މޯލްޑިވްސް ނެޝަނަލް ޑިފެންސް ފޯސްއަށް މިލިޓަރީ މަތިންދާ ބޯޓްތައް ހޯދުމުގެ މަސައްކަތް ކުރައްވަން ނިންމާ އެ މަސައްކަތް ފަށާފައިވާ ކަމަށް ރައީސުލްޖުމްހޫރިއްޔާ ޑރ. މުހައްމަދު މުޢިއްޒު ވިދާޅުވެއްޖެ އެވެ.
ރައީސް މިފަދައިން ވިދާޅުވީ އެމްއެންޑީއެފް ގަން އެއާ ސްޓޭޝަން ހުޅުވައިދެއްވުމަށް ފަހު ވާހަކަފުޅު ދައްކަވަމުންނެވެ. ރައީސް ވިދާޅުވީ އެމްއެންޑީއެފަށް ހުރިހާ ދާއިރާއަކުން ހުރިހާ މާނައެއްގައި ކަންކަން ފަހިކޮށްދިނުމަކީ ސަރުކާރުގެ ޒިންމާއެއް ކަމަށެވެ. އަދި ދިވެހީން ބޭނުންވާ ގޮތް ކަމުގައި ވިދާޅުވެ އެކަން ކޮށްދެއްވުމަކީ އެމަނިކުފާނަށް ލިބިވަޑައިގަންނަވާ ފަޚުރެއް ކަމުގައި ރައީސް ވިދާޅުވި އެވެ.
އެމްއެންޑީއެފް ގަން އެއާ ސްޓޭޝަން ހުޅުވައިދެއްވުން -- ފޮޓޯ: ރައީސް އޮފީސް
އެމަނިކުފާނުގެ ވާހަކަފުޅުގައި ސިފައިންގެ ވައިގެ ބާރާއި ކަނޑުގެ ބާރާއި އެއްގަމުގެ ބާރު ވަރުގަދަ ކުރެއްވުމަށް ވަސީލަތްތައް އިތުރުކުރައްވާނެ ކަމުގައި ވިދާޅުވި އެވެ. އެގޮތުން ވިދާޅުވީ ކޯސްޓްގާޑްގެ ފްލީޓް ދެ ގުނަ ކުރުމުގެ މަސައްކަތް ކުރިއަށްދާ ކަމަށެވެ. އަދި ސިފައިންގެ މެރިންކޯ އަށް ވަސީލަތްތައް އިތުރުކޮށް ދެއްވާނެ ކަމަށް ވިދާޅުވި އެވެ.
ރައީސް ވިދާޅުވި ގޮތުގައި އެމަނިކުފާނު މިހާރު ވަނީ އެމްއެންޑީއެފަށް މިލިޓަރީ މަތިންދާ ބޯޓްތައް ހޯދުމުގެ މަސައްކަތް ކުރުމަށް ވަނީ ނިންމާފަ އެވެ. އަދި އެ މަސައްކަތް މިހާރު ފަށާފައިވާ ކަމަށް ވެސް ވިދާޅުވި އެވެ.
އެމްއެންޑީއެފް ގަން އެއާ ސްޓޭޝަން ހުޅުވައިދެއްވުން -- ފޮޓޯ: ރައީސް އޮފީސް
"މި ގައުމުގައި ވަރުގަދަ މިލިޓަރީ ބާރެއް އެމްއެންޑީއެފްގައި ޤާއިމުވެފައި އޮތުމަކީ ހަމަ ކޮންމެހެން ވެސް ކުރަން ޖެހޭ ކަމެއް ކަމުގައި އަޅުގަނޑު ދެކެން," ރައީސް ވިދާޅުވި އެވެ.
އެމްއެންޑީއެފް ގަން އެއާ ސްޓޭޝަން ހުޅުވައިދެއްވުން -- ފޮޓޯ: ރައީސް އޮފީސް
އެމްއެންޑީއެފަކީ ވަރުގަދަ ފޯސްއަކަށް ހެދުމުގެ މަސައްކަތް ކުރައްވާނެ ކަމަށް ވެސް ތަކުރާރުކޮށް ވިދާޅުވި އެވެ.
".. 2040 ވަނަ އަހަރާ ހަމައަށްދާއިރު ތަރައްގީ ވެފައިވާ ގައުމުތަކުގެ ލިސްޓްގައި މި ގައުމު ގުނާލެވޭނީ ހަމަ ޔަގީނުންވެސް މި ގައުމުގައި ވަރުގަދަ ހުރިހާ ދާއިރާއަކުން ވެސް ވަރުގަދަ މިލިޓަރީ ބާރެއް އޮތް ގައުމަކަށް ވެގެން," ރައީސްގެ ތަސައްވުރު ވިދާޅުވެ ދެއްވާ މިއަދުގެ ރަސްމިއްޔާތުގައި އެމަނިކުފާނު ވިދާޅުވި އެވެ.
Advertisement
This content is created and paid for by advertisers and does not involve Voice Journalists
