މޯލްޑިވްސް އިމިގްރޭޝަނުން އީ ވިސާގެ ހިދުމަތް ތައާރަފްކޮށް އެ އިދާރާގެ ހުރިހާ ހިދުމަތެއް ޑިޖިޓަލައިޒްކޮށްފިއެވެ.

މިކަމަށްޓަކައި މިއަދު ބާސެލޯ ނަސަންދުރާގައި ވަނީ އީ ވިސާގެ ހިދުމަތާއި، ފޭޝަލް ރިކޮގްނިޝަން އެޕްލިކޭޝަން އަދި "އީ-ވިޒާ ތައާރަފްކޮށްފައެވެ.

"މޯލްޑިވްސް 2.0" ސިޔާސަތުގެ ދަށުން ތައާރަފްކުރެވުނު އީ ވިސާގެ ހިދުމަތް އިފްތިތާހްކޮށްދެއްވީ ރައީސުލްޖުމްހޫރިއްޔާ ޑރ.މުހައްމަދު މުއިއްޒެވެ. އިމިގްރޭޝަނު އައު މޯބައިލް އެޕްލިކޭޝަން ތައާރަފްކޮށްދެއްވީ ކޮންޓްރޯލަރ ޖެނެރަލް އޮފް އިމިގްރޭޝަން އަޙްމަދު ފަޞީޙެވެ.

މި ރަސްމިއްޔާތުގައި ވާހަކަދައްކަވަމުން ކޮންޓްރޯލާ ޖެނެރަލް އޮފް އިމިގްރޭޝަން އަހުމަދު ފަސީހު ވިދާޅުވީ، އެ އިދާރާގެ ހިދުމަތްތައް ޑިޖިޓަލައިޒް ކުރެވިގެން ދިއުމަާއެކު އެކަމުގެ ފަސޭހަކަން ރައްޔިތުންނަށް ލިބިގެންދާނޭކަމަށެވެ. އެގޮތުން އައު މޯބައިލް އެޕްލިކޭޝަނާއި، އީ ވިސާގެ ހިދުމަތް ޑިޖިޓަލައިޒް ވެގެން ދިއުމަާއެކު އިމިގްރޭޝަނުން ހިދުމަތް ހޯދާ ފަރާތްތަކަށާއި އެނޫންވެސް ފަރާތްތަކަށް ބޮޑެތި ފަސޭހަތަކެއް ލިބޮގެންދާނޭކަމަށެވެ.

އިމިގްރޭޝަންގެ ހިދުމަތްތައް ޑިޖިޓަލައިޒްކުރުން އިފްތިތާހްކުރުމުގެ ތެރެއިން.. ފޮޓޯ؛ ރައީސް އޮފީސް

ފަސީހް ވިދާޅުވީ އިމިގްރޭޝަނުގެ ހިދުމަތްތައް ޑިޖިޓަލައިޒް ވެގެންދިއުމާއެކު ގަވާއިދާ ހިލާފަށް އުޅެމުންދާ ބިދޭސީންގެ މައްސަލަ ހައްލުކުރުމަށް ކުރަމުންދާ މަސައްކަތަށާއި އެ މައްސަލައަށްވެސް ބޮޑު ހައްލެއް ލިބިގެންދާނޭކަމަށެވެ.  ފަސީހް ވިދާޅުވީ އީ ވިސާގެ ހިދުމަތް ތައާރަފްކުރެވުމާއެކު އިމިގްރޭޝަނަށް ނުގޮސް ވިސާގެ ކަންކަން އޮންލައިނުކޮށް ކުރެވިގެންދާނޭކަމަށެވެ.

އިމިގްރޭޝަނުން ބުނީ މީގެކުރިން، ވިސާއަށް އެދި ހުށަހަޅަންޖެހެނީ ކަރުދާހުގައި ޕްރިންޓްކޮށްފައިވާ ފޯމުތައް މެދުވެރިކޮށް ކަމަށާއި ފަހުން މި ނިޒާމު އޮންލައިން ޕްލެޓްފޯމަކަށް ބަދަލުކުރެވުނު ނަމަވެސް، ވިސާ ޖެހުމަށްޓަކައި އެޕޮއިންޓްމަންޓް ހަދައި، އިމިގްރޭޝަނަށް ހާޒިރުވެ، ޕާސްޕޯޓު ހުށަހަޅަން ޖެހޭކަމަށެވެ. މިއީ ވީޒާއާ ގުޅުންހުރި ހިދުމަތްތަކަށް އެދޭ ކުންފުނިތަކަށާއި އަމިއްލަ ފަރުދުންނަށް ދަތިތަކާ ކުރިމަތިލާންޖެހޭ ކަމެއްކަން ފާހަގަކޮށް ޚާއްސަކޮށް މާލެއިން ބޭރުގައި ދިރިއުޅޭ ފަރާތްތަކަށް މިކަމުން ބޮޑެތި ދަތިތަކެއް ކުރިމަތިލާންޖެހޭކަން އިމިގްރޭޝަނުން ބުނެއެވެ.

އިމިގްރޭޝަނުން ބުނީ އީ ވިސާގެ ހިދުމަތް ފެށުމާއެކު ހިދުމަތް ހޯދާ ފަރާތްތަކަށް ދިމާވަމުންދިޔަ ގޮންޖެހުންތަކަށް ހައްލު ލިބި، ލުއިފަސޭހަކަމާއެކު ވިސާއަށް އެދި ހުށަހެޅޭނޭކަމަށެވެ. އަދި ވިސާ ދޫކުރުމާއެކު އީ-ވިސާ އޮންލައިންކޮށް ޑައުންލޯޑްކުރުމުގެ ފުރުޞަތު ލިބިގެންދާނެއެވެ. އީ-ވިސާގެ ޞައްޙަކަން ކަށަވަރުކުރުމަށްޓަކައި ޚާއްޞަ ކިއު.އާރް ކޯޑެއް ހިމެނިފައިވާނެއެވެ. މި ޚިދުމަތްތައް މި މަހުގެ 23 ވަނަ ދުވަހުން ފެށިގެން އާންމުންނަށް ލިބިގެންދާނޭކަމަށް އިމިގްރޭޝަނުން ބުނެއެވެ.

އީ ވިސާގެ ހިދުމަތް ފެށުމާއެކު ވިސާ ދޫކުރެވިފައިވާ ބިދޭސީ ފަރާތަށް، މޯލްޑިވްސް އިމިގްރޭޝަންގެ މޯބައިލް އެޕްލިކޭޝަން މެދުވެރިކޮށް އެ ފަރާތަކަށް ދޫކުރެވިފައިވާ އީ-ވީޒާ ގެ މަޢުލޫމާތު ފެންނަން ހުންނާނޭކަމަށެވެ. އަދި ކުރިމަގުގައި އީ-ވީޒާ ބޭނުންކޮށްގެން އެކިއެކި ހިދުމަތްތައް ހޯދުމުގެ މަގުފަހިވެގެންދާނެއެވެ.