ނަސްރުގެ ދުވަހު ބާއްވާ މިލިޓަރީ ޑިސްޕްލޭގެ ރިހާސަލްތަކަށް، މިއަދުން ފެށިގެން އަންނަ ނޮވެމްބަރު 02 އަށް ޓްރެފިކް ފްލޯއަށް ބަދަލުތަކެއް ގެންނަން ފުލުހުން ނިންމައިފިއެވެ.

މިއަދު އެކްސްގައި ފުލުހުން ކުރި ޓްވީޓެއްގައި ބުނީ މި ރިހާސަލްތައް ކުރިއަށް ގެންދިޔުމަށް ހަމަޖެހިފައިވަނީ ކޮންމެ ދުވަހެއްގެ 15:30 އިން 18:00 އަށް އަދި 23:00 ގެ ފަހުން ކަމަށެވެ.

އެ ދުވަހުގެ ހަރަކާތްތަކަށް ރައީސް އޮފީހުން ފެށިގެން ޖުމްހޫރީ މައިދާން ހިމެނޭ ސަރަޙައްދުން ބޮޑުތަކުރުފާނު އެއްކޮށް ބަންދުކުރާއިރު، ޖުމްހޫރީ މައިދާން ހިމެނޭ އަމީރު އަޙްމަދުމަގު، ޗާންދަނީ މަގު އަދި އޯކިޑު މަގުގެ ބައެއް ހަމައެކަނި މަނާވަނީ އެއްގަމު ދުއްވާ އުޅަނދުތަކަށެވެ.  އެހެންކަމުން އެ މަގުތަކުގައި ހިނގާފައި އުޅުމުގެ ފުރުސަތު ލިބޭނެއެވެ.

އެއާއެކު ރައީސް އޮފީސް ކުރިމަތިން ފެށިގެން ޖުމްހޫރީ މައިދާން ސަރަހައްދުގެ ފަޅުތެރެ ވެސް އެ ވަގުތަށް ބަންދުވާނެ ކަމަށް ފުލުހުން ވަނީ ބުނެފައެވެ.

ނޮވެންބަރުމަހުގެ ތިންވަނަ ދުވަސް ފާހަގަކުރަނީ ތަމަޅައިގެން ހަނގުރާމަވެރި ޖަމާއަތުގެ ބަޔަކު މާލެ ހިފުމަށް ކުރި މަސައްކަތް ނާކާމިޔާބުވެ، ދިވެހިންނަށް ލިބުނު ކާމިޔާބީ ފާހަގަކުރުމަށެވެ. މިއަހަރުވެސް ނަސްރުގެ ދުވަސް ފާހަގަކުރުމަށް ހާއްސަ ހަރަކާތްތަކެއް ކުރިއަށް ގެންދިޔުމަށް ދިފާއީ ބާރުން ދަނީ ތައްޔާރީތަށް ވަމުންނެވެ.