ދުންފަތުގެ ވަބާއިން ދިވެހި ޖީލް ސަލާމަތްކުރުމަށް މިއަދު ތަންފީޒުކުރަންފެށި ސިނގިރޭޓުގެ ބޭންއަކީ ޖީލުތަކުގެ ދުޅަހެޔޮކަމަށް އެޅުނު ބާރުގަދަ ފިޔަވަޅެއް ކަމަށް ފަސްޓް ލޭޑީ ސާޖިދާ މުޙައްމަދު ވިދާޅުވެއްޖެއެވެ.

2007 ފެށިގެން އުފަންވެފައިވާ އަދި އޭގެފަހުން ވެސް އުފަންވާ ކުދިންނަށް ޤާނޫނީގޮތުން ދުންފަތް މިއަދުން ފެށިގެން މަނާވުމާއި ގުޅިގެން "އެކްސް"ގައި ކުރެއްވި ޕޯސްޓެއްގައި ފަސްޓް ލޭޑީ ވިދާޅުވީ، މިއަދު ރާއްޖެއިން ދުނިޔެއަށް މި ދެއްކި މިސާލަކީ، ދުންފަތުން ސަލާމަތްވެފައިވާ ރާއްޖެއަކަށް ވާސިލުވުމަށްޓަކައި އޭޅޭ ވަރަށް މުހިންމު ވިޔަވަޅެއް ކަމަށެވެ.

އަދި ސިއްޚީ ދާއިރާގެ އެކި ކަންކަމުގައި ވަކާލާތުކުރާ ފަރާތެއްގެ ޙައިސިއްޔަތުން ދުންފަތް މަނާކުރަން ސަރުކާރުން އިސްނަގައި، އަންނަން އޮތް ޖީލުތަކުގެ ދުޅަހެޔޮކަމަށްޓަކައި އެޅި ބާރުގަދަ އިންވެސްޓްމެންޓަށް ފަސްޓް ލޭޑީ ވަނީ ތަޢުރީފުކުރައްވައިފައެވެ.

ފަސްޓް ލޭޑީ އެފަދައިން ވިދާޅުވިއިރު، ރާއްޖޭގައި ދުންފަތް މަނާކުރީ ދުންފަތުގެ ވަބާއިން ދުރުވެފައިތިބޭ އަދި އެފަދަ ނުރައްކާތެރި ކަންކަމުން ސިއްހަތު ސަލާމަތުން ތިބޭ ބަޔަކަށް ހެދުމަށް ކަމަށް ރައީސް ވެސް ވަނީ މީގެ ކުރިން ވިދާޅުވެފައެވެ.

އެގޮތުން ދުންފަތް ކޮންޓްރޯލްކުރުމަށް ޤާނޫނީގޮތުން ބާރުވެރިކަން ގެނައީ އެކަމުން ދުރުހެލިވުމަށް ބބާރުއެޅުމުގެ ގޮތުންކަމަށް ވެސް އެ ދުވަހު ރައީސް ވިދާޅުވިއެވެ.

މިއަދު ތަންފީޒު ކުރަންފެށި ކަންތައްތަކުގެ ތެރެއިން އެންމެ މުހިންމު އެއްކަމަކީ ޖެނަރޭޝަނަލް ބޭންއެވެ. އެކަން މިއަދު ތަންފީޒުކުރަން ފެށުމާއެކު 2007 ވަނަ އަހަރުެގ ޖެނުއަރީ 1 ކުން ފެށިގެން، އޭގެ ފަހަށް ރާއްޖޭގައި އުފަންވެފައިވާ ހުރިހާ ކުދީންނަށް، އަދި މީގެ ފަހުން އުފަންވާނެ ހުރިހާ ކުދީންނަށްވެސް، ދުންފަތުގެ އިސްތިޢުމާލު ކުރުމާއި ދުންފަތް ގަނެވިއްކުންވެސް މަނާވާނެއެވެ. 

މިއީ ދިވެހި ދައުލަތުން ދުންފަތާ ދެކޮޅަށް އެޅި އެންމެ ހަރުކަށި ފިޔަވަޅެވެ.

ނަތީޖާއަކަށްވާނީ މި ޖީލު ހެދި ބޮޑުވެ ހަރު މީހުންނަށް ވާއިރު، މުޅި މުޖުތަމަޢަކީ، ދުންފަތުގެ ނުރައްކަލުން ސަލާމަތްވެފައިވާ، އަދި ދުންފަތާ ދުރު މުޖުތަމަޢަކަށްވުންކަަމަށް ރައީސް ވަނީ ވިދާޅުވެފައެވެ.