރި ބާސެލޯނާއާ ދެކޮޅަށް އެލް ކްލާސިކޯ ކުޅޭނެއެވެ.