މިއަދު އެކުއެކީ ތަންފީޒުވެގެން މިދިޔައީ މުހިންމު ތިންކަމެއް ކަމަށާއި، އޭގެ މަންފާ ރައްޔިތުންނަށް ފުރިހަމައަށް ކުރާނޭކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.

ސަރުކާރުން މިއަދު ވަނީ ރައްޔިތުންނާ ވަރަށްބޮޑަށް ގުޅިފައިވާ މުހިންމު ތިން ކަމެއް ތަންފީޒުކުރަން ފަށާފައެވެ.

މިކަމާ ގުޅިގެން ރައީސް ޑރ.މުއިއްޒު އެކްސްގައި ކުރެއްވި ޕޯސްޓެއްގައި ވަނީ 2007 ޖެނުއަރީ 1 އިން ފެށިގެން އުފަންވެފައިވާ އަދި އުފަންވާނޭ ހުރިހާ ދިވެހި ރައްޔިތުންނަށް ދުންފަތުގެ ޖެނެރޭޝަނަލް ބޭން ތަންފީޒުކުރަން ފެށުމާއި، ކަށި މިޔަރު ބޭނުމުގެ ހުއްދަ މެނޭޖްމަންޓް ޕްލޭނެއްގެ ދަށުން ހުއްދަކުރުމުގެ އިތުރުން ކައުންސިލްތަކުގެ މުވައްޒަފުން ހިމެނޭހެން ސިވިލް ސާރވިސް ގެ ހުރިހާ މުވައްޒަފުންނާއި ޖުޑިޝަރީގެ މުވައްޒަފުންގެ ޕޭ ހާމަނައިޒް ކުރެވި މުސާރަ ބޮޑުކުރެވިފައިވާކަން ފާހަގަކުރައްވާފައެވެ.

ރައީސް ވަނީ އެ ތިން ކަންތައް ހަގީގަތަކަށް ހެދުމުގައި މަސައްކަތްކޮށްދެއްވި އެންމެހާ ފަރާތްތަކާއި އަދި އެކަމަށް އެއްބާރުލުން ދެއްވި ފަރާތްތަކަަށް ވެސް ޝުކުރު އަދާކުރައްވާފައެވެ. އަދި އެ ތިން ކަންތައް ތަންފީޒުކުރުމުން އޭގެ ފައިދާ ކުރާނެ ފަރާތްތަކާއި ދިވެހި ރައްޔިތުންނަށް ވެސް އެމަނިކުފާނު ވަނީ މަރްހަބާ ދަންނަވައިފައެވެ.

މިއަދު ތަންފީޒު ކުރަންފެށި ކަންތައްތަކުގެ ތެރެއިން އެންމެ މުހިންމު އެއްކަމަކީ ޖެނަރޭޝަނަލް ބޭންއެވެ. އެކަން މިއަދު ތަންފީޒުކުރަން ފެށުމާއެކު 2007 ވަނަ އަހަރުެގ ޖެނުއަރީ 1 ކުން ފެށިގެން، އޭގެ ފަހަށް ރާއްޖޭގައި އުފަންވެފައިވާ ހުރިހާ ކުދީންނަށް، އަދި މީގެ ފަހުން އުފަންވާނެ ހުރިހާ ކުދީންނަށްވެސް، ދުންފަތުގެ އިސްތިޢުމާލު ކުރުމާއި ދުންފަތް ގަނެވިއްކުންވެސް މަނާވާނެއެވެ. 

މިއީ ދިވެހި ދައުލަތުން ދުންފަތާ ދެކޮޅަށް އެޅި އެންމެ ހަރުކަށި ފިޔަވަޅެވެ.

ނަތީޖާއަކަށްވާނީ މި ޖީލު ހެދި ބޮޑުވެ ހަރު މީހުންނަށް ވާއިރު، މުޅި މުޖުތަމަޢަކީ، ދުންފަތުގެ ނުރައްކަލުން ސަލާމަތްވެފައިވާ، އަދި ދުންފަތާ ދުރު މުޖުތަމަޢަކަށްވުންކަަމަށް ރައީސް ވަނީ ވިދާޅުވެފައެވެ.