ސަރުކާރުން އިފްތިތާހްކޮށްފައިވާ ރެސިޑެންސީ ޕްރޮގްރާމުން ރާއްޖެއަށް ވާނީ ފައިދާކަމަށް ކުރީގެ ރައީސް މުހައްމަދު ނަޝީދު ވިދާޅުވެއްޖެއެވެ.

އިދިކޮޅު އެމްޑީޕީން ވަނީ މި ސަރުކާރުން ކުރިއަށްގެންދިއުމަށް ނިންމާފައިވާ ރެސިޑެންސީ ޕްރޮގްރާމް ހުއްޓުވުމަށް ރައްޔިތުންގެ މަޖިލީހަށް ގަރާރެއް ހުށަހަޅާފައެވެ. އެމްޑީޕީން އެ ޕްރޮގްރާމާ ދެކޮޅު ނަމަވެސް ރައީސް ނަޝީދު މިއަދު އެކްސްގައި ކުރެއްވި ޕޯސްޓެއްގައި ވަނީ ރެސިދޑެންސީ ޕްރޮގްރާމަށް އެމަނިކްފާނު ތާއީދުކުރައްވާކަން ހާމަކުރައްވާފައެވެ.

ރައީސް ނަޝީދު ކުރެއްވި ޕޯސްޓްގައި ވިދާޅުވެފައިވަނީ ރެސިޑެންސީ ޕްރޮގްރާމަކީ ރާއްޖެއަށް ނުހަނު ފައިދާވާނޭ ޕްރޮގްރާމެއް ކަމަށެވެ. އަދި އެކަމަކީ އެހެން ބާވަތެއްގެ ފަތުރުވެރިކަމެއްކަމަށްވެސް ނަޝީދު ފާހަގަކުރެއްވިއެވެ.

މިދިޔަ އަހަރުގެ ޖުލައިމަހު ސިންގަޕޫރުގައި ބޭއްވި އިންވެސްޓްމެންޓް ފޯރަމްގައި ވަނީ ރައްޖޭގައި އިންވެސްޓްކުރުމުން ރާއްޖޭގައި ވަޒަންވެރިވެގެން އުޅުމުގެ ފުރުސަތު ލިބޭ ޕްރޮގްރާމެއް އިފްތިތާހްކޮށްފައެވެ. އެގޮތުން ދިވެހި ސަރުކާރާއި ހެންލީ އެންޑް ޕާޓްނާސް އާއި ދެމެދު ރެޒިޑެންސީ ބައި އިންވެސްޓްމަންޓް އެއްބަސްވުމެއްގައި ވަނީ ސޮއިކޮށްފައެވެ.  މި އެއްބަސްވުމުގެ ސަބަބުން ރިއަލް އެސްޓޭޓް އިންވެސްޓްމަންޓްގެ ފުރުސަތުތައް ހުޅުވި، ދިރިއުޅެން އަދި އިންވެސްޓްކުރަން އެންމެ ރަނގަޅު ރަށްތަކުގެ އިގްތިސާދެއްގެ ގޮތުގައި ދިވެހިރާއްޖެ ފާހަގަކުރެވޭނެ ކަމަށް ސަރުކާރުން ބުނެ އެވެ.

އެމްޑީޕީން މަޖިލީހަށް ހުށަހެޅި ގަރާރުގައި ބުނެފައިވަނީ ރެސިޑެންސީ ޕްރޮގްރާމްގެ ސަބަބުން ވަކި ދައުލަތެއް އުފެދުމުގެ ފުރުސަތު ލިބި، ރާއްޖޭގެ ސިޔާދަތީ ބާރުގެ ބާރުވެރިކަން ހިނގައިދާނެ ކަމަށެވެ.