ކުރީގެ ރައީސް މައުމޫން އަބްދުލް ޤައްޔޫމަށް، ތިނެއް ނޮވެމްބަރުގެ ޚާއްސަ ޝަރަފުގެ އައްޑަނައެއް އެރުވުމަށް ރައީސް ޑރ. މުޙައްމަދު މުޢިއްޒު ނިންމަވައިފިއެވެ.

ރައީސް މައުމޫނަށް މި އައްޑަނަ އަރުވާނީ މި އަހަރުގެ ނަސްރުގެ ދުވަހުގެ މުނާސަބަތުގައި މާދަމާ ހެނދުނު އޮންނަ ރަސްމީ ޖަލްސާގައެވެ. މި ޖަލްސާ އޮންނާނީ މާދަމާ ހެނދުނު 09:00 ގައި، ސޯޝަލް ސެންޓަރުގައެވެ.

ރައީސް އޮފީހުން މިއަދު ބުނި ގޮތުގައި ރައީސް މައުމޫނަށް މި އައްޑަނަ އެރުވުމަށް ނިންމެވީ، 3 ނޮވެންބަރުގެ އުދުވާނީ ހަމަލައިގައި އޭރުގެ ރައީސްގެ ގޮތުގައި ހުންނަވާ އެމަނިކުފާނު ކުރެއްވި ތައުރީފު ހައްގު މަސައްކަތްޕުޅުތަކުގެ އަގު ގައުމީ ފެންވަރެއްގައި ވަޒަންކުރެއްވުމުގެ ގޮތުންނެވެ.

މާދަމާގެ ޖަލްސާގައި 3 ނޮވެންބަރުގެ ޝަހީދުންގެ އާއިލާތަކަށް ހަނދާނީ އައްޑަނައެއް އެރުވުމަށް ވެސް ރައީސް ވަނީ ނިންމަވާފަ އެވެ. ޝަހީދުންގެ އާއިލާތަކަށް މި އައްޑަނަ އަރުވަނީ، އެ ދުވަހުގެ ހަމަލައިގައި ސިފައިންގެ ތެރެއިން ޝަހީދުވި ބޭފުޅުންނާއި އާންމުންގެ ތެރެއިން ޝަހީދުވި ބޭފުޅުންގެ ހިދުމަތުގެ އަގު ގައުމީ ފެންވަރެއްގައި ވަޒަންކުރެއްވުމުގެ ގޮތުން ކަމަށް ވެސް ރައީސް އޮފީހުން ބުންޏެވެ.

މާދަމާގެ ޖަލްސާގައި ރައީސް ޑރ. މުޙައްމަދު މުޢިއްޒު ވެސް ޤައުމާއި މުޚާތަބުކުރައްވާނެއެވެ. އަދި ޑިފެންސް މިނިސްޓަރު މުހައްމަދު ގައްސާން މައުމޫން ވެސް ވާހަކަފުޅުދައްކަވާނެ އެވެ.