އިދިކޮޅު އެމްޑީޕީގެ މުޒާހަރާއެއްގެ ތެރެއިން ރައީސް ޑރ. މުޙައްމަދު މުޢިއްޒުގެ ދަރިކަލަކާއި ބެހޭ ގޮތުން އެ ޕާޓީގެ އެކްޓްވިސްޓް، މަރިޔަމް ޒުބައިރު (މަންދީ) ދެއްކި ވާހަކަތަކާއި ގުޅިގެން މަންދީގެ މައްޗަށް ކުރި ޙުކުމް ބާތިލްކޮށްދިނުމަށް އެދި މަންދީ ކޯޓަށް ހުށަހެޅި މައްސަލަ ކޯޓުން ބޭރުކޮށްފިއެވެ.

މިދިޔަ އޭޕްރީލް މަހު މަންދީ އާއި ދެކޮޅަށް ކުރި ޙުކުމާއި ގުޅިގެން މިދިޔަ ސެޕްޓެމްބަރު މަހުގެ ތެރޭގައި މަންދީގެ ފަރާތުން ސިވިލް ކޯޓަށް އެ މައްސަލަ ހުށަހެޅީ، އޭރު މަންދީގެ ޣައިރު ހާޒިރުގައި ކުރި ޙުކުމް ބާތިލްކުރުމަށް އެދިއެވެ.

އެގޮތުން މަންދީ އާއި ދެކޮޅަށް ކުރި ޙުކުމުގައި ބުނީ، ރައީސްގެ ދަރިކަލުންނާއި ގުޅުވައި ދެއްކި ވާހަކަތަކުން އެ ކުއްޖާގެ އަބުރަށް އުނިކަން އައިސްފައިވާ ކަމަށާއި، އެކަމުގެ ސަބަބުން ބަދަލު ހޯދުމުގެ ފުރުސަތު އޮތް ކަމަށެވެ.

އަދި އެކަމާއި ގުޅިގެން ރައީސްގެ އަނބިކަނބަލުން މެޑަށް ސާޖިދާ މުޙައްމަދުގެ ކިބައިން މާފަށް އެދުމަށް އެ ޙުކުމުގައި ވެއެވެ.

އެ ޙުކުމް ބާތިލްކުރުމަށް މަންދީގެ ފަރާތުން ސިވިލް ކޯޓަށް މައްސަލައެއް ހުށަހެޅި ނަމަވެސް، އެ މައްސަލަ ބޭރުކުރަމުން ސިވިލް ކޯޓުން ކުރި ޙުކުމުގައި ބުނީ، އެ މައްސަލައިގައި ދައުވާކުރި ފަރާތް ކަމަށްވާ މަންދީ ކޯޓަށް ހާޒިރުވުމަށް ފޮނުވި ޗިޓާއި ހަވާލުވުމަށްފަހުވެސް ގަޑިއަށް ހާޒިރުވެފައިނުވާ ކަމަށެވެ.

އެގޮތުން އެ މައްސަލައިގެ އަޑުއެހުމަށް މިދިޔަ ބުދަ ދުވަހު 11:30 ކީއިރުވެސް، މަންދީގެ އައްޔަންކޮށްފައިވާ ތިން ވަކީލުންގެ ތެރެއިން އެއްވަކީލަކުވެސް ހާޒިރު ވެފައިނުވާ ކަމަށް އެ ޙުކުމުގައި ވެއެވެ. 

އެގޮތުން އެ ދުވަހުގެ ޝަރީއަތް ފެށޭ ވަގުތުގެ 15 މިނެޓުވީއިރު ވެސް ވަކީލުން ވަޑައިގަންނަވާ ކަމަށް ވިދާޅުވި ނަމަވެސް، ގާތްގަޑަކަށް އިތުރު 5 މިނެޓަށް ޝަރީއަތް ފެށުން ލަސްކުރިއިރު ވެސް ވަކީލުން ޙާޒިރުވެފައިނުވާ ކަމަށާއި، އެކަމާއިި ގުޅިގެން ކޯޓުން ވަކީލުންނަށް ގުޅުމުން ވަކީލު ވިދާޅުވީ އެ ލޯފާމުގެ ހުރިހާ ވަކީލުންހެން ތިބީ ޝަރީއަތްތަކުގައި ކަމަށާއި އެއް ވަކީލަކު ހުސްކޮށް ހުރިނަމަވެސް ބަލިހާލަތު ހުރި ގޮތުން އެ ވަކީލު ކޯޓަށް ހާޒިރުވާން އުޒުރުވެރިވާ ކަމަށެވެ.

އަދި ލިޔުމުން އެކަން ކޯޓަށް އަންގާނެ ކަމަށް ވެސް ވަކީލުން ވިދާޅުވި ކަމަށް ވެސް ޙުކުމުގައި ބުންޏެވެ.

އެހެން ނަމަވެސް އެރޭ 19:00 ޖެހިއިރު ވެސް ވަކީލުންގެ ފަރާތުން ކޯޓަށް އެއްވެސް ލިޔެކިޔުމެއް ހުށަހަޅައިފައިނުވާ ކަަމަށް ވެސް އެ ޙުކުމުގައި ބުންޏެވެ.