ވޭތުވެދިޔަ 6 އަހަރުގެ ތެރޭގައި ވެސް ނުފެންނަވަރުގެ ބޮޑު ހަނދެއް މިރޭ ފެންނާނެ ކަމަށް ފަލަކީ އިލްމުވެރިން ބުނެފިއެވެ.

މިރޭގެ ހަނދު ފެންނާނީ އާދަޔާ ހިލާފަށް އަލިގަދަކޮށް، އަދި ބޮޑުކޮށެވެ. މިއީ ފާއިތުވި ހަ އަހަރު ދުވަހުގެ ތެރޭގައި ދުނިޔެއާ އެންމެ ކައިރިއަށް ހަނދު ފެންނާނެ ސުޕަމޫނެވެ. 

"ސުޕަމޫން" އަހަރެމެންނަށް ފެނިގެންދަނީ، ކޮންމެ މަހަކު ދުނިޔޭގެ ވަށައިގެން ހަނދު ދައުރުވާ އެލިޕްޓިކަލް އޯބިޓުގެ ޕެރިޖީ (އެންމެ ކައިރި ޕޮއިންޓް) އާއި ފުލް މޫން އެއްކޮށް ދިމާވުމުންނެވެ. މިރޭގެ ހަނދު ދުނިޔެއާއި އޮންނަ ދުރުމިނަކީ ގާތްގަނޑަކަށް 356،980 ކިލޯމީޓަރެވެ. މިއީ ދުނިޔެއާއި އެންމެ ކައިރީގައި ހަނދު އޮންނަ ހިސާބެވެ.

އެންމެ ފަހުން މިހާ ކައިރިން ހަނދު ފެނިގެން ދިޔައީ 2019 ވަނަ އަހަރުގެ ފެބްރުއަރީގައެވެ. "ސްނޯ މޫން"ގެ ނަމުން ނަންދެވިފައިވާ އެ ހަނދު އެރޭ ދުނިޔެއާއި 134 ކިލޯމީޓަރު ކައިރިވެފައި އޮތް ކަމަކަށް ފަލަކީ އިލްމުވެރިން މައުލޫމާތު ދީފައިވެއެވެ. 

"ބީވަމޫން" ގެ ނަމުން ވެސް ނަންދެވިފައިވާ މި ހަނދު އަރަން ފަށާނީ މިރޭގެ އިރުއޮއްސޭއިރެވެ. އެންމެ ރަނގަޅަށް މި ހަނދު ފެންނަން ހުންނާނީ އިރުއޮއްސޭތާ 30 މިނެޓް ފަހުންނެވެ. ފަލަކީ އިލްމުވެރިން ބުނާގޮތުގައި މުޅި ރޭ އުޑުމަތިން ހަނދު ފެންނަން ހުންނާނެއެވެ.

މި އަހަރު ޖުމުލަ ތިން ސުޕަމޫން ފެންނާނެ ކަމަށް ފަލަކީ އިލްމުވެރިން ބުނެއެވެ. މިރޭގެ ސުޕަމޫނަކީ މި އަހަރުގެ ދެވަނަ ސުޕަމޫނެވެ. އަހަރުގެ ފުރަތަމަ ސުޕަމޫން ފެނިގެން ގޮސްފައިވަނީ މިދިޔަ އޮކްޓޫބަރު މަހުގެ 7 ވަނަ ދުވަހެވެ. އަދި މިއަހަރުގެ އެންމެ ފަހު ސުޕަމޫން ފެންނާނީ އަންނަ ޑިސެމްބަރުމަހުގެ 4 ވަނަ ދުވަހު ކަމަށް ފަލަކީ ހިސާބުތަކުން ދައްކައެވެ.

މިރޭގެ ހަނދަށްވުރެ ކައިރިން ދުނިޔެއަށް ހަނދު ދެން ފެންނާނީ އަންނަ އަހަރުގެ ޑިސެމްބަރު މަހުގެ 24 ވަނަ ދުވަހުއެވެ. "ކޯލްޑް މޫން"ގެ ނަމުން ނަން ދެވިފައިވާ މި ހަނދު، ދުނިޔެއާ 240 ކިލޯމީޓަރު ކައިރިވާނެއެވެ. މިއީ 2019 ވަނަ އަހަރުގެ ސުޕަމޫނަށް ވުރެ ވެސް ދުނިޔެއާ މާ ކައިރިން ފެންނާނެ ހަނދެކެވެ. 

މީގެ އިތުރުން، 2028 ވަނަ އަހަރުގެ ފެބްރުއަރީ މަހުގެ 10 ވަނަ ދުވަހު އަދި 2029 ވަނަ އަހަރުގެ މާޗް މަހުގެ 30 ވަނަ ދުވަހު ދުނިޔެއާ އެއަށްވުރެ ގާތް ސުޕަމޫންތަކެއް ފެނިގެންދާނެ ކަމަށް ވެސް ފަލަކީ ހިސާބުތަކުން ދައްކައެވެ.