ޔުއޭފާ ޗެމްޕިއަންސް ލީގުގެ ގްރޫޕް ސްޓޭޖުގައި ރޭ ސްޕެއިންގެ ރެއާލް މެޑްރިޑް އިން އިޓަލީގެ ޔުވެންޓަސްގެ އަތުން އުނދަގޫ މޮޅެއް ހޯދައިފިއެވެ.
މެޑްރިޑްގެ ދަނޑު، ސަންޓިއާގޯ ބާނަބޭއު ސްޓޭޑިއަމްގައި ކުޅުނު މި މެޗު ރެއާލް އިން ކާމިޔާބުކުރީ 1-0 ގެ ހަނި ނަތީޖާއަކުންނެވެ. މި މެޗުގެ ބޮޑު ބައިގައި ބޯޅަ ހިފަހައްޓައިގެން މެޑްރިޑުން ކުޅުނު ނަމަވެސް، ފަސް ކުޅުންތެރިން ޑިފެންސަށް ލައިގެން ކުޅުނު ޔުވެންޓަސް ކޮޅަށް ގޯލެއް ޖެހުންވީ އުނދަގޫ ކަމަށެވެ.
ރޭގެ މެޗުގައި ފެނުނު ހަމައެކަނި ލަނޑު، މެޗުގެ 77 ވަނަ މިނެޓުގައި ކާމިޔާބުކުރީ ޖޫޑް ބެލިންހަމްއެވެ. އޭނާ އެ ލަނޑުޖެހީ މެޑްރިޑަށް ކުޅޭ ބްރެޒިލްގެ ފޯވާޑް، ވީނީޝިއަސް ޖޫނިއާ ޖެހި ބޯޅައެއް ދަނޑީގައި ޖެހިފައި އައި ރީބައުންސެއް ގޯލަށް ވައްދައިގެންނެވެ.
ބޮޑަށް ޑިފެންސިވް އެޕްރޯޗަކުން ފެނުނު ޔުވެންޓަސްއަށް މާބޮޑެތި އެޓޭކްތަކެއް ނުކުރެވު ނަމަވެސް، ރޭގެ މެޗުގައި މެޑްރިޑުން ޔުވެންޓަސްގެ ގޯލާއި އަމާޒުކޮށް ފޮނުވާލީ ގިނަ ބޯޅަތަކަށް ޔުވެންޓަސްގެ ކީޕަރު، މިޝެލް ޑި ގްރެގޯރިއޯ ދެއްކި ހުނަރު ފާހަގަކުރެވެއެވެ.
ކުރިޔަށް ރެއަލް މެޑްރިޑަށް އޮތީ ލަލީގާގެ އެންމެ ވާދަވެރި ބާސެލޯނާއާއި ދެކޮޅަށް ކުޅޭ މެޗެވެ. އެ މެޗު އޮންނާނީ އަންނަ އާދިއްތަ ދުވަހުގެ ރޭ، 20:15ގައެވެ.
Advertisement
This content is created and paid for by advertisers and does not involve Voice Journalists
