ހުޅުމާލެ ތިންވަނަ ފިޔަވަހީގެ ބިން ހިއްކަން އަލުން ފެށުމާއި ގުޅިގެން އެތަނުގެ ފަޅުތެރޭ ހުރި އުޅަނދުތައް އެޅުމަށް ވަކި ސަރަހައްދުތަކެއް އެޗްޑީސީން ކަނޑައަޅައިފިއެވެ.

އެގޮތުން މިކަމާ ގުޅިގެން ހައުސިން ޑިވަލޮޕްމަންޓް ކޯޕަރޭޝަން (އެޗްޑީސީ) އިން އާއްމުކުރި އިއުލާނެއްގައި ބުނެފައިވަނީ ބިންހިއްކަމުން ގެންދާ ސަރަހައްދުގައި މަސައްކަތްތަކަށް ދަތިވާ ގޮތަށް ހުރި އުޅަނދުތައް އެޅުމަށް ވަގުތީ ގޮތުން ހާއްސަ ސަރަހައްދެއް މިހާރު ހަމަޖައްސާފައިވާކަމަށެވެ.

ފޭސް 3 ފަޅުން ނަގަންޖެހޭ އުޅަނދުތައް ހުރި ސަރަހައްދު

އެގޮތުން ސަފާރީތައް އެޅުމަށް ހާއްސަކުރެވިފައި ވަނީ ކ. ގުޅީފަޅު، ކ. ކުޑަގިރި އަދި ކ. ތިލަފުށި ފަޅުތެރެއިން ބައެކެވެ. ދޯނިފަހަރާއި އެހެނިހެން އުޅަނދުފަހަރު އެޅުމަށް ކަނޑައަޅާފައިވަނީ ކ. ގުޅީފަޅު އަދި ކ. ތިލަފުށި ފަޅުތެރެއިން ވަކި ސަރަހައްދުތަކެކެވެ. 

އެޗްޑީސީން ވަނީ ހިއްކުމަށް ތައްޔާރުވަމުންދާ ސަރަހައްދުގައިވާ ހުރިހާ އުޅަނދުތައް މި މަހުގެ 6 ވަނަ ދުވަހުގެ 00:00 ގެ ކުރިން އެ ސަރަހައްދުން ނެގުމަށް ފަހު، ބިން ހިއްކުމުގެ މަސައްކަތް ނިމެންދެން އެ އިދާރާއިން ކަނޑައަޅާފައިވާ ސަރަހައްދުތަކަށް ބަދަލު ކުރުމަށް އެދިފައެެވެ.

ފޭސް 3 ގެ ބިންހިއްކުމުގެ މަސައްކަތް މެދުކަނޑާލިއިރު އެޗްޑީސީން ވަނީ ހިއްކުމަށް ނިންމި 63 ހެކްޓަރުގެ އެރެއިން 15 ހެކްޓަރަށްވުރެ ބޮޑު ސަރަހައްދެއްހިއްކާ ނިންމާފައެވެ.