ޅ. ނައިފަރު ފަޅުތެރެއިން 44.8 ހެކްޓަރުގެ ސަރަހައްދެއް ހިއްކުމުގެ އަމަލީ މަސައްކަތް މިއަދު ފަށައިފިއެވެ.

ރައީސް ޑރ. މުޙައްމަދު މުޢިއްޒު ޅ. އަތޮޅަށް ކުރެއްވި ދަތުރުފުޅުގެ ތެރެއިން ނައިފަރުގައި މިއަދު ބޭއްވި ރަސްމިއްޔާތެއްގައި ބިން ހިއްކުމުގެ އަމަލީ މަސައްކަތް ފައްޓަވައި ދެއްވީ ކޮންސްޓްރަކްޝަން އެންޑް އިންފްރާސްޓްރަކްޝާ މިނިސްޓަރު ޑރ. އަބްދުލް މުއްތަލިބެވެ.

މި ރަސްމިއްޔާތުގައި އެމްޓީސީސީގެ ސީއީއޯ އަހުމަދު ސައުދީ އާއި ރައްޔިތުންގެ މަޖިލިހުގެ ނައިފަރު ދާއިރާގެ މެމްބަރު ޔާސީން އަބްދުﷲ ވެސް ބައިވެރިވެވަޑައިގެންނެވިއެވެ.

މި މަޝްރޫއުގެ ދަށުން 44.8 ހެކްޓަރުގެ ބިން ރަށަށް އިތުރުކުރާއިރު، ބިން ހިމާޔަތް ކުރުމަށް ބޮޑެތި މަސައްކަތްތަކެއް ކުރާނެއެވެ. އެގޮތުން، 1،813 މީޓަރުގެ ބޮޑު ހިލައިގެން ރިވެޓްމަންޓް ޖެހުމާއި، 803 މީޓަރުގެ ބޮޑު ހިލައިގެން ބޭރު ތޮށި ލުމުގެ އިތުރުން 474 މީޓަރު ބޮޑު ހިލައިގެ ގްރޮއިން ޖަހާނެއެވެ. މި މަސައްކަތް އެމްޓީސީސީއާ ހަވާލު ކުރީ އެއް އަހަރާއި ނުވަ މަސް ދުވަހުން ނިންމާ ގޮތަށް 679 މިލިއަން ރުފިޔާއަށެވެ.

މި މަޝްރޫއާއެކު ސަރުކާރުން ވަނީ ނައިފަރުގައި 800 ހައުސިން ޔުނިޓް އެޅުމުގެ ބޮޑު މަޝްރޫއެއް ފެށުމަށް ނިންމާފައެވެ.

  ނައިފަރު ބިން ހިއްކުމުގެ އަމަލި މަސައްކަތް މިއަދު ފަށަނީ. -- ފޮޓޯ: އެމްޓީސީސީ

ނައިފަރުގެ ރައްޔިތުންނާއި ބައްދަލުކުރައްވައި ދެއްކެވި ވާހަކަފުޅުގައި ރައީސް ވިދާޅުވީ، ނައިފަރުގެ ބިން ފުރިފައި އޮތުމުގެ ސަބަބުން ރައްޔިތުންނަށް އިންތިހާއަށް ބޯހިޔާވަހިކަން ބޭނުންވެފައިވާއިރު، އިގްތިސާދީ މަސައްކަތް ކުރުމަށް ވެސް ވަނީ ހުރަސް އެޅިފައިވާ ކަމަށާއި، މި ދަތިތަކަށް ހައްލެއް ހޯދައިދިނުމުގެ ގޮތުން، 45 ހެކްޓަރުގެ ބިން ހިއްކުމުގެ މަޝްރޫއަކީ ރައްޔިތުންނާ ގުޅިފައިވާ ނައިފަރަށް އެންމެ މުހިންމު މަޝްރޫއު ކަމަށެވެ. 

އަދި އެ މަޝްރޫއަށް ވަރަށް އިސްކަން ދެއްވާނެ ކަމުގައި ފާހަގަކުރައްވަމުން ރައީސް ވަނީ ނައިފަރު ރައްޔިތުންނާ ބައްދަލުކުރެއްވި ދެ ފަހަރުގައި ވެސް ރައްޔިތުން އެދިވަޑައިގެންފައިވާ ކަންކަން ވަރަށް ރަނގަޅަށް ހަނދުމަފުޅު ހުންނަވާ ކަމަށް ވިދާޅުވެފައެވެ. 

މިއަދު ނައިފަރުގެ ބިން ހިއްކުމުގެ މަސައްކަތް ފެށުމާއެކު، ނައިފަރުގައި އެޅުމަށް ހަމަޖެހިފައިވާ 800 ހައުސިން ޔުނިޓްގެ ތެރެއިން 300 ހައުސިން ޔުނިޓް އެޅުމުގެ މަޝްރޫއު ރޭގައި ވަނީ ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) އާ ހަވާލުކޮށްފައެވެ.

އަދި އިތުރު 100 ހައުސިން ޔުނިޓްގެ މަސައްކަތް ވަރަށް އަވަހަށް ބަޔަކާ ހަވާލުކުރާނެއިރު، ބާކީ 400 ހައުސިން ޔުނިޓް އެޅުމުގެ އަމަލީ މަސައްކަތް 2027 ވަނަ އަހަރު ފެށުމަށް ހަމަޖެހިފައިވެއެވެ. 

 މި މަޝްރޫއަކީ ރަށުގެ ބޯހިޔާވަހިކަމާއި އިގްތިސާދީ ދަތިކަން ހައްލުކުރުމަށް ނައިފަރު ރައްޔިތުންގެ ޒަމާންވީ ހުވަފެނެކެވެ. އެމްޓީސީސީގެ މަހާޖައްރާފް ބޭނުންކޮށްގެން ކުރިއަށްގެންދާ މި މަސައްކަތް ފެށުމާއެކު، ރައީސް ޑރ. މުހައްމަދު މުއިއްޒުގެ ސަރުކާރުން ވަނީ ނައިފަރުގައި 800 ހައުސިން ޔުނިޓް އެޅުމުގެ ބޮޑު މަޝްރޫއެއް ފެށުމަށް ނިންމަވާފައެވެ.