މަޝްހޫރު ފުޓްބޯޅަ ލެޖެންޑް، ޑޭވިޑް ބެކަމް އަށް ކިންގ ޗާލްސް ގެ ފަރާތުން ރަސްމީކޮށް ނައިޓްކަމުގެ ލަޤަބު އަރުވައިފިއެވެ. މިއީ އިނގިރޭސިވިލާތުގެ ރައްޔިތަކަށް އެރުވޭ އެންމެ މަތީޝަރަފުތަކުގެ ތެރެއިން އެއް ޝަރަފެވެ.

ބެކަމްއަށް މި ލަޤަބު އަރުވާފައިވަނީ ނޮވެމްބަރ 4 ވަނަ ދުވަހު ވިންޑްސަރ ކާސަލްގައި ބޭއްވުނު "ދަ ސެރެމޯނިއަލް ޑަބިންގ އޮފް ދަ ނައިޓް" އޭ ކިޔުނު ހާއްސަ ޝާހީ ރަސްމިއްޔާތެއްގައެވެ. މިހާރު ފުޓުބޯޅަކުޅުމުން ރިޓަޔާވެފައިވާ 50 އަހަރުގެ ޑޭވިޑައަށް މި ލަޤަބު އެރުވުނީ ކުޅިވަރާއި، އިންސާނިއްޔަތަށް އެނާ ކޮށްދީފައިވާ ފާހަކޮށްލެވޭ އަގުހުރި ޚިދުމަތްތަކުގެ އަގު ވަޒަންކުރުމުގެ ގޮތުންނެވެ. 

ނައިޓްކަމުގެ ލަޤަބަކީ "ބްރިޓިޝް މަލްޓިޓިއުޑް" ނިޒާމުގެ ތެރެއިން ދެވޭ ޚާއްޞަ ޝަރަފެކެވެ. މި ލަޤަބު ލިބޭ ފިރިހެނުންނަށް "ސަރ" އަދި އަންހެނުންނަށް "ޑޭމް" ގެ ލެ ލަޤަބު ދެވެއެވެ. އަދި ނައިޓްކަމުގެ ލަޤަބު ލިބޭ މީހުންގެ އަނބިންނަށް "ލޭޑީ" ގެ ލަޤަބު އެރުވެއެވެ.

އެހެންކަމުން މި ރަސްމިއްޔާތުގައި ޑޭވިޑްގެ އަނބިކަނބަލުން ވިކްޓޯރިއާ ބެކަމްއަށް ވެސް މި ލަގަބު އަރުވާފައިވެއެވެ. ޕީޕަލް މަޖައްލާގައި ބަޔާންކޮށްފައިވާ ގޮތުން މި ދެމަފިރިނަގެ އައު ލަޤަބަކީ "ސަރ ބެކަމް" އަދި "ލޭޑީ ބެކަމް" އެވެ.

ސަރ ޑޭވިޑް ބެކަމްއަކީ މެންޗެސްޓަރ ޔުނައިޓެޑް، ރިއަލް މެޑްރިޑް، އޭސީ މިލާން، ޕެރިސް ސެއިންޓް-ޖަރމޭން އަދި ލޮސް އެންޖެލެސް ގެލެކްސީ ފަދަ ބޮޑެތި ކުލަބުތަކުގައި ކުޅެފައިވާ މޮޅު ކުޅުންތެރިއެކެވެ. ބެކަމް ވަނީ އިނގިރޭސި ޤައުމީ ޓީމުގެ ކެޕްޓަންކަންވެސް ކޮށްފައެވެ. ބެކަމް ގެންދަނީ ކިންގްސް ފައުންޑޭޝަންގެ އެމްބެސެޑަރެކެވެ. އަދި ޔުނިސެފްއާއެކު ވެސް އެތައް ފައިދާހުރި މަސައްކަތްތަކެއް ކޮށްދެއްވަމުންދާ ފަރާތެކެވެ. 

ބެކަމްގެ ކުރިން މި ޝަރަފުވެރި ލަޤަބު އިޑްރިސް އެލްބާ (53)، މައިކަލް ކޭން (92)، އަދި އެންތޮނީ ހޮޕްކިންސް (87)، ހެލެން މިރެން (80)، ޖޫލީ އެންޑްރޫސް (90)، އަދި އެމާ ތޮމްޕްސަން (66) އަށް އަރުވާފައިވެއެވެ.