ލ. އަތޮޅަށް އިތުރު އެއާޕޯޓެއް ބޭނުންވާ ކަމަށާއި، އެ އެއާޕޯޓު ތަރައްގީކުރާނީ ގިނަ ރިސޯޓުތަކާ އެކު އިގްތިސާދީ ގޮތުން އެންމެ ފައިދާވާނެ ރަށެއްގައި ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެއެވެ.

މިހާރު އެންމެ އެއާޕޯޓެއް އޮންނަ ލ. އަތޮޅުގައި އިތުރު އެއާޕޯޓެއް އެޅުމަކީ އެމަނިކުފާނުގެ ރިޔާސީ ވަޢުދުފުޅެކެވެ. 

އެގޮތުން ލ. އަތޮޅަށް މިއަދު ފެއްޓެވި ދަތުރުފުޅުގެ ފުރަތަމަ މަންޒިލު ކަމުގައިވާ މާވަށަށް ވަޑައިގެން، އެ ރަށު ރައްޔިތުންނާ ބައްދަލުކުރައްވައި އެކަމާއި ގުޅޭ ގޮތުން ރައީސް ވިދާޅުވީ، އެ އަތޮޅުގައި ދެވަނަ އެއާޕޯޓެއް ތަރައްގީ ކުރެއްވުމަށް އެމަނިކުފާނު ވެވަޑައިގެންފައިވާ ވައުދު ފުއްދަވާނެ ކަމަށެވެ.

"ޓޫރިޒަމް ކުރިއަރުވަން ބަލާއިރު ވެސް އެންމެ ރަނގަޅު ގޮތުގައި ގިނަ ރިސޯޓުތަކެއް ތަރައްގީކުރެވެން އޮތް ހިސާބެއްގެ ކައިރީ އޮތް ރަށެއްގައި އެއާޕޯޓު އަޅަން ޖެހޭނީ. އެހެންވީމަ ތިބޭފުޅުން ތި ބޭނުންވެލައްވާ ކަމުގައި އަޅުގަނޑުގެ ވިސްނުން ހުރި ގޮތް މި ދެންނެވީ،" ރައީސް ވިދާޅުވިއެވެ.

އެހެން ނަމަވެސް އަދި އެ އެއާޕޯޓު އަޅާނެ ވަކި ރަށެއް ކަނޑައަޅާފައިނުވާ ކަމަށާއި،އެ ނިންމުން ވަރަށް އަވަހަށް އިއުލާނުކުރެވޭނެ ކަމަށް ރައީސް ވިދާޅުވިއެވެ.

ލ.އަތޮޅުގައި އިތުރު އެއާޕޯޓެއް އެޅުމަށް މާވަށަކީ އެންމެ ރަނގަޅު ރަށް ކަމަށް އެ ރަށުގެ ގިނަ ރައްޔިތުން ގަބޫލުކުރާއިރު، އެހެން ބައެއް ރަށްރަށުގެ ރައްޔިތުން ވެސް އެ ބޭފުޅުންގެ ރަށްރަށުގައި އެއާޕޯޓު އެޅުމަށް އެދެމުންދެއެވެ. 

އެގޮތުން މާވަށް ކައިރީގައި އެއާޕޯޓެއް އަޅަން ބޭނުންވެގެން މީގެ ކުރިން އެ ރަށުގެ ރައްޔިތުން ވަނީ ހަރަކާތެއް ވެސް ކުރިއަށް ގެންގޮސްފަ އެވެ.