ސިފައިންގެ އަސްކަރީ ހުށަހެޅުމުގެ ހަރަކާތް، އާންމުންގެ ބޮޑު ތަރުހީބެއް

ސިފައިންގެ އަސްކަރީ ހުށަހެޅުމުގެ ހަރަކާތް -- ފޮޓޯ: ރައީސް އޮފީސް

ނަޞްރުގެ ދުވަހުގެ މުނާސަބާ ފާހަގަ ކުރުމަށް، ދިވެހި ގައުމީ ދިފާޢީ ބާރު، އެމްއެންޑީއެފުން ސިފައިންގެ އަސްކަރީ ހުށަހެޅުމުގެ ހަރަކާތެއް ބާއްވައިފި އެވެ.

މިއަދު އޮތް ހަރަކާތްތައް ދިވެހިރާއްޖޭގެ ރައީސުލްޖުމްހޫރިއްޔާ އަދި ސިފައިންގެ އެންމެ މަތީވެރިޔާ ޑރ. މުޙައްމަދު މުޢިއްޒުއާއި އެމަނިކުފާނުގެ އަނބިކަނބަލުން ސާޖިދާ މުޙައްމަދު ވަނީ ބައްލަވާލައްވާފަ އެވެ. އަދި އާންމުންގެ ވަރަށް ގިނަ ބަޔަކުވެސް ވަނީ އެ ހަރަކާތް ބަލާލަން ޖަމާވެފަ އެވެ.

ސިފައިންގެ އަސްކަރީ ހުށަހެޅުމުގެ ހަރަކާތް -- ފޮޓޯ: ރައީސް އޮފީސް

މިއަދު ހަވީރު އޮތް، މި ހަރަކާތް ހުށަހެޅުމުގެ ރަސްމިއްޔާތަށް ރައީސުލްޖުމްހޫރިއްޔާގެ ދެކަނބަލުން ޖުމްހޫރީ މައިދާނަށް ވަޑައިގެންނެވުމުން، އިސްތިގްބާލު ކުރެއްވީ މިނިސްޓަރ އޮފް ޑިފެންސް މުޙައްމަދު ޣައްސާން މައުމޫނާއި ޗީފް އޮފް ޑިފެންސް ފޯސް މޭޖަރ ޖެނެރަލް އިބްރާހީމް ހިލްމީ އެވެ.

އަސްކަރީ ހުށަހެޅުމުގެ ޙަރަކާތް ފެށުމުގެ ކުރިން، ދިވެހި ސިފައިން ވަނީ، ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒަށް އަސްކަރީ ކުރުނީހެއް އަރުވައިފަ އެވެ. އެއަށްފަހު، ޗީފް އޮފް ޑިފެންސް ފޯސް މޭޖަރ ޖެނެރަލް އިބްރާހީމް ޙިލްމީ ވާހަކަފުޅު ދެއްކެވި އެވެ.

ސިފައިންގެ އަސްކަރީ ހުށަހެޅުމުގެ ހަރަކާތް -- ފޮޓޯ: ރައީސް އޮފީސް

މި ރަސްމިއްޔާތުގައި، ދިވެހި ޤައުމީ ދިފާޢީ ބާރުން ކުރިއަށް ގެންދިޔަ ޚާއްޞަ އަސްކަރީ ހުށަހެޅުންތަކުގައި، ފެނިގެންދިޔައީ ދިވެހިރާއްޖެއަށް ކުރިމަތިވެދާނެ ނިރުބަވެރި ހަމަލާއަކުން ދިވެހި ޤައުމާއި ރައްޔިތުން ސަލާމަތްކުރުމަށްޓަކައި ދިވެހި އަސްކަރިއްޔާގެ ގުޅިފައިވާ ބާރުތަކުން ހިންގާ ޖޮއިންޓް އޮޕަރޭޝަންގެ ޙަރަކާތްތަކެވެ.

ސިފައިންގެ އަސްކަރީ ހުށަހެޅުމުގެ ހަރަކާތް -- ފޮޓޯ: ރައީސް އޮފީސް

މި ހަރަކާތުގައި، ދިވެހި ސިފައިންގެ ސްޕެޝަލް ބޯޓް ސްކޮޑްރަން، ސްޕެޝަލް ފޯސަސްގެ ޙަރަކާތްތަކާއި، ރެޕަލިންގްގެ ޙަރަކާތްތަކާއި ކައުންޓަރ އެޓޭކެއްގެ މައިދާނީ ޙަރަކާތްތަކެއް ފެނިގެންދިޔައެވެ.

ސިފައިންގެ އަސްކަރީ ހުށަހެޅުމުގެ ހަރަކާތް -- ފޮޓޯ: ރައީސް އޮފީސް

މި ހުށަހެޅުމަށްފަހު، ދިވެހި ސިފައިންގެ އޮޕަރޭޝަނަލް ޤާބިލުކަމުގެ މައްޗަށް ތައްޔާރުކޮށްފައިވާ ވީޑިއޯ ރިޕޯޓެއްވެސް ދައްކާފައިވެއެވެ.

ސިފައިންގެ ޢަސްކަރީ ހުށަހެޅުމުގެ މި ޙަރަކާތްތައް ނިންމައިލުމުގެ ގޮތުން، ހަނދާނީ ގުރޫޕު ފޮޓޯއެއް ނެންގެވި އެވެ.

ކޮމެންޓް