ޝަހީދު ހުސައިން އާދަމްގެ އެ ޒިކުރާ އަބަދަށް އާވަމުންދާނެ: ޝާހިދު
ނޮވެމްބަރު 3 ގެ ބަތޮލް ޝަހީދު ހުސައިން އާދަމްގެ އެދުވަހުގެ ޒިކުރާ ދިވެހި ފަސްގަނޑުގައި އަބަދުމެ އާވަމުންދާނޭކަމަށް އެމްޑީޕީގެ ރައީސް އަދި ކުރީގެ ހާރިޖީ ވަޒީރު ޢަބްދުﷲ ޝާހިދު ވިދާޅުވެއްޖެއެވެ.
މިއަދު ފާހަގަކުރަމުންދާ ނަސްރުގެ ދުވަހުގެ މުނާސަބަތުގައި އެކްސްގައި ކުރެއްވި ޕޯސްޓެއްގައި ޝާހިދު ވިދާޅުވީ، ނިރުބަވެރިން ދިވެހިރަައްޖޭގެ ސިފައިންގެ މަރުކަޒުގެ މައިގޭޓުން ވަނަނުދީ ދިފާޢުކުރެއްވުމުގައި ޝަހީދުވި ބަތަލު ޝަހީދު ޙުސައިން އާދަމް ދެއްކެވި ސާބިތުކަމާއި ހިތްވަރާއި ވެވަޑައިގެންނެވި މަތިވެރި ޤުރުބާނީ ގެ ހަނދާން އަބަދުގެ އަބަދަށް ދިވެހި މިބިމުގައި ތަކުރާރުވެ ޛިކްރާ ވެވެމުންދާނެކަމަށެވެ.
ޝާހިދު ވަނީ އެ ބިރުވެރި ނާމާން ދުވަހު މި ލޮބުވެތި ޤައުމުގެ ދިފާޢުގައި ހިތްވަރުގަދަ ދިވެހި ސިފައިން ސާބިތުކަމާއިއެކު ކުރެއްވި އަގުހުރި ޖިހާދުގެ ހަނދާން އާކޮށް އައްސަރިބަހާއި ސާބަސް ދަންނަވައި، ނުރައްކާތެރި ވަގުތުގައި ދިވެހި ރައްޔިތުން ދެއްކެވި އެކުވެރިކަމާއި އެއްބައިވަންތަ ކަމާއި، ހިތްވަރާއިއެކު ކުރެއްވި މަސައްކަތްތައް ފާހަގަކުރައްވާފައެވެ.
އަދި ޝާހިދު ވަނީ ދިވެހި ސަރުކާރުގެ އެދިވަޑައިގަތުމަށް އެންމެ އެކުވެރި އަވަށްޓެރި އިންޑިޔާގެ ސަރުކާރުންދެއްވި އަވަސް އިޖާބައަށާއި، ވެދެއްވި ދީލަތި އެހީތެރިކަމަށް އިންޑިއާ ސަރުކާރަށް އިޚްލާސްތެރިކަމާއިއެކު ޝުކުރު ދަންނަވާފައެވެ.
ކޮންމެ އަހަރެއްގެވެސް ނޮވެމްބަރުމަހުގެ 3 ނަސްރުގެ ދުވަހުގެ ގޮތުގައި ފާހަގަކުރަނީ ދިވެހިންގެ ބަޔަކު ތަމަޅައިންގެ ބަޔަކާ ގުޅިގެން ރައްޖޭގެ ވެރިކަން ފުރޮޅާލުމަށް ކުރި މަސައްކަތް ދިވެހިންނަށް ކާމިޔާބުވި ދުވަހެއްގެ ގޮތުގައެވެ.
ނޮވެމްބަރު ތިނެއްގެ އުދުއާން ހާދިސާ ހިނގިއިރު ޢަބްދުﷲ ޝާހިދަކީ އޭރު ދިވެހި ހާރިޖިއްޔާގެ އެސިސްތަންޓް ޑިރެކްޓަރެކެވެ. ހާދިސާ ހިނގިއިރު އޭރު ޝާހިދު ހުންނެވީ އެމެރިކާގެ ނިއުޔޯކްގައެވެ.
Advertisement
This content is created and paid for by advertisers and does not involve Voice Journalists
