ނޮވެންބަރު ތިނެއް, 88 ގެ އުދުވާނާއި ގުޅިގެން ކުރީގެ ރައީސް މައުމޫން އަބްދުލްގައްޔޫމަށް އަމާޒު ކުރައްވާ ބައެއް ފަރާތްތަކުން ދައްކަމުންދާ ދޮގު ވާހަކަތަކާއި ގުޅިގެން ނޮވެންބަރު ތިނެއްގެ ބަތަލު, ބްރިގޭޑިއާ ޖެނެރަލް (ރިޓަޔާޑް) އިބްރާހީމް ދީދީ ވަރުގަދަ ރައްދެއް ދެއްވައިފި އެވެ.

ރާއްޖޭގައި އޮތް ގާނޫނީ ސަރުކާރު ބަދަލުކޮށް ރައީސް މައުމޫންގެ ވެރިކަމާއި ދެކޮޅަށް ދިވެހީންގެ ބަޔަކު އަޑީގައި ތިބެގެން ތަމަޅައިގެ ބަޔަކާއެކު ހަތިޔާރު ހިފައިގެން އަރާ މީގެ 37 އަހަރު ކުރީން ހިންގި އުދުވާނުގައި ދިވެހީންގެ ތެރެއިން 19 މީހަކު ޝަހީދުކޮށްލި އެވެ. އެ ހާދިސާގެ ހަގީގަތް އޮޅުވާލަން ކެނޑިނޭޅި ބަޔަކު ދަނީ މަސައްކަތް ކުރަމުންނެވެ.

އެކްސްގައި ވަރަށް ގިނައިން ފިތުނަވެރި, ދޮގު ވާހަކަތައް ފަތުރާ އެކައުންޓަކުން ވަނީ އެ ދުވަހު ރައީސް މައުމޫން ފިއްލެވީ ކަމަށާ އެމަނިކުފާނަށް ނަސްރުގެ ދުވަހުގެ ޚާއްސަ އައްޑަނަ ހައްގު ނޫން ކަަމަށް ބުނެ ވާހަކަތަކެއް ދައްކާފަ އެވެ. އެ ވާހަކަތަކަށް ރައްދު ދެއްވާ އިބްރާހިމް ދީދީ ވިދާޅުވީ ރައީސް މައުމޫން ވެރިކަމާއި ޙަވާލް ވެވަޑއިގެން 1978 ވަނަ އަހަރުން ފެށިގެން ދިވެހި ސިފައިންނަށް ހިލޭ ޓްރެނިންގް އާއި ހިލޭ ހަތިޔާރު އޭރުގެ ފެންވަރަ ހޯއްދަވައި ދެއްވި ކަމަށެވެ. އަދި 1988 ނޮވެމްބަރު 3 ގައި ސިފައިން ގެ މަރުކަޒު ތަމަޅައިން ގެ އަތްދަށަށް ނުގޮސް الله سبحانه وتعالى ގެ ރަޙްމަތްފުޅުން ސަލާމަތް ކުރެވުނީ އެކަމުގެ ނަތީޖާއެއްގެ ގޮތުން ކަމަށް ވިދާޅުވި އެވެ.

".. އަޅުގަނޑު މި އީ އެކަން އެއްމެ ގާތުން ދުށް މީހެއް. 3 ނޮވެމްބަރ 1988 ގައި އެމަނިކުފާނު އަރިހުގައި ފަތިހު ފަހެއްް ޖެހީއްސުރެ ހައެއް ޖަންދެން ހަތިޔާރާއި އެކު އަޅުގަނޑު ހުރިން. އެމަނިކުފާނު ކެނޑި ނޭޅި ފޯނުން މަސަތްކަތްޕުޅު ކުރެއްވީ ދިވެހި ސިފައިންނަށް އިރުޝާދު ދެއްވަވާ އަވަށްޓެރި އަދި ދުރު ގައުމުތަކުގެ ވެރިންނާއި ގުޅުއްވައިގެން އެހީތެރިކަން ހޯއްދެވުމަށް ހިތްވަރުފުޅާއި ޙިކްމަތް ތެރިކަމާއި އެކު," ބަޑި ގުދަނުގެ ތަޅުދަނޑި ފޯރުކޮށްދީ އަދި ރައީސް މައުމޫންގެ އަރިހުގައި ފޯރި މެރުމުގައިވެސް ހަރަކާތްތެރިވި ދީދީ ވިދާޅުވި އެވެ.

".. ވޮޝިން މެޝިންފޮށިގަނޑެއްގެ ގެ ވާހަކަ އެއީ ދޮގު ބުހުތާން އެއްވެސް އަސްލެއް ނެތް ވާހަކަ. ތީމުގެ އިން ފަތިހު އެބިރުވެރި ގަޑީގަ ތުއްޕުޅު ޣައްސާން [މިހާރުގެ ޑިފެންސް މިނިސްޓަރު މުޙައްމަދު ޣައްސާން މައުމޫން] އާއި އަނބިކަނބަލުން [އޭރުގެ ފަސްޓްލޭޑީ ނަސްރީނާ އިބްރާހިމް] ނާއި އެކު ނުކުމެވަޑއިގަތީ ހިތްވަރުފުޅު ގަދަވީމަ. އެއްވެސް ބޭފުޅަކާއި ބެހޭ ގޮތުން މިހާ ހައްސާސް ކަމެއްގަ އަސްލެއް ނެތްވާހަކަ ދެއްކުން އެއީ އެންމެ ރަނގަޅު ގޮތެއްނޫން," ދީދީ ވިދާޅުވި އެވެ.