އިތުރު ކޯޓާ ހޯދަން ހައްޖު މުބާޝިރު އިނިޝިއޭޓިވުން ފުރުސަތު ހޯދަން މަޝްވަރާކޮށްފި
އިތުރު ކޯޓާ ހޯދަން ހައްޖު މުބާޝިރު އިނިޝިއޭޓިވުން ފުރުސަތު ހޯދަން މަޝްވަރާ ކޮށްފި އެވެ.
އިސްލާމިކް މިނިސްޓަރު ޑރ. މުޙައްމަދު ޝަހީމް އަލީ ސަޢީދު މިއަދު ވިދާޅުވީ ގައުމުތަކަށް ކަނޑައަޅާފައި އޮންނަ ރަސްމީ ކޯޓާގެ އިތުރަށް، އިތުރު ކޯޓާ މިހާރު ނުދެއްވި ނަމަވެެސް، އެހެން ގައުމުތަކަށް ދީފައި ހުންނަ ކޯޓާގެ ތެރެއިން އެ ގައުމުތަކުން ބޭނުން ނުކޮށް ހުންނަ ކޯޓާ، ކޯޓާ އިތުރަށް ބޭނުންވާ ގައުމުތަކުން ބޭނުން ކުރެވޭ ގޮތައް ސައުދީއިން ކުރިއަށް ގެންދާ (ހައްޖު މުބާޝިރު) އިނިޝިއޭޓިވް އިން ރާއްޖެއަށް ފުރުސަތު ހޯދަން މިއަދު މަޝްވަރާ ކޮށްފައިވާ ކަމަށެވެ.
މިނިސްޓަރު ޝަހީމް މިވަގުތު ހުންނެވީ ރަސްމީ ދަތުރުފުޅެއްގައި ސައުދިއަރަބިއްޔާގަ އެވެ.
ރާއްޖެއަށް ލިބެނީ 1,000 މީހުންގެ ހައްޖު ކޯޓާ އެވެ. ހައްޖު ކޯޓާ އިތުރުކުރަން ސަރުކާރުން އަބަދުވެސް މަސައްކަތް ކުރެ އެވެ.
ބައެއް ގައުމުތަކަށް ދޭ ކޯޓާގެ މިންވަރަށް އެ ގައުމުތަކުން މީހުން ހައްޖަށް ނުދެ އެވެ. އެހެން ކަމުން އެ ގައުމުތަކުން ދޫކޮށްލާ ކޯޓާ އެހެން ގައުމުތަކަށް އުސޫލެއްގެ ތެރެއިން ދެ އެވެ. ހައްޖު މުބާޝިރު އިނިޝިއޭޓިވުން ފުރުސަތު ލިބިއްޖެނަމަ އެ ގޮތަށް ދޫކޮށްލާ ކޯޓާއިން ބައެއް ރާއްޖެއަށް ލިބުމުގެ ފުރުސަތު އޮންނާނެ އެވެ.
ރާއްޖޭގައި ހައްޖަށް ދާން ފައިސާ ދައްކާފައި ގިނަ ބަޔަކު އެބަ ތިއްބެވެ. ހައްޖު ކިއު ކުޑަކުރަން ސަރުކާރުން ދަނީ ހަރުދަނާ ފިޔަވަޅުތަކެއް އަޅަމުންނެވެ.
Advertisement
This content is created and paid for by advertisers and does not involve Voice Journalists
