އައްޑޫ ހުޅުދޫ އަދި މީދޫ އިދާރީގޮތުން ވަކިވެގެން ދިއުމަކީ، ތަރައްޤީގެ ކަންކަން ބާރުސްޕީޑްގައި ކުރިއަށްގެންދިއުމަށް މަގުފަހިވެގެންދިޔަ ކަމެއްކަމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެއެވެ.

އައްޑޫއަށް ކުރައްވަމުން ގެންދަވާ ޒިޔާރަތުގައި މިއަދު އައްޑޫ ހުޅުދޫ އަދި މީދޫ ރައްޔިތުންނާ ބައްދަލުކުރައްވައި ދެއްކެވި ވާހަކަފުޅުގައި ރައީސް ޑރ. މުއިއްޒު ވަނީ އައްޑޫސިޓީ އިދާރީ ހިންގުމުން އެ ދެރަށް ވަކިވެގެން ދިއުމަކީ އެ ދެރަށުގެ ތަރައްޤީގެ ކުރިމަގަށް ލިބުނު މޮޅެއްކަމަށް ސިފަކުރައްވާފައެވެ.

ރައީސް ވިދާޅުވީ، ހުޅުދޫ އާއި މީދޫގެ ކަންކަން ސަރުކާރުން ކުރިއަށްގެންދާނީ އެ ދެރަށުގެ ރައްޔިތުން ބޭނުންވާ ގޮތަށްކަމަށާއި އެގޮތުން ސިޓީން ވަކިވުމަށް ދެރަށުގެ ރައްޔިތުން ނިންމި ނިންމުމަކީ ތަރައްޤީގެ އެތައް އެތައް މަޝްރޫޢުތަކެއް ކުރިއަށްގެންދިއުމަށް މަގުފަހިވެގެންދާނޭ ކަމެއްކަމަށެވެ. 

ޑޮމޮކްރަސީގަ އޮންނަ ހަމަޔަކީ ނިކަމެތި ކުރެވިފައިވާ ފަރާތްތަކާއި ބާކީކުރެވިފައިވާ ފަރާތްތަކަށް އިސްކަންދިނުން ކަމަށާއި، އެގޮތުން ކުރިއަށް އޮތްތަނުގައި އެ ދެރަށުގެ ތަރައްޤީގެ ކަންކަމުގައި ސަރުކާރުން ހާއްސަ އިސްކަމެއް ދެއްވާނޭކަމަށް ރައީސް ވިދާޅުވިއެވެ.

މި ސަރުކާރުގެ ސިޔާސަތަކީ ހަމަގޮތެއްގައި ކަންކަން ކޮށްދިނުމުގެ ސިޔާސަތުކަން ފާހަގަކުރައްވަމުން ރައީސް ވިދާޅުވީ މުޅި އައްޑޫގެ ތަރައްޤީގެ ކަންކަން ހަމަހަމަ ގޮތެއްގައި ކުރިއަށްދާކަން ޔަގީންވަންދެން ސަރުކާރުން ކަންކަން ކުރިއަށްގެންދަން މަސައްކަތްތައް ކުރަމުންދާނޭކަމަށެވެ.