ފުޓްބޯޅައަކީ ދިވެހިންގެ އެއްވަނަ ކުޅިވަރެވެ. ފުޓްބޯޅައިގެ ތެރެއިން ދިވެހިންނަށްވެސް އަންނަ އެންމެ ބޮޑު އީދަކީ ކޮންމެ ހަތަރު އަހަރަކުން އެއްފަހަރު ބާއްވަމުން އަންނަ ވަރލްޑްކަޕް ފުޓްބޯޅަ މުބާރާތެވެ. ދިވެހިންނަށް ފެނިގެންދިޔަ ވަރލްޑްކަޕް ފުޓްބޯޅަ މުބާރާތުގެ ތެރެއިން އަދިވެސް އެންމެ ފާހަގަކުރެވޭ އެއް މުބާރާތަކީ 2006 ވަނަ އަހަރު ޖަރުމަނުވިލާތުގައި ކުޅުނު ވަރލްޑްކަޕެވެ.

އެފަހަރުގެ ވަރލްޑްކަޕް އެންމެ ފާހަގަވެގެން ދިޔައެއްކަމަކީ މުބާރާތުގެ ފައިނަލުގައި އިޓަލީއަތުން ފަރަންސޭސިން ބަލިވި ބަލިވުމެވެ. މިމެޗް ފަރަންސޭސިން ބަލިވިއިރު، މިމެޗަކީ އޭރު ދުނިޔޭގެ އެންމެ މޮޅު އެއް ފުޓްބޯޅަ ކުޅުންތެރިޔާކަމަށް ގިނަ ބަޔަކު އެއްބަސްވާ ޒައިނުއްދީން ޒިދާންގެ ކެރިއަރު ނިމުމަކަށް އައި މެޗްވެސް މެއެވެ. މެޗްގެ އެންމެ މުހިންމު ވަގުތުގައި ރަތްކާޑަކާއެކު ޒިދާން ދަނޑުން ފައިބަން ޖެހުނީ ކުޅުމުން ބޭރުން ޒިދާން، މާކޯ މަޓެރާޒީ އަށްކުރި ފައުލަކާ ގުޅިގެންނެވެ.

ފަހުން އެނގުނު ގޮތުގައި ޒިދާންގެ ފަރާތުން އެކަން ފެނިގެންދިޔައީ އޭނާގެ ޒާތީކަމަކާ ގުޅޭގޮތުން މަޓެރާޒީ ބުނި އެއްޗަކާ ގުޅިގެން އެކަން ޒިދާނަށް ތަހައްމަލުކުރަން އުނދަގޫ ވެގެންނެވެ. ކޮންމެއަކަސް އެ މެޗްގައި ހިނގާދިޔަ ކަންތައްތަކަށް ބަލާއިރު މެޗްގައި އެންމެ ފާހަގަކުރެވުނު ދެ ކުޅުންތެރިންނަކީ  ޒިދާނާއި، މަޓެރާޒީއެވެ.

2006 ގެ ވަރލްޑްކަޕް ފައިނަލްމެޗްގެ ތެރެއިން.. ފޮޓޯ: ގެޓީ

މިއަދު އަނެއްކާވެސް 19 އަހަރަށްފަހު ދިވެހިންގެ ތެރެއިން ގިނަ މީހުންނަށް އެ ހަނދާންތައް އައުވާނެއެވެ. ފީފާގެ ރައީސް ޖިއާނީ އިންފަންޓީނޯ ރާއްޖެއަށް ކުރާ ޒިޔާރަތުގައި މިއަދު ހަވީރު ގަލޮޅު ދަނޑުގައި ދައްކާލުމުގެ ހާއްސަ ފުޓްބޯޅަ މެޗެއް ވަނީ ކުޅުމަށް ހަމަޖެހިފައެވެ. މިމެޗްގައި ފީފާގެ ރައީސް އިންފަންޓީނޯ އަދި މަޓެރާޒީގެ އިތުރުން ސީނިއާ ބައެއް އޮފިޝަލުންނާއި، ފުޓްބޯޅައިގެ ބައެއް ލެޖެންޑުންވެސް ފެނިގެންދާނެއެވެ. މިމެޗްގައި ފީފާގެ ރައީސްގެ ޓީމްގައި މަޓެރާޒީ ހިމެނޭއިރު، އެޓީމް ބައްދަލުކުރާނީ ރައީސް ޑރ.މުހައްމަދު މުއިއްޒުގެ ކެޕްޓަންކަމުގެ ދަށުން ކުޅޭ ޓީމާއެވެ. 

ފީފާގެ ރައީސް އިންފަންޓީނޯ... ފޮޓޯ: ފީފާ

ފީފާގެ ރައީސް އިންފަންޓީނޯގެ ޓީމްގައި މަޓެރާޒީގެ އިތުރުން، އެފްއޭއެމްގެ ރައީސް އަހުމަދު ތޯރިގާއި، ގަލޮޅުދަނޑުން ފެނިގެންދިޔަ އެންމެ އަހްލާގް ރަނގަޅުކަމަށް ގިނަ ބަޔަކު ގަބޫލްކުރާ އަލީ ޝިހާމް، (ހުރާ އައްޔަ) އާއި މުހުތާރު ނަސީރު (ޓޫލިކޯ) ގެ އިތުރުން އަލީ ސުޒޭންވެސް ފެނިގެންދާނެކަމަށް ވަނީ މައުލޫމާތު ލިބިފައެވެ. މި މެޗްގެ އެއްވެސް ޓީމަކުން ރާއްޖޭގައި އުފެދުނު އެންމެ މޮޅު ފުޓްބޯޅަ ކުޅުންތެރިއާ އަލީ އަޝްފާގް (ދަގަނޑޭ) ނުފެންނާނެއެވެ. ފައިގެ އޮޕަރޭޝަނެއް ކުރުމަށްފަހު އަޝްފާގް މިހާރު އޮތީ ޓްރީޓޮޕް ހޮސްޕިޓަލުގައެވެ.

އެފްއޭއެމުން ބުނީ މިއަދު ހަވީރު ގަލޮޅު ދަނޑުގައި ކުޅުމަށް ހަމަޖެހިފައިވާ މި ހާއްސަ މެޗަކީ ރާއްޖޭގައި މިވަގުތު ގެއްލިފައި އޮތް ފުޓްބޯޅައިގެ ރޫހު އަލުން އަނބުރާ ގެނެސް ފުޓްބޯޅައިގެ ފޯރި އިއާދަކުރުމުގެ ގޮތުން ކުރިއަށްދާ ހަރަކާތުގެ ތެރެއިން ހިމެނޭ މުހިއްމު އެއް އިވެންޓްކަމަށެވެ.