މި މަހުގެ 14 ވަނަ ދުވަހު ވެރިކަން ކުރާ މައި ޕާޓީ ޕީއެންސީން ބޭއްވުމަށް ހަމަޖެހިފައިވާ ބޮޑު ހަރަކާތަށް އާންމުންނަށް ދަޢުވަތު ދިނުމުގެ ގޮތުން، ޚާއްސަ ހަރަކާތެއް މިއަދު އެ ޕާޓީން ފަށައިފިއެވެ.
ޕީއެންސީ ހަރުގޭގައި މިއަދު ހެނދުނު ބޭއްވި އެ ހަރަކާތުގައި މީޑިޔާތަކަށް މައުލޫމާތު ދެއްވަމުން އެ ޕާޓީގެ ޕީޖީ ލީޑަރު އަދި އިނގުރައިދޫ ދާއިރާގެ މެންބަރު އިބްރާހިމް ފަލާޙް ވިދާޅުވީ، މި ވެރިކަމަށް ދެ އަހަރު ވީއިރު ވެސް ޕީއެންސީން ބޮޑު އެއްވުމެއް ބާއްވައިފައިނުވާ ކަމަށާއި، ބޭއްވި އެއްވުމެއް ބާއްވައިފައިވަނީ ހަރުގޭގައި ކަމަށެވެ.
އަދި އެކަމާއި ގުޅިގެން އެ ޕާޓީ އަށާއި މި ސަރުކާރަށް ތާއީދުކުރާ އެކި ފަރާތްތަކުން ބޮޑު އެއްވުމެއް ނުވަތަ ހަރަކާތެއް ބޭއްވުމަށް އެދެމުންދާ ކަމަށާއި، އެ ހަރަކާތުގައި ރައީސް ޑރ. މުޙައްމަދު މުޢިއްޒު ކުރައްވަމުންގެންދަވާ މަސައްކަތްޕުޅުތަކަށް އެމަނިކުފާނަށް ޝުކުރުއަދާކުރައްވާނެ ކަމަށް ވެސް ފަލާޙް ވިދާޅުވިއެވެ.
މުޅި ރާއްޖޭގެ ވަރަށް ގިނަ ތަރައްގީގެ ކަންތައްތައް، ރާއްޖޭގެ ހުރިހާ ރަށަކަށް ޒިޔާރަތްކުރައްވައިފި، މީހުން ދިރިއުޅުއްވާ ހުރިހާ ރަށެއްގެ ރައްޔިތުންނާއި ބައްދަލުކުރައްވައި ވަރަށް ގިނަ ކަންކަން ކުރައްވައިފިި. އެހެންވީމާ އަޅުގަނޑުމެން ރައްޔިތުން ބޭނުންވޭ އަޅުގަނޑުމެންގެ އިއްޒަތްތެރި ރައީސުލްޖުމްހޫރިއްޔާ އާއި އަޅުގަނޑުމެން އެއްތަނަކުން ބައްދަލުވެ، ރައީސަށް ޚާއްސަ ޝުކުރެއް އަޅުގަނޑުމެން ފަރާތުން ދަންނަވާލަން.
ޕީއެންސީގެ ޕީޖީ ލީޑަރު އަދި އިނގުރައިދޫ ދާއިރާގެ މެންބަރު އިބްރާހިމް ފަލާޙް
ފަލާޙް ވިދާޅުވީ އެ ޚާއްސަ ޖަލްސާއަށް ރަށްރަށުން ވަރަށް ގިނަ ޢާންމުން ބައިވެރިވާނެ ކަމަށާއި، އެ ޖަލްސާގެ މައިގަނޑު ބޭނުމަކީ ރައީސާއި ރާއްޖޭގެ ރަށްތަކުގައި ދިރިއުޅޭ ޕީއެންސީގެ ސަޕޯޓަރުންނާއި ބައްދަލުކުރެއްވުން ކަމަށެވެ.
އެހެންކަމުން މިއަދު ބޭއްވި ހަރަކާތަކީ އެ ހަރަކާތަށް މާލެ ސަރަޙައްދުގައި ދިރިއުޅޭ ފަރާތްތަކަށް ދައުވަތު ދިނުން ފެށުމަށްޓަކައި ބޭއްވޭ ހަރަކާތެއް ކަމަށް ވެސް ފަލާޙް ވިދާޅުވިއެވެ.
މި މަހުގެ 14 ވަނަ ދުވަހުގެ ރޭ ޕީއެންސީން ބާއްވާ ބޮޑު ޖަލްސާ ބޭއްވުމަށް ހަމަޖެހިފައިވަނީ އާޓިފިޝަލް ބީޗުގައެވެ. މި ހަރަކާތުގައި ރައީސް ޑރ. މުޙައްމަދު މުޢިއްޒު އާއި ސަރުކާރުގެ ވެރިން ވެސް ބައިވެރިވެވަޑައިގަންނަވާނެއެވެ.
Advertisement
This content is created and paid for by advertisers and does not involve Voice Journalists
