ދިވެހިރާއްޖޭގެ ޤައުމީ ދިފާޢީ ބާރާ އަލަށް ގުޅުނު ފަރާތްތަކަށް ހިންގި 73 ވަނަ އަސާސީ ތަމްރީނު ކޯހުގެ ދަސްވެނިވުމުގެ ރަސްމިއްޔާތު މިއަދު ހަވީރު ގިރިފުށީ ޓްރެއިނިންގ ސެންޓަރުގައި ބާއްވައިފިއެވެ.

މި ކޯހުން ޖުމްލަ 116 ދަރިވަރުން ދަސްވެނިވެފައިވާ އިރު އޭގެ ތެރޭގައި ހިމެނެނީ 94 ފިރިހެން ދަރިވަރުންނާއި 22 އަންހެން ދަރިވަރުންނެވެ. އެމްއެންޑީއެފް ކޮލެޖް އޮފް ޑިފެންސް އެންޑް ސެކިއުރިޓީ ސްޓަޑީސް (ސީޑީއެސްއެސް) އިން ހިންގި މި ކޯހުގެ ތަމްރީނުތައް ފެށީ 2026 ވަނަ އަހަރުގެ މާރިޗު މަހުގެ 7 ވަނަ ދުވަހުއެވެ.

ރަސްމިއްޔާތު ޝަރަފުވެރިކޮށްދެއްވީ ދިފާޢީ އަދި ވަޠަނީ ޚިދުމަތާ ބެހޭ ވަޒީރު ޙަސަން ރަޝީދެވެ. ވަޒީރު ވަނީ ލަޝްކަރު ބަލައި ފާސްކުރައްވައި ވަނަތައް ހޯދި ދަރިވަރުންނަށް އިނާމު ހަވާލުކޮށްދެއްވައި ދަރިވަރުންނާ މުޚާޠަބުކުރައްވައި ވާހަކަފުޅު ދައްކަވައިފައެވެ.

ކޯހުގެ އެންމެ މޮޅު ދަރިވަރުގެ މަޤާމާއި ހެވިކަމުގެ ދާއިރާ އިން ދޭ ކޮމާންޑަރ އިސްމާޢީލް ދީދީ އެވޯޑް ލިބުނީ ޕްރައިވެޓް މަހުދީ އަޙްމަދަށެވެ. ހަށިހެޔޮކަމުގެ އެއްވަނައަށް ދޭ ކޮމާންޑަރ މޮޓަރ ޙަސަން މަނިކު އެވޯޑް ޕްރައިވެޓް ރިފާ މުޙައްމަދު ހޯދި އިރު ބަޑިޖެހުމުގެ އެންމެ މޮޅު ދަރިވަރުގެ ގޮތުގައި މޭޖަރ އިނގިރޭސި ޢުމަރު މަނިކު އެވޯޑް ލިބުނީ ޕްރައިވެޓް މުޙައްމަދު ޝައުން ނާފިޢުއަށެވެ. މަޒުމޫނު ލިޔުމުގެ މުބާރާތުން އެއްވަނަ ހާސިލުކޮށް މޭޖަރ ޙުސައިން ޝާކިރު އެވޯޑް ގެންދިޔައީ ޕްރައިވެޓް އަސްލަން އިބްރާހީމް ރަޝީދެވެ.

ޕްލެޓޫން ފެންވަރުގައި ބަލާ އިރު ކޯހުން އެއްވަނައަށް ދިޔައީ ޝަހީދު ޢަލީރަސްގެފާނު ކޮމްޕެނީގެ ބްރާވޯ ޕްލެޓޫނެވެ. ބްރާވޯ ޕްލެޓޫނުގެ އެންމެ މޮޅު ދަރިވަރަކީ ޕްރައިވެޓް މަރިޔަމް ޝާނީއެވެ. ޓެންގޯ ޕްލެޓޫނުގެ އެއްވަނަ ޕްރައިވެޓް ރިފާ މުޙައްމަދު ހޯދި އިރު ޗާލީ ޕްލެޓޫނުގެ އެއްވަނައަށް ޕްރައިވެޓް އާނިމް މުޙައްމަދު އަދި ގޮލްފް ޕްލެޓޫނުގެ އެއްވަނައަށް ޕްރައިވެޓް އައިޝަތު ޝާމިޒް ޢަޒީޒް ހޮވިފައިވެއެވެ.

މި ރަސްމިއްޔާތުގައި ދަރިވަރުންނަށް ސިފައިންގެ ޢަޒުމް ލައިދެއްވީ ސީޑީއެސްއެސްގެ ކޮމާންޑަރ ބްރިގޭޑިއަރ ޖެނެރަލް ޑރ. ޙުސައިން އިބްރާހީމެވެ. މީގެ އިތުރުން ޗީފް އޮފް ޑިފެންސް ފޯސް މޭޖަރ ޖެނެރަލް އިބްރާހީމް ޙިލްމީ އާއި ޖެނެރަލް އޮފިސަރުންނާއި ސާޖަންޓް މޭޖަރ އޮފް އެމްއެންޑީއެފް ނަޞްރުﷲ ވަސީމް އާއި ސިފައިންގެ އޮފިސަރުންނާއި މުދައްރިބުންގެ އިތުރުން ދަރިވަރުންގެ ބެލެނިވެރިން ވެސް ބައިވެރިވެލެއްވިއެވެ.

އަސާސީ ތަމްރީނު ކޯހަކީ ސިފައިންގެ ޚިދުމަތާ އަލަށް ގުޅޭ ފަރާތްތަކަށް ސިފައިންގެ އެކި ދާއިރާތަކުގައި މަސައްކަތް ކުރެވޭ ފެންވަރަށް ޢިލްމާއި ހުނަރު ދަސްކޮށްދީ ޤައުމިއްޔަތަށް ލޯބިކުރާ ސިފަވަންތަ ހަށިހެޔޮ ސިފައިންގެ މީހުން ބިނާކުރުމަށް ހިންގާ ކޯހެކެވެ.