އެންމެ ފަހުގެ ޓެކްނޮލޮޖީގެ އުފެއްދުންތައް ހެދުމަށް ބޭނުންވާ ރެއަރ އާތު މެޓީރިއަލް ހޯދުމަށް ޗައިނާއަށް ބަރޯސާވުން ކުޑަކުރުމަށް ޔޫރަޕުން މަސައްކަތްކުރަމުން އަންނަކަމަށް ޔޫރަޕިއަން ކޮމިޝަންގެ ރައީސާ އުރްސަލާ ވޮން ޑަރ ލެޔަން ވިދާޅުވެއްޖެއެވެ.
ރެއަރ އާތު މެޓީރިއަލްސްއަކީ ފަހުގެ ޓެކްނޮލޮޖީތަކާއި އިލެކްޓްރޯނިކް އާލާތްތައް އުފެއްދުމަށް ބޭނުންވާ އެކިއެކި މައުދަންތަކާއި މިނެރަލްތަކެވެ. މޮބައިލް ފޯނުން ފެށިގެން އިލެކްޓްރޯނިކް ކާރުތަކާއި ހަމަޔަށް، ފަހުގެ ހުރިހާ އުފެއްދުންތަކެއްގައި ރެއަރ އާތު މެޓީރަލް ބޭނުންކުރެއެވެ. ދުނިޔޭގެ އެކި ހިސާބުތަކުގައި މި މައުދަންތަކާއި މިނެރަލްތައް މައިންކުރިނަމަވެސް ޗައިނާއަކީ މިބާވަތްތައް އެންމެ ގިނައިން ނަގާ އެއް ގައުމެވެ. އެމެރިކާއިން ޗައިނާއާ ދެކޮޅަށް އަޅާ ވިޔަފާރީގެ ދަތިކުރުމުގެ ފިޔަވަޅުތަކާއި ޓެރިފް ބޮޑުކުރުމުގެ އަމަލުތަކާއި ދެކޮޅަށް، ޗައިނާއިން ވަނީ އެގައުމުން ރެއަރ އާތު މިނެރަލްސް ބޭރުކުރުން ކޮންޓްރޯލްކޮށްފައެވެ. އެއާއެކު ޔޫރަޕާއި އެމެރިކާގެ އިލެކްޓްރޯނިކް، ސައިންޓިފިކް އަދި އެހެނިހެން ދާއިރާތަކުގެ ކުންފުނިތަކުން ވަނީ ކަންބޮޑުވުން ފާޅުކޮށްފައެވެ.
ޔޫރަޕިއަން ޔޫނިއަން އިން މިހާރު މަސައްކަތްކުރަމުން ދަނީ އޮސްޓްރޭލިއާ، ކެނެޑާ، ޗިލީ، ގްރީންލެންޑް، ކަޒަކިސްތާން އަދި އުޒްބެކިސްތާނާއި ޔޫކްރެއިން އިން ރެއަރ އާތު މެޓީރިއަލް ހޯދުމަށް، އެގައުމުތަކާއެކު އެއްބަސްވުންތަކަށް އައުމަށެވެ. ހަމައެއާއެކު ޔޫރަޕުގައި އުފައްދާ ޕްރޮޑަކްޓްތަކުގައި ބޭނުންކުރާ ރެއަރ އާތު މެޓީރިއަލްތަކަކީ ވީހާވެސް ގިނައިން ރީޔޫޒް ކުރެވޭ ތަކެއްޗަށް ހެދުމަށްވެސް ޔޫރަޕުން ވަނީ ޕްލޭންކޮށްފައެވެ.
Advertisement
This content is created and paid for by advertisers and does not involve Voice Journalists
