ދުންފަތުގެ ވަބާއިން ޤައުމު ސަލާމަތް ކޮށްދެވޭނީ ނިކަން ވަރުގަދަ ވެރިންނަށް ކަމަށާއި، މިއީ ވެރިޔަކަށް ޤައުމަށް ކޮށްދެވޭނެ އެންމެ މުހިންމު ކަންތައްކަމަށް މަސްވެރިކަމާބެހޭ ވަޒީރު އަޙްމަދު ޝިޔާމް ވިދާޅުވެއްޖެއެވެ.

ޖެނަރޭޝަނަލް ބޭނަށް އަމަލުކުރަން ފެށުމާ ގުޅޭގޮތުން ދިވެހިންގެ ލޭނާރު މިނިސްޓަރު ވިދާޅުވީ ޤައުމެއްގެ ޙަޔާތުގައި ޖެނެރޭޝަނަލް ބޭން އޮން ޓޮބޭކޯ ފަދަ ކަންކަން ތަންފީޒުކުރެވޭނީ "ނިކަން މައިބަދަ ވަރުގަދަ ވެރިންނަށް" ކަމަށެވެ. ވަޒީރު ވިދާޅުވީ، ވޭތުވެދިޔަ ސަރުކާރުތަކަށް އުނދަގޫވި ނަމަވެސް، ޤައުމެއްގެ މުސްތަޤުބަލަށް ވެރިއަކަށް ކުރެވޭމެ އެންމެ މުހިންމު އެއް ކަމަކީ އެއީ ކަމަށެވެ.

އަދި އެފަދަ ކަންކަން ނިންމާއިރު އެކި ޒާތުގެ ފިއްތުންތަކާއި ނުފޫޒުތައް ފޯރުވަން އެކި ފަރާތްތަކުން މަސައްކަތްކުރާ ކަމަށާއި، ރަނގަޅު ނިންމުންތައް ނިންމުމުގައި ގިނަވެެރިން ފެއިލްވަނީ އެފަދަ ނުފޫޒުތަކުގައި ޖެހިގެން ކަމަށް ވެސް ވަޒީރު ވިދާޅުވިއެވެ.

މިއަދުން ފެށިގެން 2007 ޖެނުއަރީ 1 އިން ފެށިގެން އުފަންވެފައިވާ އަދި އުފަންވާނޭ ހުރިހާ ދިވެހި ރައްޔިތުންނަށް ދުންފަތުގެ ޖެނެރޭޝަނަލް ބޭން ތަންފީޒުކުރަން ފެށިފައިވާއިރު، މަޖިލީހުން ފާސްކުރި އެ ބިލު ރައީސުލްޖުމްހޫރިއްޔާ ޑރ މުޙައްމަދު މުޢިއްޒު ތަސްދީޤު ކުރައްވާފައިވަނީ މިއަހަރުުގެ މެއިމަހުގެ 21 ވަނަ ދުވަހުއެވެ.

ދިވެހިރާއްޖޭގެ ދުންފަތް ކޮންޓްރޯލްކުރުމާބެހޭ ޤާނޫނަށް ގެނައި އިޞްލާޙާއެކު އަންނާނެ ބައެއް ބަދަލުތަކުގެ ތެރޭގައި ހިމެނެނީ:

1. މި ޤާނޫނަށް ޢަމަލުކުރަން ފެށުމާއެކު، 1 ޖެނުއަރީ 2007 ން ފެށިގެން، އޭގެ ފަހަށް ރާއްޖޭގައި އުފަންވެފައިވާ ހުރިހާ ކުދީންނަށް، އަދި މީގެ ފަހުން އުފަންވާނެ ހުރިހާ ކުދީންނަށްވެސް، ދުންފަތުގެ އިސްތިޢުމާލު ކުރުމާއި ދުންފަތް ގަނެވިއްކުންވެސް މަނާވާނެއެވެ. ނަތީޖާއަކަށްވާނީ މި ޖީލު ހެދި ބޮޑުވެ ހަރު މީހުންނަށް ވާއިރު، މުޅި މުޖުތަމަޢަކީ، ދުންފަތުގެ ނުރައްކަލުން ސަލާމަތްވެފައިވާ، އަދި ދުންފަތާ ދުރު މުޖުތަމަޢަކަށްވުމެވެ.

2. ދުންފަތް، އިލެކްޓްރޯނިކް ސިނގިރޭޓް، ވޭޕް ފަދަ ތަކެތި އުފެއްދުމަށް ބޭނުންކުރާ ހުރިހާ މެޝިނަރީއާއި އާލާތްތަކާއި، އެފަދަ ތަކެއްޗާއެކު ބޭނުންކުރާ ހުރިހާ ބާވަތެއް، ރާއްޖެ އެތެރެކުރުމާ ގެންގުޅުން މަނާ ވާނެއެވެ.

3. ދުންފަތުގެ އެއްވެސް ބާވަތެއް އިޝްތިހާރުކުރުން، ސްޕޮންސަރކުރުން، ޕްރޮމޯޓްކުރުން ފަދަ އެއްވެސް ކަމެއް ކުރުން މުޅީން މަނާ ވާނެއެވެ.

4. މި ޤާނޫނާ ޚިލާފަށް، ގެންގުޅޭ ތަކެތި ހިފެހެއްޓުމުގެ ބާރު ތަންފީޒީ އިދާރާތަކަށް ލިބިދިނުމާއެކު، އެ އަތުލައިގަނެވޭ، ދުންފަތާ، އިލެކްޓްރޯނިކް ސިނގިރޭޓް، ވޭޕް އަދި އެފަދަ ތަކެތި އުފައްދާ މެޝިނަރީ ފަދަ ހުރިހާ އެއްޗެއް ރައްޔިތުންނަށް ސީދާ ޔަގީންކަން އޮންނަ ގޮތުގައި އިތުބާރާއެކު ނައްތާލެވޭނެ ނިޒާމެއް ކަނޑައެޅިފައިވެއެވެ.

މިއަދުން ފެށިގެން ޖެނަރޭޝަނަލް ބޭންއަށް އަމަލުކުރަން ފެށިގެންދިޔައިރު މިއީ ދިވެހިރާއްޖޭގެ ތާރީހުގައިވެސް ރާއްޖެއިން މިހާތަނަށް އެޅި އެންމެ ހަރުކަށި ފިޔަވަޅެވެ.