އިބްރަތްތެރި އަދި އެހާމެ ޝައުގުވެރި މަދަހަތަކެއް ގެނެސްދީފައިވާ އިސްލާމިކް ރިދަމް އިން އައު މަދަހައެއް ރިލީޒުކުރަން ތަައްޔާރުވެއްޖެ އެވެ.

މި ފަހަރުގެ މަދަހައިގެ ނަމަކީ "އޮއްސުމުން" އެވެ. 

"ދިއްލާލި ހަނދު ބިގަރެއްބާ, ވިހުރާލި ތަރި އުދަރެހުގައި" މިފަދަައިން ފެށިގެން އަންނަ މި މަދަހަ ކިޔާދީފައިވަނީ ހިތްގައިމު ރީތި މަދަހަތަކެއް ކިޔައިދީފައިވާ މޫސާ ޝިފާއު އެވެ. މަދަހައިގެ ޅެން ތައްޔާރުކޮށްފައިވަނީ މި ފަހުން ރީތި އެތައް މަދަހަތަކެއްގެ ޅެން ތައްޔާރުކޮށްދިން އަހްމަދު ރިފާއު އެވެ.

މަދަހަ ރިލީޒިންގެ ކުރީން މަދަހައާ ގުޅޭ ގިނަ މައުލޫމާތުތަކެއް އިސްލާމިކް ރިދަމް އިން އާންމުކުރި ވީޑިއޯއެއްގައި ވަނީ ހިއްސާކޮށްފަ އެވެ. އެ ވީޑިއޯގައި ޝިފާއުއާ ރިފާއު ވަނީ މަދަހައާ ގުޅޭ ވާހަކަތައް ހިއްސާކޮށްފަ އެވެ.

މަދަހައިގެ މައުލޫމާތު ހިއްސާކުރަނީ 

ރިފާއު ބުނި ގޮތުގައި މިއީ ގުދުރަތްތެރިކަމުގެ ރީތި މަންޒަރުތަކާއި ގުޅޭގޮތުން ޚިޔާލުކޮށް ފިކުރު ހިންގުމުން ހަޔާތަށް ގެނެވޭ ހެޔޮ ބަދަލުތަކެއްގެ ވާހަކަ ކިޔައިދޭ އިބްރަތްތެރި މަދަހައެއް ކަމަށެވެ. މިއީ ޒުވާނަކަށް ކީރިތި ޤުރުއާންގެ އާޔަތަކާމެދު ކުރެވޭ ފިކުރުން އުފަންކުރުވި ހިޔާލެކެވެ. އެ އާޔަތާމެދު ވިސްނާ ފިކުރުކުރުމުން ދީނަށް އޭނާގެ ހިތް ހުޅުވިގެންދެ އެވެ. މާތްﷲގެ އެއްކައުވަންތަ ކަމާމެދު ވިސްނާ ފިކުރުމުން ހަޔާތަށް ގެނެވޭ ހެޔޮ ބަދަލު ކިޔައިދެ އެވެ.

ޝިފާއު އާއި ރިފާއު ފާހަގަކުރި ގޮތުގައި މިއީ މުޖްތަމައުއަށް ހެޔޮ ނަސޭހަތާއި މުހިންމު މެސެޖުތަކެއް ދޭނެ މަދަހައަކަށް ވާނެ އެވެ. 

ރިފާއު ބުނި ގޮތުގައި އިބްރަތްތެރި އަދި އެހާމެ ޝައުގުވެރި މަދަހަތަކެއް ގެނެސްދީފައިވާ އިސްލާމިކް ރިދަމް އިން ގެނެސްދޭ މިފަދަ ކޮންމެ އުފެއްދުމަކީ އިސްލާމިކް ކޮންސެޕްޓެއްގައި ގެނެސްދޭ އުފެއްދުމެކެވެ.

ޚާއްސަކޮށް މި މަދަހައިން ބޭކާރު ކަންކަމުން ދުރުކޮށް މާތްﷲ ގެ މަތީން ހަނދުމަކޮށްދޭނެ އެވެ. 

"ފިކުރު ހިންގުން ވަރަށް މުހިންމު. ހަނދާއި އިރާ ތަރިތަކާއި ގަސްގަހާ ގެއްސާއި މެއްސާއި ރެއްސާ މިހުރިހާ ވާހަކައެއް ވެސް މީގަ އަންނާނެ. އެހެންވީމަ ފިކުރުކުރާށޭ. އޭރުން މާތްﷲ މައުރިފާ ވާނެ," މި ފަހަރުގެ މަދަހައާ ގުޅޭގޮތުން ރިފާއު ބުންޏެވެ.

މި މަދަހައިގެ ވީޑިއޯ ތައްޔާރުކޮށްފައި ވަނީ އޯކޭޒް އިންކުންނެވެ. މަދަަހައިގެ މީޑިއާ ޕާޓްނަރަކީ ވޮއިސް އެެވެ.